ஹையான் புயல் கோர தாண்டவம்

First topic message reminder :

பிலிப்பைன்சில் வரலாறு காணாத வகையில் ஹையான் புயல் கோர தாண்டவம் ஆடியதில் இதுவரை 10 ஆயிரத்துக்கும் மேற்பட்டோர் பலியாகி உள்ளனர். நூற்றுக்கணக்கானோர் காணவில்லை. மேலும் பலி எண்ணிக்கை உயரும் என்று அஞ்சப்படுகிறது. சாலைகளில் ஆங்காங்கே சடலங்கள் கிடப்பதால் தொற்று நோய் பரவும் அபாயமும் ஏற்பட்டுள்ளது. இதனால் நாடு முழுவதும் சோகம் ஏற்பட்டுள்ளது.

பிலிப்பைன்ஸ் நாட்டில் நேற்று முன்தினம் 30 ஆண்டுகளாக இல்லாத வகையில் மணிக்கு 275 கி.மீ வேகத்தில் ஹையான் சூறாவளி புயல் தாக்கியது. மத்திய பிலிப்பைன்ஸ் பகுதியில் உள்ள லெதே மாகாணத்தை புயல் தாக்கியது. இதில் மாகாணத்தின் 80 சதவீதம் சேதமடைந்துள்ளது. ஹையான் புயல் காரணமாக கடல் அலைகள் 6 மீட்டர் உயரத்துக்கு சீறி பாய்ந்தன. மழை மற்றும் வெள்ளம் காரணமாக லெதே மாகாணம் முழுவதும் கடுமையாக பாதிக்கப்பட்டுள்ளது.

கடற்கரையில் இருந்து 1 கிமீ தொலைவில் உள்ள அனைத்து ஊர்களும் முற்றிலுமாக கடலால் அரித்து செல்லப்பட்டு விட்டது. சாலைகள் முற்றிலுமாக துண்டிக்கப்பட்டுவிட்டன. மரங்கள், மர வீடுகள் வேரோடு சாய்ந்தன. லட்சக்கணக்கான மக்கள் பாதுகாப்பான இடங்களுக்கு அப்புறப்படுத்தப்பட்டுள்ளனர். தொலை தொடர்பு கட்டமைப்புகள் பலத்த சேதம் அடைந்தன.

இந்த புயலில் ஆரம்பத்தில் 100 பேர் பலியானதாக நேற்று தகவல் வெளியானது. ஆனால், மாலைக்குள் 1200 பேர் இறந்ததாக தகவல்கள் தெரிவித்தன. இந்நிலையில் லெதே மாகாணத்தில் மட்டும் 10 ஆயிரம் பேர் வரை பலியானதாக அரசு அதிகாரப்பூர்வமாக இன்று தெரிவித்துள்ளது. பலர் காணாமல் போயுள்ளனர். இதனால் பலி எண்ணிக்கை உயரும் என்று அஞ்சப்படுகிறது.

இந்நிலையில் நேற்று இரவு அதிகாரிகளுடன் மாகாண கவர்னர் அவசர ஆலோசனை நடத்தி, மீட்பு பணிகளை முடுக்கி விட உத்தரவிட்டார். இதையடுத்து ஹெலிகாப்டர் மூலம் உணவு பொட்டலங்கள் வீச ஏற்பாடுகள் செய்யப்பட்டுள்ளன. மின்சாரம் துண்டிக்கப்பட்டுள்ளதால் அந்த பகுதி முழுவதும் முற்றிலுமாக முடங்கியுள்ளது. முகாம்களில் சுமார் 2 லட்சத்து 20 ஆயிரம் பேர் வரை தஞ்சம் அடைந்துள்ளனர்.

பிலிப்பைன்சை தாக்கியது புயல்களில் 5வது பிரிவை சேர்ந்த கொடூர சூறாவளி என அமெரிக்க நிபுணர்கள் தெரிவித்துள்ளனர். மணிலாவில் இருந்து சுமார் 580 கி.மீ தொலைவில் அமைந்துள்ள இந்த பகுதியை ஹெலிகாப்டரில் இருந்து பார்க்கும் போது சுனாமி தாக்கி முற்றிலுமாக அழிந்துள்ளதை போன்று உள்ளது. சாலைகளில் ஆங்காங்கே சடலங்கள் சிதறி கிடக்கின்றன. இடிபாடுகளில் சிக்கி பலர் இறந்துள்ளனர். இதனால் தொற்று நோய் பரவும் அபாயமும் ஏற்பட்டுள்ளது.

