டயமாயிடுச்சு, ரயில் கிளம்பணும்! - தடாலடி இன்ஸ்பெக்டர் - வெளுத்து வாங்கிய வைகோ!

**சிவா** · **சிவா** Sun Nov 17, 2013 11:05 am

மதுரை போலீஸாரால் 'ஆல் இன் ஆல் அழகுராஜா’ என்று அழைக்கப்படுபவர் நுண்ணறிவு பிரிவின் ஆய்வாளர் பாலசுப்பிர மணியன். அண்மையில் வைகோவை வாலன்ட்ரியாக வம்புக்கு இழுத்து வாங்கிகட்டிக் கொண்டார் இன்ஸ்பெக்டர் பாலசுப்பிரமணியன்.

அவர் அப்படி என்ன செய்தார்?

உளவுத் துறை மற்றும் மதுரையில் உள்ள முக்கிய போலீஸ் அதிகாரிகளிடம் பேசியபோது, ''கோழிக் கூவித்தான் பொழுது விடிகிற மாதிரிதான் இந்த பாலசுப்பிரமணியத்தின் நினைப்பும். தெற்கு வாசல் இன்ஸ்பெக்டரான இவர், மதுரை மாநகர் நுண்ணறிவுப் பிரிவுக்கு மாற்றப்பட்ட பிறகு ஆட்டம் ஆரம்பம் ஆனது. தான்தான் மதுரையின் ஆக்டிங் கமிஷனர் என்று சொல்லிக்கொண்டு கமிஷனர் வர வேண்டிய முக்கியமான இடங்களுக்கும் முக்கியச் சம்பவ இடத்துக்கும் ஸ்பாட் விசிட் செய்வார். ஐ.பி.எஸ். அதிகாரிகளான டெபுடி கமிஷனர், அசிஸ்டன்ட் கமிஷனர்களுக்கே உத்தரவு போடுவார். அவர்களும் வேறு வழியில்லாமல் அவரிடம் பம்மி நடந்துகொள்வார்கள். கமிஷனருக்கும் அவருக்கும் அவ்வளவு நெருக்கம். கமிஷனர் வீட்டிலேயே எப்போதும் கிடப்பார் இந்த பாலசுப்பிரமணியன். கமிஷனர் பார்க்க வேண்டிய கோப்புகள், பரிந்துரை கோப்புகள் என எல்லாமே இவரை மீறிப்போகாது. கேட்டால், 'பாலு அளவுக்கு யாருக்கும் ஆங்கிலம் தெரியவில்லை. எனவே, தமிழ் தெரியாத கமிஷனர்... பாலுவை வைத்து எல்லாவற்றையும் டீல் பண்ணுகிறார்’ என்கிறார்கள்.

சமீபத்தில் காமன்வெல்த் மாநாட்டுக்கு எதிராக மதுரையில் ம.தி.மு.க. சார்பில் வைகோ ரயில் மறியல் போராட்டம் செய்தார். உயரதிகாரியான புருஷோத்தமன், 'போராட்டத்தை எப்போது முடிப்பீர்கள்?’ என வைகோவிடம் கேட்டார். 'இப்போதைக்கு போலீஸ் வர வேண்டாம். சிறிது நேரத்தில் நாங்களே கைதாகிவிடுகிறோம். ம.தி.மு.க-வின் 20 ஆண்டு கால அரசியலில் மக்களை இடையூறு செய்தோ, கடைகளை அடைத்தோ, ரயிலை மறித்தோ போராட்டம் பண்ணியது இல்லை. காவலர்கள் என் நண்பர்களே. நான் அழைக்கும்போது மட்டும் வாருங்கள்’ என வைகோ தெரிவித்தார். சிறிது நேரத்தில் இன்ஸ்பெக்டர் பாலசுப்பிரமணியன், டெபுடி கமிஷனர் தமிழ் சந்திரனோடு போய், 'டயமாயிடுச்சு, ரயில் கிளம்பணும்’ என்று வைகோவிடம் சொன்னார். கடுப்பான வைகோ, 'உளவுத் துறைக்கு இங்கு என்ன வேலை? உங்களை நான் அழைத்தேனா? ஏற்கெனவே நான் சொல்லிவிட்டேனே... அப்புறம் ஏன் அவசரப்படுத்துகிறீர்கள். நீங்கள் சிங்களவனின் கைக்கூலியா? உங்க உடம்பில் தமிழ் ரத்தம் ஓடவில்லையா? தமிழன்தானே? கொத்துகொத்தாய் இறந்தப் பச்சைக் குழந்தைகள் உன் உடன்பிறப்பாக இருந்திருந்தால் சும்மா இருப்பாயா?

சீனியர் ஆபீஸர்களே சும்மா இருக்கும்போது ஜூனியர் ஆபீஸரான உங்களுக்கு இங்கு என்ன வேலை? இந்த உளவு வேலைகளை எல்லாம் ஜெயலலிதாவிடம் வைத்துக்கொள். இந்தப் பூச்சாண்டிகளுக்கெல்லாம் நான் பயப்பட மாட்டேன்’ என்று கோபப்பட்டார். உடனே பாலசுப்பிரமணியன், 'நானும் தமிழ்நாட்டில்தான் இருக்கிறேன்.. நீங்களும் தமிழ்நாட்டில்தான் இருக்கிறீர்கள்’ என்று புலம்பியபடியே அந்த இடத்தைவிட்டு நகர்ந்தார்'' என்று சொன்னார்கள்.

பொதுவாக உளவுத் துறை போலீஸார், என்ன நடக்கிறது என்றுதான் பார்ப்பார்களே தவிர, எதிலும் மூக்கை நுழைக்க மாட்டார்கள். ஆனால், பாலசுப்பிரமணியனின் செயல்பாடு எல்லா விஷயத்திலும் அத்துமீறுவதாக பொருமல் அதிகம் கேட்க ஆரம்பித்துள்ளது.

இன்ஸ்பெக்டர் பாலசுப்பிரமணியனிடம் பேசினோம். ''அதுபற்றி சொல்வதற்கு இல்லை. என்னைப் பற்றி தவறாகச் சித்திரிக்கிறார்கள். நான் எல்லோரிடமும் நண்பராகத்தான் பழகுகிறேன்'' என்றார்.

அப்படி இருந்தால் இப்படி ஏன் சொல்லப் போறாங்க?

- சண்.சரவணக்குமார் @ விகடன்