30.03.2014 - ஒரு நாள் அடையாள உண்ணாவிரதம்!

**சாமி** · **சாமி** Sat Mar 29, 2014 12:18 pm

தமிழகத்தின் அனைத்து சிவாலயங்களிலும் திருமஞ்சனம் (அபிசேகம்), தீபாராதனை மற்றும் அர்ச்சனை போன்ற 16 விதமான உபசாரத்திலும் தேவாரம், திருவாசகம், சித்தர்பாடல்கள் போன்றவற்றை பாடியே குறைந்தபட்சம் 2 காலங்களிலாவது (காலை, மாலை) கருவறை மூலவருக்கும், பரிவார தெய்வங்களுக்கும் அர்ச்சகர்கள் உறுதியாக அர்ச்சனை செய்ய வேண்டும் என்று பெரும்பான்மை சைவ சமய மக்களின் நீண்டநாள் மனப்புழுக்கத்தினை நீக்கி, மக்கள் மகிழ்ச்சி கொள்ளும் விதமாக தமிழக அரசு அவசர சட்டத்தினை பிறப்பித்திட வேண்டுமாய் வேண்டுகோள் விடுத்து

ஒரு நாள் அடையாள உண்ணாவிரதம்!

தேதி: 30.03.2014 ஞாயிறு காலை 9 மணி முதல் மாலை 5 மணி வரை
இடம்: வள்ளுவர் கோட்டம்

தேவாரம், திருவாசகம் போன்ற பக்தி பனுவல்களின் மாண்புகளை மீண்டும் வழிபாட்டு முறைகளில் முதன்மை பெற்றிடச் செய்ய ஒன்று திரள்வோம்!

சைவர்களின் நெடுநாளைய கோரிக்கையை மத்திய மாநில அரசுகள் ஏற்று அரசாணை பிறப்பிக்கும்வரை ஓயாமல் சிவநெறியில் நின்று போராடுவோம்!

சமுதாயத்தில் மாற்றங்களை ஏற்படுத்தி மக்கள் தொண்டு செய்தவர்களே நமது நாயன்மார்கள். நீங்கள்?

சிவநெறியாளர்களே வாருங்கள், நாம் அனைவரும் வாழும்போதே சாதிப்போம் இல்லையெனில் எதிர்காலம் நம்மை கோழைகள் என்று தூற்றிக்கொண்டிருக்கும்!

- அனைத்துலக சைவத்திருமுறை கூட்டமைப்பு

**சாமி** · **சாமி** Mon Mar 31, 2014 7:27 pm

தேவாரம், திருவாசகம் மூலம் அர்ச்சனை கோரி உண்ணாவிரதம்: 1000க்கும் மேற்பட்டோர் பங்கேற்பு

தமிழகத்தில் உள்ள சிவன் ஆலயங்களில் தேவாரம், திருவாசகம் மூலம் அர்ச்சனை செய்ய தமிழக அரசு சட்டம் இயற்ற வேண்டும் என்பது உட்பட பல்வேறு கோரிக்கைகளை வலியுறுத்தி அனைத் துலக சைவத்திருமுறை கூட்டமைப்பு மற்றும் சிவனடியார் பெருமக்கள் சார்பில் சென்னை வள்ளுவர் கோட்டம் அருகில் உண்ணாவிரதப் போராட்டம் நடத்தப் பட்டது. இதில் 1000க்கும் மேற்பட்டோர் கலந்து கொண்டனர்.

இது தொடர்பாக அனைத்துலக சைவத்திருமுறை கூட்டமைப்பு மற்றும் சிவனடியார் பெருமக்களின் தலைவர் சண்முகா ஆனந்தம் கூறியதாவது:

தமிழ்நாட்டில் மொத்தம் 40 ஆயிரம் சிவன் கோயில்கள் உள்ளன. இவற்றில் 38,000 கோயில்கள் அரசின் கட்டுப்பாட்டில் உள்ளன. இந்த கோயில்களில் வடமொழிகளில்தான் அர்ச்சனை செய்யப்படுகிறது. இது மாற வேண்டும். தேவாரம், திருவாசகம் மூலம் அர்ச்சனை செய்ய வேண்டும். இதற்கு தமிழக அரசு சட்டம் இயற்ற வேண்டும்.

மேலும் பள்ளிக் கல்வியில் தேவாரம், திருவாசகத்தை பாடமாகக் கொண்டு கற்பிக்க வேண்டும். இது மாணவர்களுக்கு நல்ல நெறிமுறைகளை கற்பிக்கும். அரசு சார்பில் சிவன் ஆலயங்களில் நாயன்மார்கள் குரு பூஜை நடத்த வேண்டும்.

இமயமலையில் உள்ள கைலாஷ் மானசரோவர் ஆகிய இடங்களுக்குச் சென்று வர அரசு மானியம் வழங்கும் என்ற உத்தரவை நடைமுறைப்படுத்த வேண்டும் என்பது உட்பட பல்வேறு கோரிக்கைகளை வலியுறுத்தி உண்ணாவிரத போராட்டம் நடத்தப்படுகிறது என்றார். (thehindutamil)