2 பெண்கள் பாலியல் பலாத்காரம்: நடவடிக்கை எடுக்காத சப்-இன்ஸ்பெக்டர் சஸ்பெண்ட்!

காரைக்கால்: காரைக்காலில் இரு பெண்களை பாலியியல் பலாத்காரம் செய்தவர்கள் மீது நடவடிக்கை எடுக்காத போலீஸ் சப்-இன்ஸ்பெக்டர், 1 போலீசாரும் சஸ்பெண்ட் செய்யப்பட்டுள்ளனர்.

காரைக்காலை ஒட்டிய தமிழக எல்லை பகுதியைச் சேர்ந்த பெண் ஒருவர், தனது காதலனுடன் கிறிஸ்துமஸ் விழா கொண்டாடுவதற்காக நேற்று இரவு காரைக்கால் வந்துள்ளார். அவருடன் அவரது தோழியும் வந்திருக்கிறார். அந்தப் பெண் தனது காதலனுடன் பேசிக்கொண்டு இருக்கும்போது, காதலனின் நண்பர்கள், காதலியுடன் வந்த பெண்ணை வலுக்கட்டாயமாக பாலியல் பலாத்காரம் செய்துள்ளனர். இதை  பார்த்த அதே பகுதியை சேர்ந்த சில வாலிபர்கள் இரண்டு பெண்களையும் மிரட்டி பாலியல் பலாத்காரம் செய்துள்ளனர். இதையறிந்த அப்பகுதி மக்கள் போலீசாருக்கு தகவல் கொடுத்துள்ளனர்.

இதையடுத்து, சம்பவ இடத்திற்கு போலீசார் வருவதற்குள் அந்த இரு பெண்களும் தலைமைறைவாகி விட்டனர். வாலிபர்கள் அனைவரும் குடிபோதையில் இருந்ததால், இன்று காலையில் அவர்களிடம் விசாரணை நடத்தியுள்ளனர். விசாரணையில், குற்ற சம்பவத்தில் எம்.எல்.ஏ. உறவினர் ஒருவர் இருந்ததாக கூறப்படுகிறது. இதனால், போலீசார் வழக்குப் பதிவு செய்யவில்லையாம். போலீசார் வழக்கு பதிவு செய்யாததால், தொடர்ந்து இதுபோன்ற பலாத்கார சம்பவங்கள் காரைக்கால் பகுதியில் நடைபெறுவதாக அப்பகுதி மக்கள் புதுச்சேரி டி.ஜி.பி. அலுவலகத்திற்கு தகவல் கொடுத்துள்ளனர்.

இதையடுத்து, புதுச்சேரி டி.ஜி.பி., நேரில் வந்து பாலியியல் வழக்கு குறித்து குற்றவாளிகளை கைது செய்ய உத்தரவிட்டதன் பேரில் ஏழு பேர் மீதும் வழக்கு பதிவு செய்து, அவர்களை கைது செய்துள்ளனர். குற்றவாளிகள் மீது வழக்கு பதிவு செய்யாமலும், கைது செய்யாமலும் அலட்சியம் காட்டிய உதவி ஆய்வாளர் உட்பட போலீசார் ஒருவரும் இடைநீக்கம் செய்யப்பட்டுள்ளனர்.

கிறிஸ்துமஸ் விழாவை தனது காதலுனுடன் கொண்டாடுவதற்காக, காரைக்காலுக்கு சென்ற பெண்ணும், அவரது தோழியும் பாலியியல் பலாத்காரம் செய்யப்பட்டிருப்பது காரைக்கால் பகுதி மக்களிடையே பெரும் பரபரப்பை ஏற்படுத்தியுள்ளது.