அக்ஷய திருதி கைகொடுக்குமா? நகை வியாபாரிகள் எதிர்பார்ப்பு

ஈரோடு: வறட்சி, தேர்தல் கமிஷன் கெடுபிடியால், தங்கத்தின் விலை குறைந்தும், விற்பனை உயராத நிலையில், அக்ஷய திருதியை கைகொடுக்கும், என, நகை வியாபாரிகள் எதிர்பார்த்துள்ளனர். சென்னை, கோவை போன்ற பெருநகரங்களில் மட்டுமே பெரிய நகைக்கடைகள், பத்து, 15 ஆண்டுகளுக்கு முன்பு இருந்தன. கடந்த, ஐந்தாண்டுகளில், சிறிய நகரங்களிலும், பெரும் நிறுவனங்களின் ஆக்கிரமிப்பால், நடுத்தர மற்றும் சிறு நகை விற்பனையாளர்கள் வெகுவாக பாதிக்கப்பட்டுள்ளனர். ஆன்லைன் வர்த்தகம், கடும் வறட்சி, மின் வெட்டால் தொழில் நசிவு போன்ற பல்வேறு காரணங்களால், நடுத்தர மற்றும் சிறு வியாபாரிகளின் வர்த்தகம், கடந்த ஐந்தாண்டுகளில் பாதியாக குறைந்துவிட்டது. பெ ரிய நிறுவனங்கள், மொத்தமாக கொள்முதல் செய்வதால், அதிகளவில் டிசைன்கள் வைத்துள்ளன. இதனால் வாடிக்கையாளர்களின் வருகை சதவீதம், அந்நிறுவனங்களுக்கு அதிகரித்துள்ளன.

இதுகுறித்து, ஈரோடு தங்கம் மற்றும் வெள்ளி வியாபாரிகள் சங்க செயலாளர் தர்மராஜ் கூறியதாவது: ஈரோடு நகரில் சி று மற்றும் நடுத்தர நகைக்கடைகள், 300 க்கும் மேல் உள்ளன. கடந்த சில ஆண்டுகளாக, வறட்சி, தொழில் நசிவால், பணப்புழக்கம் குறைந்து, விற்பனை பாதியாக குறைந்து விட்டது. தேர்தல் கமிஷன் கெடுபிடியால், கடந்த இரண்டு மாதமாக, மேலும் விற்பனை சரிந்தது. வரும் மே, இரண்டாம், தேதி அக்ஷய திருதியை வருவதால், அன்றைய தினம், விற்பனை அதிகரிக்கும், என, எதிர்பார்க்கிறோம். இதனால், அதிகளவில் புதிய டிசைன்களில் நகைகள் ஆர்டர் செய்யப்பட்டுள்ளன. கடந்தாண்டு, அக்ஷய திருதியைக்கு விற்பனை மோசமாகவே இருந்தது. ஆனால், இந்தாண்டு, ஓரளவுக்கு கை கொடுக்கும், என, எதிர்பார்க்கிறோம். கடந்த சில நாட்களுக்கு முன், கிராம், 2,700 ரூபாய் வரை குறைந்த நிலையில், தற்போது மீண்டும் அதிகரிக்க துவங்கியுள்ளது. நேற்று முன்தினம், ஒரு கிராம் தங்கம், 2,815 ரூபாயாக இருந்தது. அதாவது கிராமுக்கு, 75 முதல், 80 ரூபாய் வரை அதிகரித்துள்ளது.

தேர்தல் முடிந்து, மத்தியில் நிலையான ஆட்சி அமைந்தால், ரூபாய் மதிப்பு குறைய வாய்ப்புள்ளது. எனவே, ஜூலை மாதத்துக்குப்பின், தங்கத்தின் விலை குறைய வாய்ப்புள்ளது.
இவ்வாறு அவர் கூறினார்.

[thanks] தினமலர் [/thanks]

அக்ஷயதிரிதியையை ஜூலைக்குப்பின் மாற்றிக்கொள்வோம். ஆனாலும் ஒரு கிராம் தங்கமாவது அன்று வாங்கினால்தான் மனம் அமைதியடைகிறது. அப்படி பழக்கிவிட்டனர். என்ன செய்வது ?