சிங்கப்பூர் லிட்டில் இந்தியாவில் மதுவுக்குத் தடை!

**சிவா** · **சிவா** Wed Dec 11, 2013 8:52 pm

சிங்கப்பூரிலுள்ள லிட்டில் இந்தியா என்ற இடத்தில் கடந்த ஞாயிற்றுக் கிழமை இரவு நடந்த கலவரம் காரணமாக, இனி அந்த பகுதிகளில் மதுவுக்கு முழு தடை விதிக்கப்படும் என்று அறிவிக்கப்பட்டுள்ளது.

இந்த வார இறுதியில் இந்த தடை அமலுக்கு வரும் என்று அந்நாட்டில் இரண்டாம் உள்துறை அமைச்சர் எஸ்.ஈஸ்வரன் நேற்று செய்தியாளர்களிடம் தெரிவித்தார்.

அதே நேரத்தில், அந்த பகுதியில் எந்த நேரத்தில் மதுவை தடை செய்யலாம், எந்தெந்த பகுதிகளில் மதுவைத் தடை செய்யலாம் என்பது குறித்தும் காவல்துறையினர் ஆராய்ந்து வருவதாகவும் அவர் குறிப்பிட்டார்.

விபத்து நடந்ததால் தான் கலவரம் உருவானது என்று காரணம் கூறப்பட்டாலும், கலவரத்தில் ஈடுபட்டவர்கள் பலர் மது அருந்தி இருந்ததால் தான் இந்த பிரச்சனை இவ்வளவு பெரிய கலவரமாக உருவெடுத்தது என்றும் கூறப்படுகிறது.

**சிவா** · **சிவா** Wed Dec 11, 2013 8:57 pm

சிங்கப்பூர் கலவரம்: மேலும் 8 இந்தியர்கள் கைது! விசாரணை தீவிரம்!

லிட்டில் இந்தியா கலவரம் தொடர்பாக நேற்று மேலும் 8 பேர் கைது செய்யப்பட்டதோடு, தீவு முழுவதும் 10 க்கும் மேற்றபட்ட தங்குமிடங்களில் வாழும் 3,700 அந்நியத் தொழிலாளர்களிடமும் சிங்கப்பூர் காவல்துறை விசாரணை மேற்கொண்டு வருகின்றது.

இந்தியாவைச் சேர்ந்த அந்த 8 பேரும் 22 முதல் 38 வயதுடையவர்கள் என்று கூறப்படுகிறது. அதில் 3 பேர் நேற்று மதியம் 2.30 மணியளவில் நீதிமன்றத்தில் நிறுத்தப்பட்டனர்.

மேலும், கலவரத்தில் தொடர்புடையர்கள் கைது செய்யப்படலாம் என்று நேற்று நடந்த செய்தியாளர்கள் சந்திப்பில் காவல்துறை தெரிவித்தது.

இதனிடையே, கைது செய்யப்பட்ட இந்திய நாட்டைச் சேர்ந்த 24 பேர், நேற்று மதியம் நீதிமன்றத்தில் நிறுத்தப்பட்டனர். தற்போது அவர்கள் விசாரணைக்காக தடுத்து வைக்கப்பட்டுள்ளனர் என்பது குறிப்பிடத்தக்கது.

**M.M.SENTHIL** · **M.M.SENTHIL** Wed Dec 11, 2013 11:19 pm

மதுவினால், மதி இழந்து செய்த செயல். இப்பொது இந்தியாவை வெட்கப்பட வைத்துள்ளது.

**மாணிக்கம் நடேசன்** · 14/12/2009

கடுமையான தண்டனை தரவேண்டும். தமிழ் நாட்டிலும் இது போன்ற மதுவுக்கான தடை வரவேண்டும். அக்கா ஜெயலலிதா கொஞ்சம் கவனம் செலுத்துவாங்களா?

சதாசிவம் · சதாசிவம் Thu Dec 12, 2013 10:30 am

சிங்கப்பூர் முழுவதும் மதுவைத் தடை செய்யலாமே... சின்ன ஊரில் ஒரு சில தெருக்களே உள்ள லிட்டில் இந்தியாவில் தடை செய்தால்,, மதுவால் ஏற்படும் பிரச்சனை குறையுமா என்ன...இதையும் சிங்கப்பூர் சீனர்கள் பயன்படுத்தி அதிக விலை கொடுத்தால் தான் இந்தியர்களுக்கு மது வழங்கப்படும் என்று வியாபாரமாக்கினாலும் ஆச்சரியமில்லை.. பல இந்திய தொழிலாளிகள் ஆட்டுமந்தை போல் திறந்த வேன்களில் வேலைக்கு குறைந்த சம்பளத்துக்கு அழைத்து வருவதை இன்றும் காணலாம்...முதலில் அதை நிறுத்தச் செல்லுங்கள்.

தமிழ் நாட்டில் ஒருவர் குற்றம் இழைத்தால்,, குற்றம் இழைத்தவர்களை போலீஸ் தேடுகிறது என்று தான் செய்திகள் வெளியாகிறது..தமிழ்நாட்டுக் குற்றவாளிகளை போலீஸ் தேடுகிறது என்று சொல்லப்படுவதில்லை....

அது போல் இச்செய்திகளில் குற்றம் இழைத்தவர்களை போலீஸ் தேடுகிறது என்று சொல்லலாமே.....சிங்கப்பூர் இன்றைய சிங்கபூராக மாறுவதற்கு இந்தியர்களின் பங்கு பெரும்பங்கு...இதை எந்த சிங்கப்பூர்காரனும் மறுக்க மாட்டான்..ஒரு சிலர் தவறிழைக்கும் பொழுது, இதை எப்படி ஒரு சமுதாயத்தின் தவறாகப் பார்க்கின்றனர்..மீடியாக்கள்,, செய்திகளை எழுதுபவர்கள் சரியாக இருக்கவேண்டும்..ஒருவேளை அவர்களும் மது அருந்தி வேலையைச் செய்கிறார்களோ என்னவோ ??