தகவல்கள் 3

உயர்ந்த அறிவியல்!

""எல்லா அறிவியல்களிலும் உயர்ந்தது எது?'' என்று ஒருவர் இந்தியாவின் முன்னாள் குடியரசுத் தலைவர் ராதாகிருஷ்ணனிடம் கேள்வி எழுப்பினார். மிகச் சிறந்த தத்துவ அறிஞரான அவர், அந்தக் கேள்விக்கு அளித்த பதில் - ""எல்லா அறிவியல்களிலும் உயர்ந்தது ஒருவன் தன்னைப் பற்றி அறியும் அறிவியல் ஆகும்''.


மாவீரன் சிலை!

மாவீரன் அலெக்ஸôண்டரைப் பார்க்க ஒரு விருந்தினர் வந்தார். அவரைத் தன் மாளிகையில் தங்க வைத்து நன்கு உபசரித்தார் அலெக்ஸôண்டர்.
பின்னர் தன் தோட்டத்திற்கு அழைத்துப் போனார். இருவரும் தோட்டத்தைச் சுற்றி வந்தார்கள். அங்கு நிறைய சிலைகள் இருந்தன. ஒவ்வொரு சிலையின் அருகிலும் விருந்தினர் நிற்பார். அலெக்ஸôண்டர், அதன் வரலாற்றைக் கூறுவார். இவ்வாறு ஒவ்வொரு சிலையாகப் பார்த்துக்கொண்டே தோட்டத்தின் கடைசிக்கு வந்து விட்டார்கள்.
விருந்தினர் அலெக்ஸôண்டரைப் பார்த்து ""இத்தனை வீரர்கள் சிலை இருக்கும்போது உங்களுடைய சிலை மட்டும் ஏன் இல்லை?'' என்றார்.
""இங்கு என் சிலையைப் பார்த்து இது யாருடைய சிலை? என வருபவர்கள் கேட்பதைவிட மாவீரன் அலெக்ஸôண்டருடைய சிலை ஏன் இங்கு இல்லை? என்று கேட்பதையே நான் விரும்புகிறேன்'' என்றார் அந்த மாவீரன்.


ருசி!
தண்டி யாத்திரையைக் காந்தியடிகள் மேற்கொண்டபோது, தமிழ்நாட்டில் ராஜாஜி தலைமையில் "வேதாராண்யம்' நோக்கி உப்புச் சத்தியாக்கிரகம் நடத்தத் தொண்டர்கள் புறப்பட்டுச் சென்றனர். அவர்களை யாரும் வரவேற்கவோ, உபசரிக்கவோ கூடாது என ஆங்கில அரசு தடை விதித்திருந்தது. அப்படியும் ஒரு காந்தியவாதி ஓர் இரவு தன் வீட்டில் அனைவருக்கும் உணவு அளித்தார்.
பசியோடிருந்த தொண்டர்கள் ஆவலுடன் உணவு உண்டனர். அப்போது ஒரு தொண்டர், ""இந்தப் பாயசத்தில் இன்னும் கொஞ்சம் இனிப்பு சேர்த்திருந்தால் நன்றாக இருந்திருக்கும்'' என்றார்.
அவரருகே இருந்த ராஜாஜி சட்டென அவரைப் பார்த்து, ""இப்படி நாக்கு ருசி உடையவர்களெல்லாம் சத்தியாக்கிரகப் போராட்டத்திற்குத் தேவையில்லை'' எனக் கூறி அவரை வெளியில் கொண்டு போய் விட்டுவிட்டார்.

dinamani