2005-ம் ஆண்டிற்கு முந்தைய ரூபாய் நோட்டுகள் மதிப்பில் மாற்றம் இல்லை...

டெல்லி: 2005-ம் ஆண்டிற்கு முந்தைய ரூபாய் நோட்டுகளை திரும்ப பெறும் அறிவிப்பால் அதன் பண மதிப்பில் மாற்றம் இருக்காது என்று ரிசர்வ் வங்கி கவர்னர் ரகுராம் ராஜன் விளக்கமளித்துள்ளார். கறுப்பு பண பதுக்கலை தடுக்கும் வகையில் 2005ம் ஆண்டிற்கு முன்பு வரை அச்சிடப்பட்ட ரூபாய் நோட்டுகள் அனைத்தும் வாபஸ் பெறப்படும் என்று ரிசர்வ் வங்கி அறிவித்திருந்தது. வரும் ஏப்ரல் 1-ம் தேதி முதல் பழைய ரூபாய் நோட்டுகளை வங்கிகளில் கொடுத்து மாற்றிக் கொள்ளலாம் என்றும் ரிசர்வ் வங்கி தெரிவித்திருந்தது. இந்த பணி தொடர்ச்சியாக 3 மாதம் வரை நடைபெறும் என்றும் அறிவிக்கப்பட்டது.

ரிசர்வ் வங்கியின் இந்த திடீர் அறிவிப்பால் பொது மக்கள் மத்தியில் குழப்பம் ஏற்பட்டது. பழைய ரூபாய் நோட்டுகளை மாற்றாவிட்டால் அது செல்லாது ஆகிவிடுமோ என்ற அச்சமும் மக்கள் மத்தியில் நிலவியது. பொதுமக்களின் குழப்பத்திற்கு தீர்வு காணும் வகையில் டெல்லியில் நிகழ்ச்சி ஒன்றில் பங்கேற்ற ரிசர்வ் வங்கி கவர்னர் ரகுராம் ராஜன் இதற்கு விளக்கமளித்தார். இது குறித்து பேசிய அவர், 2005-ம் ஆண்டிற்கு முன்பு அச்சிடப்பட்ட ரூபாய் நோட்டுகள் அனைத்தும் தொடர்ந்து புழக்கத்தில் இருக்கும் என்றும் இதில் எவ்வித மாற்றமும் இல்லையென்றும் கூறினார். இந்த அறிவிப்பிற்கும் பொது தேர்தலுக்கும் எந்த தொடர்பும் இல்லையென்றும் கூறினார். இந்த விவகாரத்தில் ரிசர்வ் வங்கியின் அறிவிப்பு பல விதமாக புரிந்து கொள்ளப்பட்டதாகவும் குறிப்பிட்டார். பாதுகாப்பு அம்சங்கள் குறைந்த ரூபாய் நோட்டுகளுக்கு மாற்றாக, பாதுகாப்பு அம்சங்கள் நிறைந்த ரூபாய் நோட்டுகளை வெளியிடுவதே இதன் நோக்கம் என்றும் அவர் விளக்கமளித்துள்ளார்.
thinakaran