டிசம்பர் டார்ச்சர்கள்!

டிசம்பர் மாதம் வந்தாலே டரியல்தான் பாஸ். மார்கழி மாதக் குளிர், ஃப்ரீசருக்குள் குத்தவெச்ச எஃபெக்ட் கொடுக்குதுன்னா, அதே மார்கழி யில் நாம சந்திக்கிற அட்ராசிட்டீஸ் இருக்கே. அய்யய்ய்யோ!

ஜனவரி மாதம் புத்தகக் கண்காட்சி வந்துவிடுவதால், டிசம்பரில் ஃபேஸ்புக்கே ஜாம் ஆகிவிடுகிறது. எங்கெங்கு திரும்பினும் கவிதைக் கறிவேப்பிலைகள், நாவல் நவ்வாப்பழங்கள் என சந்தைக்கடை எஃபெக்ட்தான். முகநூலின் புண்ணியத்தால் தடி எடுத்தவன் எல்லாம் தண்டல்காரன். ஒரே கருத்துக் குத்துகளாக குத்தி எடுத்துவிடுகிறார்கள்.

அதில் நிறைய லைக்ஸ் வாங்கியவர்கள் கண்களில் 1,000 வாட்ஸ் பல்பு. 'நல்ல பப்ளிஷர் கிடைச்சா, பிம்பிலிக்கி பிலாப்பிதான்’ என்பது அவர்களின் மைண்ட் வாய்ஸ். வெறித்துப்பார்க்கும் புரொஃபைல் போட்டோ வைத்திருந்தாலோ, மொக்கைக் கவிதைகளை ஸ்டேட்டஸாகப் போட ஆரம்பித்திருந்தாலோ அந்த ஆள் புத்தகம் போடப் போகிறார் என அர்த்தம். இப்போதெல்லாம், 'எங்கே இந்த ஆளும் ஒரு கவிதைத் தொகுப்பு போட்ருவாரோ’ எனப் பதறவைப்பது வாடிக்கையாகிவிட்டது.

ஒண்ணுங் கீழ் ஒண்ணா எழுதினாலே கவிதைதான் என நம்மைத் தெறிக்கவைக்கிறார்கள். கொஞ்சம் அஜால் குஜால் கதைகளோடு தத்துவக் குத்துகளையும் சரிவிகிதத்தில் கலந்து முடிவில்லாத கதைகளை எழுதி வாசக சாமர்த்தியத்தை அலசிக் காயப்போடுகிறார்கள் சிலர்.

வடைச்சட்டியான், தயிர் வடையான், அஜால் குஜாலன் என எதையாவது புனைப்பெயர் வைத்துக்கொண்டு முகநூலில் வேண்டுமென்றே பப்ளிசிட்டி பத்த வைப்பார்கள் இன்னும் சிலர். ஸோ, டிசம்பர் மாதத்தில் ஃபேஸ்புக் பக்கம் போகாமல் இருப்பதே உங்கள் கண்ணுக்கும் கருத்துக்கும் நல்லது!

'மார்கழி மாசம் வீடு வாடகைக்கு விடக் கூடாது... அது பீடை மாசம்’ என எந்தப் பக்கி கிளப்பிவிட்டான்னே தெரியலை. சபிக்கப்பட்ட மாதமாக மார்கழி அமைந்துவிட்டது. மார்கழி மாசத்தில் வீடு தேடி சென்னையில் அலைபவனுக்கு, 'நெஞ்சே எழு’ பாடலைத்தான் டெடிகேட் செய்யணும் பாஸ். போதாக்குறைக்கு சுப காரியங்கள் செய்யக் கூடாது. நல்ல விஷயங்கள் நடக்கக் கூடாது என 1,008 கண்டிஷன்ஸ் போடுவார்கள்.

கோலம் போடுவது தமிழ்க் கலாசாரம்தான் பாஸ். ஒரு காலத்துல அப்படியே பன்னீர் புஷ்பங்களாய் தெருவெங்கும் குனிந்து கோலம்போட்ட குமரிப்பெண்கள் இப்போது என்ன ஆனார்கள்? ராத்திரி தூங்கப் போவதற்கு முன்பே கோலத்தைப் போட்டுவிட்டு 9 மணி வரை தூங்கும் ஃபிகர்களைக் கருடபுராணத்தில் தண்டிக்கலாமா பாஸ்? சரி... ராத்திரிக்காச்சும் சைட் அடிக்கலாம் என ரவுண்ட்ஸ் கிளம்பும் பசங்களுக்கு இப்போதைய டிரெண்ட் முகத்தில் அறைகிறது. ஆம். 60 ப்ளஸ்களில் இருப்பவர்களை கான்ட்ராக்ட்டுக்கு வைத்து மொத்தமாய் ஏரியா முழுக்க இன்ஸ்டன்ட் கோலம் போடவைத்துவிட்டார்கள் கிராதகிகள்!

இது எல்லாவற்றையும்விட காலையில் டிவி பொட்டியைத் தட்டினால், ஏதேனும் சாம்பு மாமா மார்கழி சீசனில் தாடை வீங்கப் பாடிக்கொண்டிருப்பார். பேசாமல் இன்னும் கொஞ்சம் தூங்கியிருக்கலாமோ என நினைக்கத் தோன்றும்!

டிசம்பரில்தான் எல்லா தீயப் பழக்கங்களையும் நம்ம ஆட்கள் உச்சத்தில் செய்ய ஆரம்பிப்பார்கள். அதற்கு அழகுக் காரணம் சொல்வார்கள். 'நியூ இயர்ல இருந்து புது மனுஷனா மாறப்போறேன்’ என்று. ஆனால், டிசம்பரில் அடித்ததெல்லாம் வார்ம்-அப் என்பது ஜனவரி 1 அன்று அதிகாலை அடிக்கும் சரக்கோற்சவத்தில் நிரூபிப்பார்கள். அப்புறம் என்ன, 'பழைய குருடி கதவைத் திறடி’ கதைதான். அடுத்த டிசம்பரிலும் சபதம் எடுப்பார்கள்.

அடுத்த டிசம்பரை நினைச்சா... ஆத்தீ இப்பவே பயந்துவருதே!

விகடன்