சுசீந்திரம் கோயிலில் ஜனவரி 1-இல் ஆஞ்சநேயர் ஜயந்தி விழா !

சுசீந்திரம் அருள்மிகு தாணுமாலய சுவாமி கோயிலில் எழுந்தருளியுள்ள 18 அடி உயர ஆஞ்சநேயருக்கு ஜயந்தி விழா புதன்கிழமை (ஜன. 1) நடைபெறுகிறது. இதையொட்டி பக்தர்களுக்கு வழங்குவதற்காக ஒரு லட்சம் லட்டுகள் தயார் செய்யப்படுகின்றன.



குமரி மாவட்டத்தில் மிகவும் பிரசித்தி பெற்ற கோயிலான சுசீந்திரம் தாணுமாலய சுவாமி கோயிலில் 18 அடி உயர ஆஞ்சநேயர் சுவாமி எழுந்தருளி உள்ளார். ஆஞ்சநேயர் பிறந்த மார்கழி மூல நட்சத்திரத்தை ஆண்டுதோறும் ஆஞ்சநேயர் ஜயந்தி விழாவாக பக்தர்கள் வழிபட்டு வருகின்றனர்.

இந்த ஆண்டு ஜயந்தி விழா ஜனவரி 1-ஆம் தேதி இதை முன்னிட்டு டிசம்பர் 31-ஆம் தேதி அதிகாலை 5 மணிக்கு கணபதி ஹோமமும், தொடர்ந்து நீலகண்ட விநாயகர் மற்றும் தாணுமாலய சுவாமிக்கு காலை 11.30 மணிக்கு அபிஷேகமும் உச்சிகால தீபாராதனையும் நடைபெறுகிறது. மாலை 6 மணிக்கு உதய மார்த்தாண்ட விநாயகருக்கும், காலபைரவருக்கும் தீபாராதனை நடைபெறுகிறது.

ஜனவரி 1-ஆம் தேதி அதிகாலை 4 மணிக்கு ராமபிரானுக்கு அபிஷேகமும், காலை 6 மணிமுதல் ஆஞ்சநேயர் சுவாமிக்கு பால், தயிர், சந்தனம், குங்குமம், களபம், எலுமிச்சை சாறு, பஞ்சாமிர்தம், மாதுளை, பன்னீர், தேன், விபூதி, இளநீர் உள்ளிட்ட 16 வகையான நறுமணப் பொருள்கள் அடங்கிய அபிஷேகமும் நடைபெறுகிறது. இதில் பால் அபிஷேகத்துக்காக 10 ஆயிரம் லிட்டர் பால் பயன்படுத்தப்படுகிறது.

பகல் 12 மணிக்கு ஆஞ்சநேயருக்கு அலங்கார தீபாராதனை நடைபெறுகிறது. தொடர்ந்து பக்தர்களுக்கு பிரசாதமாக லட்டு, வடை, பஞ்சாமிர்தம், விபூதி, குங்குமம் வழங்கப்படுகிறது.



காலை 10 மணி முதல் இரவு 8 மணி வரை கோயில் கலையரங்க மைதானம், சுசீந்திரம் எஸ்.எம்.எஸ்.எம். பள்ளி மைதானத்தில் பக்தர்களுக்கு வடை, பாயாசத்துடன் அன்னதானம் வழங்கப்படுகிறது.

மாலை 6 மணிக்கு ராம ஆஞ்சநேயர் பக்தர்கள் குழுவினரின் பஜனையும், இரவு 7 மணிக்கு ராமபிரான், ஆஞ்சநேயருக்கு பிச்சி, மல்லி, ரோஜா, தாமரை, மரிக்கொழுந்து, அரளி உள்ளிட்ட பூக்களால் அபிஷேகமும் நடைபெறுகிறது. இரவு 11 மணிக்கு அலங்கார தீபாராதனை நடைபெறுகிறது.

ஜயந்தி விழாவையொட்டி பக்தர்களுக்கு வழங்குவதற்காக சுமார் 1 லட்சம் லட்டுகள் தயார் செய்யப்படுகின்றன.

இதற்கான ஏற்பாடுகளை கோயில் நிர்வாகத்தினரும், ராமஆஞ்சநேய பக்தர்கள் அறக்கட்டளையினரும் இணைந்து செய்து வருகின்றனர்.