வேகமாக பரவும் கோமாரி நோய்:2 மாதங்களில் 175 மாடுகள் பலி

ஈரோடு: ஈரோடு, கோவை, திருப்பூர் மாவட்டங்களில் கோமாரி நோய் வேகமாக பரவி வருகிறது. ஈரோடு மாவட்டத்தில் மட்டும் கடந்த 2 மாதங்களில் மட்டும், கோமாரி நோய் தாக்கி, 175 மாடுகள் பலியாகி உள்ளன.இதனால், விவசாயிகள் அச்சமும், நஷ்டமும் அடைந்துள்ளனர்.

அம்மை நோய்: மழைக் காலங்களில், மாடுகளை கோமாரி என்ற நோய் தாக்கும். இந்த நோய் தாக்கிய மாடுகளின் வாய் மற்றும் பாதங்களில் புண்கள் உருவாகும். சில நாட்களில் அவை இறந்துவிடும். விவசாயிகள் இந்த நோயை, மாடுகளுக்கு ஏற்படும் அம்மை நோய் என்று கூறுகி்றனர்.

தமிழகத்தில் உள்ள மாவட்டங்களில் பல இடங்களில் கோமாரி நோய் தாக்குதல் தென்பட்டாலும், ஈரோடு மாவட்டத்தில் அது அதிகமாக உள்ளது. கடந்த 2 மாதங்களில் மட்டும் இம்மாவட்டத்தில் 175 மாடுகள் கோமாரி தாக்குதலுக்கு பலியாகி உள்ளதாக மாவட்ட பால் உற்பத்தியாளர்கள் சங்கம் தெரிவித்துள்ளது.

சந்தைகள் மூடல்:

நோயை கட்டுப்படுத்த, கால்நடை பராமரித்து துறை சார்பில் பல்வேறு நடவடிக்கைகள் எடுக்கப்பட்டுள்ளன. ஒவ்வொரு கிராமத்திற்கும் கால்நடை மருத்துவர்கள் நேரில் சென்று, நோய் தாக்குதல் குறித்து சோதனை நடத்தி, தேவையான சிகிச்சைகளை அளித்து வருவாக அத்துறை தெரிவி்ததுள்ளது. மேலும், கோமாரி நோய் பரவுவதை தடுக்கும் வகையில், ஈரோடு மாவட்டத்தில் இயங்கி வந்த 5 மாட்டு சந்தைகள் சமீபத்தில் மூடப்பட்டன.

கோமாரி நோய் தாக்குதல் குறித்து கால்நடை பராமரிப்பு துறை அதிகாரி ஒருவர் கூறுகையில், 'தற்போது தேவையான அளவிற்கு நோய் தடுப்பு மருந்து ஸ்டாக் உள்ளது. விவசாயிகள் இந்த வாய்ப்பை பயன்படுத்திக் கொள்ளலாம்,' என்றார்.

ஈரோடு மாவட்டத்தில், கோமாரி நோயை தடுக்கும் வகையில், 121 மையங்கள் திறக்கப்பட்டுள்ளன. இவற்றில், முன்னெச்சரிக்கை நடவடிக்கையாக, தடுப்பூசிகள் போடப்பட்டு வருவதாக அ்ங்கிருந்து வரும் தகவல்கள் தெரிவிக்கின்றன.

விவசாயிகள் எதிர்பார்ப்பு:

தமிழக அரசு, மாநிலத்தின் பால் உற்பத்தியை அதிகரிப்பதற்காக இலவச கறவை மாடுகளை வழங்கி வருகிறது. இந்நிலையில், கால்நடை துறை சார்பில், போதிய அளவில் பராமரிப்பு, கவனிப்பு இல்லாத காரணத்தால், கோமாரி நோயின் தாக்குதலுக்கு உள்ளாகி, நூற்றுக்கணக்கான கறவைகள் மாடுகள் பலியாகி வருகின்றன. இந்நிலையில், கோமாரி நோய் தாக்குதலில் இருந்து கறவை மாடுகளை காப்பாற்றி மாநில அரசு போர்க்கால நடவடிக்கை எடுக்க வேண்டும் என, விவசாயிகள் எதிர்பார்க்கின்றனர்.

தினமலர்

கோமாரி நோய் ஒன்றும் புதிதல்ல மழை காலங்களில் கால்நடைகளுக்கு வரும் நோய்தான், நடமாடும் கால்நடை மருந்தகங்களில் மூலம் நோய்க்கு வைத்தியம் செய்யலாம் ஆனால் இந்த சேவை ஒழுங்காக நடந்தால் இறப்பு விகிதம் இந்த அளவுக்கு இருக்காது. இந்த காலத்துல ஆடுமாடு வல்ர்க்கறதே பெரிய விஷயம் இதுல மாடுகள் இறந்தால் விவசாயிகள் என்ன பண்ணுவார்கள் பாவம்.