உலக பாரம்பரியம் கொண்ட பூக்கள் பள்ளத்தாக்கு

**சிவா** · **சிவா** Wed Nov 13, 2013 12:03 pm

மகாராஷ்டிராவின் சதாரா நகரிலிருந்து 25-வது கிலோமீட்டரில் காஸ் பதார் என்ற உலக (யுனெஸ்கோ) பாரம்பரிய பூமி உள்ளது. இதனை பூக்களின் பள்ளத்தாக்கு என அழைக்கின்றனர். இது ஒரு நீண்ட பீடபூமி.

இந்தப் பகுதி வந்ததுமே எல்லா வாகனங்களும் நிற்கும். கைகளில் காமிராவை எடுத்துக்கொண்டு, பயணிகள், "ஆஹா' என கூறியபடி ஓடுவர்.

இந்தப் பள்ளத்தாக்கைப் பராமரிக்க வேண்டியிருப்பதால் 10 ரூபாய் நுழைவுக் கட்டணம் வசூலிக்கப்படுகிறது. நுழைந்துவிட்டால், கிட்டத்தட்ட நவம்பர் கடைசி வரை ""எங்கெங்கு காணினும் காட்டுப்பூக்களடா...'' என பாட வேண்டியதுதான். அவ்வளவு மனநிறைவைத் தரும்.

இந்த பீடபூமியில் 300 வகையான காட்டுப்பூக்களைத் தரிசிக்கலாம். பூக்களை மிதித்துச் செல்லாமல் இருக்க, அழகான நடைபாதைகள் அமைக்கப்பட்டுள்ளன. ஆங்காங்கு அமர்ந்து ரசிக்க இருக்கைகளும் உள்ளன.