ஆலும் வேலும் பல்லுக்கு உறுதி!

சிறு பிராயத்திலேயே "ஆலும் வேலும் பல்லுக்கு உறுதி' என்று படித்திருக்கிறோம். ஆனால் காலையில் எழுந்தவுடன் நாம் டூத் பேஸ்ட், பிரஷ் எடுக்கிறோம். குழந்தைகளுக்கும் அதையே பல் துலக்க கொடுக்கிறோம். ஆக, கற்பது வேறு; வாழ்க்கையில் கடைப்பிடிப்பது வேறு என்பதை காலையிலேயே ஆரம்பித்து விடுகிறோம்.

நமது முன்னோர்கள் கூற்றில் நூற்றுக்கு நூறு உண்மை இருக்கிறது. அதாவது ஆலும் வேலும் பல்லுக்கு உறுதி என்பது இன்றைக்கும் பொருந்தும். இல்லாவிடில் தெருவுக்கு இரண்டு டென்டல் கிளினிக்குகள் முளைக்க வேண்டிய அவசியம் என்ன? இன்று எம்.பி.பி.எஸ். டாக்டரை விட பல் மருத்துவம் படித்த டாக்டர்களே தாராளமாக, ஏராளமாக சம்பாதிக்கின்றனர்.

மீடியாக்களிலும் திரையரங்கின் விளம்பரங்களிலும் பற்பசை விளம்பரங்கள்தான் கொடி கட்டிப் பறந்து கோடி கோடியாக பணத்தை அள்ளுகின்றன. சில பற்பசை நிறுவனங்கள், தங்கள் தயாரிப்புகளையே டாக்டர்களே பரிந்துரைப்பதாக விளம்பரம் செய்கின்றன.

அப்படியிருந்தும் 6 முதல் 60 வயதுவரை பெரும்பாலானோர் பல் டாக்டர்களிடம் சென்று வந்துகொண்டுதான் இருக்கிறார்கள். அங்கே சொத்தைப் பல்லைப் பிடுங்கப் போனால் பிடுங்க மாட்டேன் என்கிறார்கள். "ரூட் கேனல்' செய்தால் சரியாகிவிடும். பல்லை எடுக்க வேண்டியதில்லை என்று ஏதேதோ டெக்னிக்கலாக சொல்கிறார்கள். அதற்கு இரண்டு அல்லது மூன்று முறை ("சிட்டிங்') வர வேண்டுமாம். சொத்தை விழுந்த செத்த பல்லுக்கு உயிர்ப்பிச்சை கொடுப்பதாக அவர்கள் சொல்கிறார்கள்.

அதுபோகட்டும், கோடி கோடியாக விளம்பரத்துக்கு மட்டுமே செலவழித்து நமது வருமானத்தில் கணிசமான தொகையையும் காலி செய்துவிடும் பற்பசை நிறுவனங்கள் தரும் வாக்குறுதிகளால் என்னதான் பயன்? அது வெறும் வியாபார உத்திதானா? புளோரைடு கலந்த பற்பசையை உபயோகிக்கச் சொல்கிறார்கள். புளோரைடு கலந்த பற்பசையை உபயோகிப்பவர்களுக்கு பல்லில் குழி விழுவது குறைகிறது அல்லது தவிர்க்கப்படுகிறது என்று நிரூபிக்கப்பட்டுள்ளது உண்மைதான். அதே சமயத்தில் அளவுக்கு அதிகமான ப்ளோரைடு உபயோகம் ப்ளூரோசிஸ் என்ற பல் சிதைவு ஏற்பட காரணமாகிறது என்பதும் உண்மையே.

புளோரைடு கலவையை நேரடியாக விழுங்கினால் விஷம்தான். பல் துலக்கும்போது அதை விழுங்காமல் பார்த்துக்கொள்வது பெரியவர்களுக்கே கடினம். சிறுவர்கள் பற்பசை சுவையாக இருக்கிறது என்பதற்காக அதை அப்படியே சாப்பிடவும் விரும்புவார்கள். இது விஷம் என்பதை புரிய வைக்க வேண்டும்.

"பற்கள் சொத்தையாக இரசாயனங்கள்தான் காரணம். ஆகவே சோடியம் லாரைல், சோடியம் லாரேத், பேக்கிங் சோடா, பெராக்ûஸட் ஆகிய இரசாயனங்கள் அடங்கிய பற்பசையைத் தவிருங்கள்' என்று 1997-ல் அமெரிக்க உணவு மற்றும் மருந்து நிர்வாக அமைப்பு (எப்.டி.ஏ.) எச்சரித்துள்ளது. பற்பசையை வாங்கும்போது இதையெல்லாம் பார்த்து ஆராய்ச்சி செய்து வாங்க முடியுமா?

இதற்கு என்னதான் தீர்வு? முன்னோர்கள் சொன்னதையே கடைப்பிடித்துப் பார்க்கலாமா? நாம் கடைபிடிப்பது இருக்கட்டும். இப்போது பற்பசை தயாரிப்பு நிறுவனங்களே இம்முடிவுக்கு வந்திருப்பார்கள் போலும். புதிதாக தயாரிக்கப்பட்டுள்ள உங்கள் டூத் பேஸ்ட்டில் உப்பு கலந்திருக்கிறது. இதையே பயன்படுத்துங்கள் என்கிறார்கள்.

இதைத்தான் நமது முன்னோர்கள் சொன்னார்கள். சமையலுக்குப் பயன்படும் கல் உப்பை பொடி செய்து ஆள்காட்டி விரலால் பற்களைத் தேய்த்து ஈறுகளை மெதுவாக அழுத்திவிட்டாலே உங்கள் பற்களுடன் வாயும் சுத்தமாகவிடும், உப்பு அனைத்து கிருமிகளையும் நாசம் செய்துவிடும் என்றார்கள். அதனால்தான் உப்பு கலந்த பேஸ்ட் இப்போது வந்திருக்கிறது.

அதேபோல் சில டூத் பிரஷ் தயாரிப்பு நிறுவனங்கள் தங்கள் டூத் பிரஷ், வாயின் எல்லா மூலை முடுக்குகளிலும் செல்லும் என்கிறார்கள். நமது ஆட்காட்டி விரலைவிடவா லாவகமாக டூத் பிரஷ் இயங்க முடியும்? நமக்கான டூத் பிரஷ் நமது வலதுகை ஆள்காட்டி விரல்தான். நமது உடலின் உள்ளே உள்ள உறுப்புகளுக்கான புத்துணர்வு மையங்கள் வாய்க்குள் உள்ளன. அந்த புத்துணர்வு மையங்களை தொட்டு விரலால் அழுத்தும்போது நமது உள்ளுறுப்புகளான இதயம், மண்ணீரல், கல்லீரல் போன்ற அத்தனை உறுப்புகளும் புத்துணர்வு பெற்று ஆரோக்கியம் அடைகின்றன.

இப்போது உப்பின் (நமது முன்னோர்களின்) பெருமையை உணர்ந்துள்ள டூத் பேஸ்ட் தயாரிப்பாளர்கள் இனி ஆலங் குச்சியையும் வேலங்குச்சியையும் பக்குவமாக வடிவமைத்து டூத் பிரஷில் நைலான் குச்சங்களுக்குப் பதிலாக பொருத்தி விற்கத்தான் போகிறார்கள். அதன்மூலம் ஆலும் வேலும் பல்லுக்கு உறுதி என்ற நமது முன்னோர்களின் வாக்குக்கு (வாய்க்கு) பெருமை கிடைக்கும் நாள் வரத்தான் போகிறது. (dinamani)