திராவக வீச்சால் பாதித்தவர்களுக்காக போராடிய லட்சுமிக்கு வீரப்பெண் விருது!

உலக அளவில் துணிச்சலான செயல்களில் ஈடுபடும் பெண்களுக்கு, ஆண்டுதோறும் சர்வதேச வீரப்பெண்மணி என்ற விருதை அமெரிக்க அரசின் வெளியுறவுத்துறை வழங்கி கவுரவித்து வருகிறது. இந்த ஆண்டு, இந்த விருதுக்காக இந்தியாவில் தலைநகர் டெல்லியை சேர்ந்த லட்சுமி என்ற 25 வயதுப் பெண் தேர்ந்து எடுக்கப்பட்டு இருக்கிறார்.லட்சுமிக்கு 16 வயதாக இருந்தபோது, காதலிக்க மறுத்ததால் 32 வயது வாலிபர் ஒருவர் (லட்சுமியின் தோழியின் சகோதரர்) அவர் மீது திராவகம் வீசினார். இதனால் அவருடைய முகம் உருக்குலைந்து போனாலும் மனம் தளராத அவர், இதுபோன்ற திராவகம் வீச்சு சம்பவத்துக்கு முடிவு கட்ட இயக்கம் ஒன்றை தொடங்கி நடத்தி வந்தார் என்பது குறிப்பிடத்தக்க்து.

டெல்லியைச் சேர்ந்த இளம்பெண் லட்சுமி, 2005ம் ஆண்டு ஆசிட் வீச்சால் பாதிக்கப்பட்டார். ஒருதலைக் காதலில் தோழியின் அண்ணன் இந்த கொடூரச் செயலில் ஈடுபட்டார். முகம் முழுவதும் சிதைந்தபோதும், தன்னைப் போல பாதிக்கப்பட்ட மற்றவர்களுக்கு நீதி கிடைக்க வேண்டும் என்று இந்தியா முழுவதும் சென்று லட்சுமி போராடி வருகிறார். மேலும் உச்ச நீதிமன்றத்தில் ஆசிட் விற்பனையை தடை செய்யவேண்டும், பாதிக்கப்பட்டவர்களுக்கு தேவையான மறுவாழ்வுக்கான தெளிவான திட்டங்களை அரசு முன்னெடுக்க வேண்டும் என்றும் கோரி மனு தாக்கல் செய்தார்.

இதன் மீது விசாரணை நடத்திய உச்ச நீதிமன்றம் ஆசிட் விற்பனையை முறைப்படுத்த மத்திய மாநில அரசுகளுக்கு உத்தரவிட்டுள்ளது. இந்நிலையில், இவரது தொடர் போராட்டத்தை கவுரவிக்க விரும்பிய அமெரிக்க அரசு, இந்த ஆண்டுக்கான சர்வதேச வீரப்பெண் விருதுக்கு இவரை தேர்வு செய்தது. வாஷிங்டனில் நடைபெற்ற விழாவில், அதிபர் ஒபாமாவின் மனைவி மிச்செல், லட்சுமிக்கு இவ்விருதை வழங்கினார். விருது பெற்ற லட்சுமி,”, ‘‘திராவகம் வீச்சு போன்ற கொடுமைகளுக்கு எதிராக குரல் கொடுக்க இந்தியப் பெண்கள் தயங்கி வருகிறார்கள். இதுபோன்ற விருதுகள் இந்தியப் பெண்களுக்கு ஊக்கமளிப்பதாக அமையும்.மேலும் எனக்கு அளிக்கப்பட்ட இந்த விருதுக்குப்பிறகு, லட்சுமியால் இதை சாதிக்க முடிந்த போது என்னாலும் அநீதிகளுக்கு எதிராக குரல் கொடுக்க முடியும் என்ற முடிவுக்கு இந்தியப் பெண்களால் வரமுடியும்.ஆனாலும் ‘நீ என் முகத்தில் ஆசிட் ஊற்றவில்லை; என் கனவுகளில் ஊற்றிவிட்டாய்” என்று உருக்கமாக தெரிவித்தார்..
-
நன்றி:ஆந்தை ரிப்போர்ட்டர்