வேட்புமனு தாக்கல் இன்றுடன் நிறைவு: இதுவரை 758 பேர் மனு

தமிழகத்தில் மக்களவைத் தேர்தலில் போட்டியிட வேட்புமனு தாக்கல் செய்வதற்கு சனிக்கிழமை (ஏப். 5) கடைசி நாளாகும்.

வேட்புமனு தொடங்கிய தினத்தில் (மார்ச் 29) இருந்து வெள்ளிக்கிழமை (ஏப். 4) வரை மொத்தம் 758 பேர் மனுதாக்கல் செய்துள்ளனர். வெள்ளிக்கிழமையன்று மட்டும் 301 பேர் தங்களது வேட்புமனுக்களை அளித்துள்ளனர்.

தமிழகத்தில் மக்களவைத் தேர்தலில் போட்டியிடுவதற்கு வேட்புமனு தாக்கல் செய்வதற்கான காலக்கெடு சனிக்கிழமையுடன் நிறைவடைகிறது. மாலை 3 மணிக்குள் வேட்புமனுக்களை அளிக்க வேண்டும். இதன்பிறகு, வேட்புமனுக்கள் மீதான பரிசீலனை ஏப்ரல் 7- ஆம் தேதியன்று நடைபெறுகிறது. மனுக்களை வாபஸ் பெற ஏப்ரல் 9- ஆம் தேதி கடைசி நாளாகும்.

ஒரே நாளில் 301 பேர் மனு:

வேட்புமனு தாக்கல் செய்ய கடைசி தினத்துக்கு முந்தைய நாள் என்பதால் வெள்ளிக்கிழமையன்று மட்டும் 301 பேர் தங்களது மனுக்களை அளித்தனர். மனுதாக்கல் தொடங்கிய நாளில் இருந்து இதுவரையிலான காலத்தில் இதுவே அதிகபட்ச எண்ணிக்கையாகும். வேட்புமனு தொடங்கிய மார்ச் 29- ஆம் தேதியன்று 67 பேரும், ஏப்ரல் 1-இல் 131 பேரும், ஏப்ரல் 2- ஆம் தேதியன்று 120 பேரும், ஏப்ரல் 3- ஆம் தேதியன்று 139 பேரும் மனுக்களை தாக்கல் செய்தனர்.

முக்கிய பிரமுகர்கள் யார்? தேர்தலில் போட்டியிட வெள்ளிக்கிழமை வேட்புமனு தாக்கல் செய்தவர்களில் சில முக்கிய பிரமுகர்களும் அடங்குவர். தஞ்சாவூர் தொகுதியில் திமுக வேட்பாளர் டி.ஆர்.பாலு, சிதம்பரம் தொகுதி விடுதலைச் சிறுத்தைகள் கட்சி வேட்பாளர் தொல். திருமாவளவன், சேலம் தொகுதி தேமுதிக வேட்பாளர் எல்.கே.சுதீஷ், பொள்ளாச்சி திமுக வேட்பாளர் பொங்கலூர் பழனிச்சாமி, கோவை பாஜக வேட்பாளர் சி.பி.ராதாகிருஷ்ணன், தேனி காங்கிரஸ் வேட்பாளர் ஜே.எம்.ஆரூண், மதுரை திமுக வேட்பாளர் வ.வேலுச்சாமி, அந்தத் தொகுதியின் தேமுதிக வேட்பாளர் சிவமுத்துக்குமார், வேலூரில் பாஜக அணியில் போட்டியிடும் ஏ.சி.சண்முகம், அதே தொகுதியில் திமுக அணி சார்பில் போட்டியிடும் அப்துல் ரகுமான், தென் சென்னை திமுக வேட்பாளர் டி.கே.எஸ். இளங்கோவன், வடசென்னை திமுக வேட்பாளர் கிரிராஜன், தேமுதிக வேட்பாளர் சௌந்திரபாண்டியன் ஆகியோர் வெள்ளிக்கிழமை வேட்புமனுக்களைத் தாக்கல் செய்தவர்களில் குறிப்பிடத்தக்கவர்கள்.

மீண்டும் மீண்டும்... வேட்புமனுவில் எந்தப் பிரச்னையும் வரக்கூடாது என்பதற்காக சில வேட்பாளர்கள் இரண்டு முறைக்கு மேல் மனுக்களைத் தாக்கல் செய்கிறார்கள். ஒரு வேட்பாளர் ஒரு தொகுதியில் நான்கு முறை மனுக்களை அளிக்கலாம். அதன்படி, தென் சென்னையில் பாஜக சார்பில் போட்டியிடும் இல.கணேசன், தென்காசி (தனி) தொகுதியில் புதிய தமிழகம் கட்சி வேட்பாளர் கிருஷ்ணசாமி ஆகியோர் மீண்டும் ஒருமுறை வேட்புமனுக்களை வெள்ளிக்கிழமை தாக்கல் செய்தனர்.

இவ்வாறு மனுக்களை தாக்கல் செய்யும்போது சொத்து மதிப்பு விவரங்களை ஒருமுறை அளித்தால் போதுமானது என்று தேர்தல் துறை அதிகாரிகள் தெரிவித்தனர்.

ஒவ்வொரு தொகுதியிலும் மாற்று வேட்பாளர்கள் மனுக்களை அளித்தது, ஒரே வேட்பாளரே இரண்டு முறைக்கு மேல் மனுக்களை கொடுத்துள்ளது போன்ற காரணங்களால் வேட்புமனுக்களின் எண்ணிக்கை 758 ஆக உயர்ந்துள்ளது. வேட்புமனுக்கள் பரிசீலனைக்குப் பிறகோ அல்லது வாபஸ் பெறும் போதோ இந்த எண்ணிக்கை கணிசமாகக் குறைந்து, தேர்தல் களத்தில் போட்டியிடும் இறுதி வேட்பாளர்கள் யார் யார் என்பது தெரியவரும்.

#வேட்புமனு @தேர்தல் #பாராளுமன்றம் #வாக்காளர்கள் #வேட்பாளர்தள்

[thanks] தினமணி [/thanks]