நன்றி மறப்பது நன்றன்று!

மனிதர்களாய் பிறந்த அனைவருமே ஏதோ ஒரு சூழ்நிலையில், அறிந்தோ, அறியாமலோ பாவங்களை செய்து விடுகின்றனர். அத்தகைய பாவங்களின் தன்மைக்கு ஏற்ப, சாஸ்திரங்கள், சில பரிகாரங் களை பரிந்துரை செய்கிறது. ஆனால், பரிகாரமே இல்லாத பாவம் ஒன்று உள்ளது. அது தான், செய்நன்றி மறத்தல்! இப்பாவத்தை செய்வோருக்கு மட்டும், எந்த சாஸ்திரத்திலும் பரிகாரம் இல்லை.

அதனால் தான் நம் முன்னோர்கள், இத்தகைய கொடிய பாவத்தை, இளைய தலைமுறையினர் செய்துவிடக் கூடாதே என்ற எண்ணத்தில், 'உப்பிட்டவரை உயிர் உள்ளவரை நினை!' என்றனர்.

இதை, வலியுறுத்தும் விதமாக, மகாபாரதத்தில் ஒரு கதை உள்ளது. பாண்டவர்களுக்கும், கவுரவர்களுக்கும் இடையே போர் நடக்க இருந்த சமயம் அது. இரு தரப்பினரும் படைகளைத் திரட்டிக் கொண் டிருந்தனர். அப்போது, பாண்டவர்களின் தாய்மாமனான சல்லியன், பாண்டவர்களுக்கு உதவி செய்வதற்காக, பெரும் படையுடன் வந்தார். சல்லியன் வரும் தகவல் அறிந்த துரியோதனன், சல்லியன் வரும் வழியில், அழகான பூஜா மண்டபங்கள், சபை, உடற்பயிற்சிக் கூடங்கள், அரசன் மற்றும் படை வீரர்கள் களைப்பாற அழகிய விடுதிகள், உண்டு மகிழ உணவுக் கூடங்கள், விதவிதமான உணவுகள், பழங்கள், பழரசங்கள், மாலைகள், விருப்பம் அறிந்து நிறைவேற்றக் கூடிய பணியாளர்கள் என, அற்புதமான ஏற்பாடுகளை செய்திருந்தான்.

சல்லியனும் அவரது படையினரும் அங்கு தங்கினர். அங்கிருந்த ஏற்பாடுகளை கண்ட சல்லியனுக்கு மிகுந்த மன மகிழ்ச்சி ஏற்பட்டது. இதை எல்லாம், பாண்டவர்கள் தான் செய்திருக்கின்றனர் என நினைத்த, சல்லியன், 'இப்படிப்பட்ட ஏற்பாடுகளைச் செய்தவர்களுக்கு, நான் மரியாதை செய்ய விரும்புகிறேன்...' என்றார். அதுவரை மறைவாயிருந்த துரியோதனன் வெளிப்பட்டு, 'இந்த ஏற்பாடுகளையெல்லாம் செய்தது, நான் தான்...'என்று கூறி, 'மாமா உங்களுக்குப் பாண்டவர்கள் எப்படியோ, அப்படித் தான் நாங்களும். அதனால், நீங்கள், உங்கள் படைகளோடு எங்கள் பக்கம் இருந்து, எங்களுக்கு உதவி செய்ய வேண்டும்...' என, வேண்டினான்.

சல்லியனும், துரியோதனன் செய்திருந்த வசதிகளை அனுபவித்த நன்றிக்காக, 'அப்படியே செய்கிறேன்...' என, வாக்குக் கொடுத்து, அதன்படி உதவியும் செய்தார்.

ஒரு வேளை உணவு உண்டதால், துரியோதனனுக்காக, தன் உயிரையே கொடுத்தார் சல்லியன். ஆனால், நம்மை வளர்த்து, ஆளாக்கி, நமக் காகவே வாழ்ந்த பெற்றோரையும், பல்வேறு நேரத்தில், நமக்காக உதவி செய்தோரையும், நன்றி உணர்ச்சி சிறிதும் இல்லாமல், துச்சமென மதித்து தூக்கி எறிவோரை, கடவுள்கூட மன்னிக்க மாட்டார். அதனால், நன்றி மறந்தல் நன்றன்று என்பதை, மனதில் வைத்துக் கொள்ளுங்கள்.

பி.என்.பரசுராமன்