பெண் துணைத் தூதர் கைது: அமெரிக்காவின் செயலுக்கு இந்தியா கண்டனம்

**ayyasamy ram** · **ayyasamy ram** Sat 14 Dec 2013 - 9:48

First topic message reminder :

வீட்டுப் பணிப்பெண்ணுக்கு விசா பெற்றதில் முறைகேடு செய்ததாகக் குற்றம்சாட்டி அமெரிக்காவில் இந்திய துணைத் தூதர் தேவயானி கோப்ரகடேவை (39) அந்நாட்டுப் போலீஸார் பொது இடத்தில் கைவிலங்கிட்டு கைது செய்தனர். பிணைத் தொகையாக ரூ. 15 லட்சம் செலுத்திய பின்னர் அவர் ஜாமீனில் விடுவிக்கப்பட்டார்.

தூதரக உறவுக்கு சங்கடத்தை ஏற்படுத்தியுள்ள அமெரிக்க போலீஸாரின் இந்தச் செயலுக்கு இந்தியா கடும் அதிர்ச்சியும் கண்டனமும் தெரிவித்துள்ளது.

**சிவா** · **சிவா** Sun 15 Dec 2013 - 13:41

இங்கிலாந்தில் பெண் நோயாளியிடம் சில்மிஷம்: சென்னையில் படித்த டாக்டருக்கு ஓராண்டு தடை

இங்கிலாந்தில் பெண் நோயாளியிடம் ‘செக்ஸ்’ குறும்பில் ஈடுபட்ட சென்னை டாக்டருக்கு ஓராண்டு தடை விதிக்கப்பட்டது. அவரது பெயர் அங்கமுத்து அருண்கலைவாணன். அவர் கடந்த 1988–ம் ஆண்டு சென்னை பல்கலைக்கழகத்தில் படித்து டாக்டர் ஆனவர்.

தற்போது, இங்கிலாந்தில் பர்மிங்காம் நகரில் பி.எம்.ஐ. எட்க்பாஸ்டன் ஆஸ்பத்திரியில் மகப்பேறு டாக்டராக பணியாற்றி வருகிறார். அங்கு கடந்த 2010–ம் ஆண்டு அக்டோபர் மாதம், அவரிடம் ஒரு பெண் நோயாளி, மார்பக பரிசோதனைக்கு வந்தார். பரிசோதனை செய்யும் சாக்கில், டாக்டர் அருண்கலைவாணன் தவறாக நடந்து கொண்டார்.

இதுபற்றி அப்பெண், ஆஸ்பத்திரி நிர்வாகத்திடம் புகார் கூறினார். உடனே, அருண்கலைவாணன் மன்னிப்பு கேட்டார். இருப்பினும், இந்திய டாக்டர்களுக்கு இப்படித்தான் மார்பக பரிசோதனை பயிற்சி அளிக்கப்பட்டுள்ளது என்று ஆஸ்பத்திரி நிர்வாகம் சமாளிக்கப் பார்த்தது. அதுபற்றி ஒரு நர்சிடம் அந்த பெண் நோயாளி கேட்டபோது, அது பொய் என்று தெரிய வந்தது.

இதையடுத்து, இந்த விவகாரத்தை இங்கிலாந்து டாக்டர்கள் தீர்ப்பாயத்தில் அப்பெண் முறையிட்டார். தீர்ப்பாய விசாரணையில், டாக்டர் அருண்கலைவாணன் தவறாக நடந்திருப்பது உறுதி செய்யப்பட்டது.

இதையடுத்து, மருத்துவ தொழிலுக்கே அவமரியாதை ஏற்படுத்தி விட்டதாக கூறி, டாக்டர் அருண்கலைவாணன், ஒரு வருடம் மருத்துவ தொழில் செய்ய தீர்ப்பாயம் தடை விதித்தது. அதே சமயத்தில், அவரது சேவையை கருத்தில்கொண்டு, அவரது பெயரை இங்கிலாந்து மருத்துவ பதிவேட்டில் இருந்து நீக்கவில்லை.

**சிவா** · **சிவா** Sun 15 Dec 2013 - 13:42

சிங்கப்பூர் கலவரம்:மேலும் 2 தமிழர்கள் மீது வழக்கு

சிங்கப்பூரில் கடந்த ஞாயிற்றுக்கிழமை நடந்த ஒரு விபத்தில் சக்திவேல் குமாரவேலு என்ற தமிழர் உயிரிழந்தார். இதைத்தொடர்ந்து அங்கு ஏற்பட்ட கலவரத்தில் ஏராளமான வாகனங்கள் அடித்து நொறுக்கப்பட்டன. இந்த சம்பவத்தில் போலீசார் உள்பட 39 பேர் படுகாயமடைந்தனர். இது தொடர்பாக இந்தியர்கள் சிலர் கைது செய்யப்பட்டுள்ள நிலையில், 31 பேர் மீது வழக்கு தொடரப்பட்டு இருந்தது.

இந்தநிலையில் பழனிவேல் தாஸ்மோகன் (வயது 27) மற்றும் கருப்பையா சந்திரசேகர் (31) ஆகிய 2 தமிழர்கள் மீதும் தற்போது வழக்கு பதிவு செய்யப்பட்டுள்ளது. இத்துடன், கலவரம் தொடர்பாக வழக்குப்பதிவு செய்யப்பட்டுள்ள இந்தியர்களின் எண்ணிக்கை 33 ஆக உயர்ந்துள்ளது. இந்த வழக்கில் குற்றம் நிரூபிக்கப்பட்டால் சிங்கப்பூர் சட்டப்படி, அதிகபட்சமாக 7 ஆண்டு சிறை மற்றும் பிரம்படி தண்டனை வழங்கப்படும் என கூறப்படுகிறது.