சுவையான புளியோதரை செய்யும் முறை

vasudevan31355 · vasudevan31355 Tue Dec 10, 2013 10:38 am

புளியோதரை செய்யும் முறை

சுவையான புளியோதரை செய்யும் முறை Sl1452

ஆறு பேருக்கு

தேவையான பொருள்கள்

புளி - ஒரு பெரிய எலுமிச்சம்பழ அளவு

காய்ந்த மிளகாய் - 10

கொத்துமல்லி - 1 ஸ்பூன்

வெந்தயம் - 1 ஸ்பூன்

காய்ந்த எள்ளு - 1 ஸ்பூன்

பெருங்காயத்தூள் - தேவையான அளவு

கடலைப்பருப்பு - 2 டீஸ்பூன்

வறுகடலை - 1 பெரிய டீஸ்பூன்

முந்திரி - தேவையான அளவு

கறிவேப்பிலை - 2 இணுக்கு

நல்லெண்ணெய் - ஒரு குழிக்கரண்டிக்கும் மேல்.

செய்முறை:

புளியை தண்ணீரில் ஊறவைத்து நன்றாகப் பிழிந்து கெட்டியாக சாறு எடுத்து வைத்துக் கொள்ளவும். அதில் பெருங்காயத்தூளை தேவையான அளவுக்கு சேர்க்கவும். சிறிது மஞ்சள் தூளும் சேர்க்கவும்.

வேர்க்கடலையை தீய்ந்து போகாமல் சிறதளவு எண்ணெயில் பொறித்து எடுத்து வைத்துக் கொள்ளவும்.

முந்திரியையும் அதே போல லேசாக பதமாக அதிகம் சிவக்காமல் கொஞ்சம் எண்ணையில் வறுத்து எடுத்துக் கொள்ளவும்.

வாணலியை அடுப்பில் வைத்து மிகச் சிறிதளவு எண்ணெய் விட்டு தீயை சிம்மில் வைத்து முதலில் வெந்தயம், அடுத்து கொத்துமல்லி விதை, அடுத்து எள், அடுத்து கடலைப் பருப்பு (ஒரு ஸ்பூன் ), அடுத்து 5 காய்ந்த மிளகாய் இவற்றை சரியான பதத்தில் தனித்தனியாக வறுத்து வைத்துக் கொள்ளவும்.

பின் வறுத்த மசாலாப் பொருட்களை மிக்சியில் போட்டு ஒரு சுற்று சுற்றவும். மிகவும் நைசாக அரைக்க வேண்டாம். ஓரளவு அரைபட்டாலே போதுமானது. அரைத்த பொடியை ஒரு சிறு பாத்திரத்தில் எடுத்து வைத்துக் கொள்ளவும்.

பின் வாணலியில் ஒன்னரைக் குழிக்கரண்டி நல்லெண்ணெய் ஊற்றிக் காய வைக்கவும். எண்ணெய் காய்ந்ததும் ஒரு ஸ்பூன் கடலைப் பருப்பை போட்டு தாளிக்கவும். பின் 5 காய்ந்த மிளகாய்களை கிள்ளி எண்ணெயில் போடவும். அதனுடனேயே சிறிது கறிவேப்பிலை இலைகளைப் போடலாம். இப்போது கரைத்து வைத்த புளித்தண்ணீரை எண்ணெயில் உள்ள பொருட்களுடன் சேர்க்கவும். அடுப்பை மிதமாக எரிய விடவும்.

இதற்குள் சாதத்தை உதிரியான பதத்தில் வடித்துக் கொள்ளவும். சாதத்தை ஒரு தாம்பாளத்தில் கொட்டி அதில் ஒரு டேபிள் ஸ்பூன் நல்லெண்ணெய் சேர்த்து கையை சுத்தமாகக் கழுவிக் கொண்டு (கையுறை இருந்தாலும் அணிந்து கொள்ளலாம்) சாதத்தை கையால் எண்ணெய் ஓட்டுமாறு கிண்டிக் கொடுக்கவும். சாதம் நன்றாக ஆறட்டும்.

இதற்குள் புளித்தண்ணீர் கொதித்தவுடன் எண்ணெய் பிரிந்து மேலே தனியே வர ஆரம்பிக்கும். ஓரளவிற்கு கெட்டிப் பதம் வந்தவுடன் புளிக்காய்ச்சலை இறக்கி அதன் மேல் மேலும் சில கறிவேப்பிலை இலைகளைப் போடவும்.

தாம்பாளத்தில் கொட்டி வைத்துள்ள சாதத்தில் மீண்டும் சிறிதளவு நல்லெண்ணெய் ஊற்றி பின் காய்ச்சிய புளிக்குழம்பை பரவலாக ஊற்றவும். பின் அரைத்து வைத்துள்ள மசாலாப் பொடியை சாதத்திற்குத் தக்கவாறு தேவையான அளவிற்கு தூவவும். பின் சாதத்துடன் வறுத்த வேர்க்கடலை, முந்திரி இவைகளை சேர்க்கவும். சாதம், புளிக்காய்ச்சல், மசாலாப் பொடி, முந்திரி, வேர்க்கடலை, இவைகள் நன்றாக ஒன்று கலக்குமளவிற்கு கையாலோ அல்லது அன்னவெட்டியாலோ சாதத்தைக் நன்றாகக் கிளறி விடவும்.

இப்போது கமகமக்கும் அருமையான புளிசாதம் ரெடி. சும்மா அக்கம் பக்கத்தில் உள்ளவர்கள் உங்கள் புளிசாதத்தின் வாசனையைப் பார்த்து மோப்பம் பிடித்து உங்கள் வீட்டிற்கே வந்தாலும் வந்து விடுவார்கள். வீடே வாசனையில் தூக்கிவிடும்.

செய்து பார்த்து சொல்லுங்களேன்.