ஆன்ற குடிப்பிறப்பு!

""சலம்பற்றிச் சால்பில செய்யார் மாசற்ற
குலம் பற்றி வாழ்தும் என்பர்'' (குறள்-956)

மாசற்ற குடிப் பண்புடன் வாழ்வோம் என்று கருதி வாழ்வோர், வஞ்சனை கொண்டு தகுதியில்லாதவற்றைச் செய்யமாட்டார் என்பது குறள் விளக்கம். வள்ளுவன் வழிவந்த தலைவி ஒருத்தி, வஞ்சமில்லா நெஞ்சோடு ஒழுகும் காட்சி ஒன்றைக் குறுந்தொகை சித்திரிக்கிறது.

பரத்தையின் பால் சென்று மீண்ட தலைவன், தலைவியுடன் சேர, தோழியிடம் தூது அனுப்புகிறான். தலைவனின் செய்கை ஏற்றுக்கொள்ள முடியாத ஒன்றெனினும், தலைவி நற்குடிப் பிறந்த காரணத்தால் சம்மதிக்கிறாள்.

தலைவி கற்பொழுக்கத்தில் சிறந்த குடியிற் பிறந்தவள் ஆதலின், தலைவன் எப்பிழை செய்தாலும் ஏற்றுக்கொள்ளும் இயல்பினள் ஆவாள் என்பதை தோழி கூற்றாகப் புலவர் ஆலங்குடி வங்கனார் பாடியுள்ளார்.

""காலை எழுந்து கடுந்தேர் பண்ணி
வாலிழை மகளிர் தழீஇய சென்ற
மல்லல் ஊரன் எல்லினன் பெரிதென
மறுவருஞ் சிறுவன் தாயே
தெறுவது அம்மஇத்தினைப் பிறத்தல்லே'' (பா.45)

விடியலில் புறப்பட்டு விரைந்து செல்லும் தேரில் ஏறி, தூய அணிகலன்களை அணிந்த பரத்தையைத் தழுவுவதற்காகச் சென்ற வளம் பொருந்திய ஊர்த் தலைவன், மிகுந்த விளக்கமுடையவன் என்றெண்ணி, சிறுவனைப் பெற்ற தலைவி அவனை ஏற்றுக்கொள்வாள். ஆயினும், மனம் வருந்துவாள். இவ்வாறு மனம் கழலும் செயலை அவன் செய்தாலும், அச்செயலை மறந்து, மன்னித்து வாயில் மறுக்காது நேரும் பெண்பிறப்பாக இக்குடியில் பிறத்தல் துன்பம் தருவதாகும் என்று தோழி உணர்ந்து உருகுகிறாள்.

இப்பாடலின் வழியாக தோழி, தலைவியின் குடிப்பெருமையைப் புகழ்வதோடு, தலைவன் தன் செயலால் இழிவு பெற்றான் என்பதை நயமாகவும் நுட்பமாகவும் தெரிவிக்கிறாள். பரத்தையரின் அணிகலன்கள் தூயது எனினும், அவர்தம் உள்ளம் தூய்மையற்றது என்பதும், மகன் பெற்ற மகிழ்ச்சியை முழுதும் அனுபவிக்க இயலாது தலைவனின் தீங்கைப் பொறுத்தல் அவளின் குடிப்பிறப்பின் சிறப்பு என்பதும், தலைவன் என்னதான் மிகுந்த விளக்கமுடையவன் ஆயினும் பரத்தையிற் பிரிந்த தன் செய்கையினால் இழிநிலை அடைகிறான் என்பதும் இப்பாடலால் பெறப்படுகிறது. - மா.உலகநாதன் - தினமணி