ஆபிரகாம் லிங்கன் கூறிய உவமைக் கதை !

**krishnaamma** · **krishnaamma** Thu Jan 09, 2014 11:19 am

மன்னன் ஒருவன் வேட்டையாடப் புறப்படுவதற்கு முன்பு தனது அமைச்சரை நோக்கி ""மழை வருமா?'' என்று கேட்டான். ""வராது'' என்று சொன்னவுடன் வேட்டைக்குப் புறப்பட்டான்.

போகிற வழியில் ஒரு குடியானவன் கழுதை மேல் வந்து கொண்டிருந்தான். மன்னனைக் கண்டதும் ""கொஞ்ச நேரத்தில் மழை வரும்'' என்று அவன் எச்சரித்தான். அதைப் பொருட்படுத்தாமல் சென்ற மன்னன், வேட்டையாடிக் கொண்டிருந்தபோது பலத்த மழை பெய்து தொப்பலாக நனைந்து விட்டான்.

திரும்பும் வழியில் அதே குடியானவனைச் சந்தித்த மன்னன் ""மழை வரும் என்று உனக்கு எப்படித் தெரியும்?'' என்று கேட்டான்.
உடனே குடியானவன் ""எனக்குத் தெரியாது. ஆனால், என் கழுதைக்குத் தெரியும். மழை வருகிற சமயங்களில் அது தன் காதுகளை முன்னுக்கு நீட்டிக் கொள்ளும். நான் தெரிந்து கொள்ளுவேன்'' என்றான்.

அரண்மனை திரும்பிய மன்னன் அமைச்சரைப் பதவியிலிருந்து நீக்கிவிட்டு, அந்தக் குடியானவனின் கழுதையை அமைச்சராக்கினான்.

கதையை முடித்த அமெரிக்க ஜனாதிபதி லிங்கன் "அதில்தான் மன்னன் ஒரு தவறு செய்துவிட்டான். ஏனெனில் அது முதற்கொண்டு எல்லாக் கழுதைகளும் ஏதாவது பதவி வேண்டும் என்று அலைகின்றன'' என்றார்.

-முக்கிமலை நஞ்சன்