பிளாஸ்டிக் பாட்டில் குடிநீருக்கு தடா!

அமெரிக்காவின் சான்ஃப்ரான்ஸிஸ்கோ நகரில் பாட்டில்களில் தண்ணீரை அடைத்து விற்கக் கூடாது என அதிரடியாக தடை விதிக்கப்பட்டுள்ளது! இது உலகம் முழுக்க ஒரு முன்னுதாரணமான நடவடிக்கையாகக் கருதப்படுகிறது. பல்வேறு தரப்பினராலும் இது பாராட்டப்பட்டுள்ளது. பிளாஸ்டிக் பயன்பாட்டைக் குறைப்பதற்கான மிகச் சிறந்த தொடக்கமாகவும் இது கருதப்படுகிறது.

அமெரிக்காவில் ஒவ்வொரு ஆண்டும் சராசரியாக ஓர் அமெரிக்கப் பிரஜை 167 பாட்டில்களை உபயோகிப்பதாக ஆய்வு ஒன்று தெரிவிக்கிறது. அப்படிப் பார்த்தால் அமெரிக்க மக்கள் தொகையோடு இந்த 167-ஐ 31 கோடியால் பெருக்கினால் என்ன வருமோ, அத்தனை பிளாஸ்டிக் பாட்டில்கள் உற்பத்தி செய்யப்பட்டு குப்பைக்கு செல்கின்றன! அதோடு இந்த பிளாஸ்டிக் பாட்டில்களை உற்பத்தி செய்ய 1.7 கோடி பேரல்கள் அளவுக்கு கச்சா எண்ணெயும் செலவாவதாக தெரிய வந்துள்ளது. இந்த 167 பாட்டில்களில் வெறும் 38 பாட்டில்களே மறுசுழற்சிக்குச் செல்வதாகவும் மீதி அத்தனையும் மண்ணோடு கலந்து சுற்றுச்சூழலுக்குப் பாதிப்பை உண்டாக்குகின்றன என்றும் ஆய்வில் தெரியவந்துள்ளது.

இதனால்தான் இப்போது அமெரிக்காவின் மிகப் பெரிய மாநகராட்சியான சான்ஃப்ரான்ஸிஸ்கோ தண்ணீர் பாட்டில்களுக்கு தடை விதித்துள்ளது. நிகழ்ச்சிகளிலும் இவ்வகை தண்ணீர் பாட்டில்கள் பயன்படுத்தக்கூடாது என்றும் கூறப்பட்டுள்ளது. இதன் மூலம் ஆண்டுதோறும் அந்நகரின் குப்பைகளில் கலக்கிற கோடிக்கணக்கான தண்ணீர் பாட்டில்களைக் கட்டுப்படுத்த முடியும் என்கிறார்கள். இந்தத் தடைக்கு தண்ணீர் பாட்டில் உற்பத்தியாளர்கள் தரப்பிலிருந்து கடும் எதிர்ப்புக் கிளம்பினாலும் அதை மீறியே தடைக்கு உத்தரவிட்டுள்ளது அந்த மாநகராட்சி.

இப்படி ஓர் உத்தரவை உடனே ஓவர் நைட்டில் பிறப்பித்து விடவில்லை. அதற்கு முன்னால் நகரம் முழுக்கத் தேவையான அளவு மக்கள் பயன்பாட்டுக்கென சுத்தமான குடிநீர் கிடைக்கும் வகையில் வசதிகளை உருவாக்கிவிட்டுத்தான் இந்த உத்தரவையே அந்த மாநகராட்சி பிறப்பித்துள்ளது. உத்தரவை மீறி பிளாஸ்டிக் பாட்டிலில் தண்ணீர் விற்பவர்களுக்கு கடுமையான தண்டனைகளையும் அறிவித்துள்ளது.

உலகெங்கும் சுற்றுச்சூழல் ஆர்வலர்கள் பிளாஸ்டிக் பயன்பாட்டுக்கு எதிராக குரல் கொடுக்க ஆரம்பித்திருக்கும் வேளையில் நம்மூரில் இப்போதுதான் அரசே பிளாஸ்டிக் பாட்டில்களில் தண்ணீரை அடைத்து விற்க ஆரம்பித்திருக்கிறது. மத்திய அரசு ரயில் நீர் என்கிற பெயரிலும் மாநில அரசு அம்மா குடிநீர் என்கிற பெயரிலும் தொடர்ந்து உற்பத்தி செய்துவருகின்றன. அமெரிக்கா அளவுக்கு இல்லையென்றாலும் இந்தியாவிலும் பிளாஸ்டிக் பாட்டிலில் அடைத்து விற்கப்படும் தண்ணீர் பயன்பாடு கணிசமானதுதான்!

தமிழ்நாட்டிலும் எங்கு பார்த்தாலும் பயணங்களில் பொதுக்கூட்டங்களில் காதுகுத்து, வளைகாப்பு தொடங்கி கல்யாணம் வரை சகல இடங்களிலும் இந்த பிளாஸ்டிக் பாட்டில் தண்ணீர் சப்ளைதான் லேட்டஸ்ட் ட்ரெண்ட்டாக மாறிவருகிறது. நம்மூரிலும் கூட இதுபோன்ற தடைகளை விதிக்க முயற்சி செய்யலாம்.

சென்னை மாதிரியான பெருநகரங்களில் மட்டுமாவது முயற்சி செய்துபார்க்கலாம்! ஆனால் அதற்கு முன்பு பொதுமக்களுக்கு இலவசமாக சுத்தமான குடிநீருக்கு ஏற்பாடு செய்ய வேண்டும்! அப்படிச் செய்தால்தான் இது சாத்தியமாகும்! (அதிஷா-புதியதலைமுறை)

 

ஊர் தோறும் மதுக்கடைகள்
தண்ணீர் வேண்டி வீதியில் போராடும் பெண்கள்
அரசின் கருவூலத்தை நிரப்பி
மக்களின் வாழ்வாதாரத்தை நசுக்கும் அவலம்
எப்போது மாறும்
மனிதனுக்கு தேவை தண்ணீர்
மதுவால் வரும் மரணம் அல்ல
இதை முதலில் சரிசெய்ய வேண்டும்
பிளாஸ்டிக் பற்றியெல்லாம் பிறகு தான் யோசிக்கும் போல அரசு