இதுகுறித்து தாக்லோபான் நகர நிர்வாகி டெக்சான் ஜான் கூறுகையில், தொடர்ந்து பெய்து வரும் மழை காரணமாகவும், வெள்ளம் சூழ்ந்திருப்பதாலும் மீட்பு பணிகளை செய்ய இயலாத நிலை காணப்படுகிறது. வீடுகளிலும், தெருக்களிலும் குவியல் குவியலாக மனிதர்கள் இறந்து கிடக்கும் கோர காட்சி நெஞ்சை உலுக்குவதாக உள்ளது. உடல்களை மீட்கும் பணி விரைவு படுத்தப்பட்டுள்ளது என்றார்.

உலக உணவு திட்ட அதிகாரி கூறுகையில், ஐ.நா உதவியுடன் 40 டன் உணவு பொருட்கள் மற்றும் 1 லட்சத்து 20 ஆயிரம் பேருக்கு தேவையான அத்தியாவசியப் பொருட்களை வழங்க ஏற்பாடு செய்யப்பட்டு வருகிறது. அவசர கால தொலைபேசிகளை நிறுவவும் ஏற்பாடு செய்யப்பட்டு வருகிறது என்று தெரிவித்தார். பிலிப்பைன்சை தாக்கியுள்ள ஹையான் புயலால் ஏற்பட்டுள்ள சேதம் பெரும் சோகத்தை ஏற்படுத்தி உள்ளது.

புயலுக்கு ஏன் பிலிப்பைன்ஸ் 'பிடிக்கிறது'?

உலகின் நான்காவது மிகப்பெரிய சூறாவளியாகக் கருதப்படுகிறது 'ஹையான்' புயல்.

அமெரிக்காவின் தேசிய சமுத்திர மற்றும் வளிமண்டல நிர்வாக அமைப்பு, புயலை மூன்று வகைகளாகப் பிரிக்கிறது. ஆங்கிலத்தில் 'ஹரிகேன்' என்று சொல்லப்படுகிற புயல் அட்லாண்டிக் மற்றும் வடகிழக்கு பசிபிக் பகுதியிலிருந்தும், 'சைக்கோலன்' எனும் புயல் தென் பசிபிக் மற்றும் இந்தியப் பெருங்கடல் பகுதியிலிருந்தும், 'டைஃபூன்' எனும் புயல் வடமேற்கு பசிபிக் பகுதியிலிருந்தும் மையல் கொள்கின்றன. வெள்ளியன்று பிலிப்பைன்ஸ் நாட்டைத் தாக்கியது 'டைஃபூன்' வகையைச் சார்ந்த 'ஹையான்' புயல்தான்.

அமெரிக்காவின் 'டைஃபூன் எச்சரிக்கை இணைவு மையம்' வரையறுத்துள்ள படி, புவிப்பரப்பில் ஒரு விநாடிக்கு 60 மைல் வேகம் கொண்டு சுமார் ஒரு நிமிடம் வரை நீடித்திருக்கும் புயல் வகைகளை 'சூப்பர் டைஃபூன்' என்று அழைக்கிறார்கள்.

வெப்ப மண்டலப் புயலான ஹையான், இதுவரை இல்லாத அளவுக்கு நிலச்சரிவுகளையும் ஏற்படுத்தியுள்ளது. பிலிப்பைன்ஸில் இதற்கு முன்பு 1964-ல் 'சாலி' எனும் 'சூப்பர் டைஃபூன்' புயலும், 2011ல் 'வஷி', 2012ல் 'போஃபா' எனும் 'டைஃபூன்' புயல் வகைகளும் சூறையாடி இருக்கின்றன.

பிலிப்பைன்ஸில் மட்டும் அதிக அளவு இத்தகைய புயல் தாக்குவதற்குக் காரணம் அந்தப் பகுதி பசிபிக் பெருங்கடலை ஒட்டியுள்ளது. அவ்வப்போது இத்தகைய புயல் எழும்புவதற்கும், புயலின் வேகம் கூடுவதற்கும் பருவ நிலை மாற்றம்தான் முக்கியக் காரணம் என்று பிலிப்பைன்ஸ் அரசு தெரிவித்திருக்கிறது.

புயல் உருவாவதற்கு ஒரு வாரத்துக்கு முன்பு பசிபிக் பெருங்கடலின் வெப்பம் எந்த அளவு இருந்தது என்று ஆராய வேண்டும்.

மேற்கு பசிபிக் பகுதியில் கடந்த சில வாரங்களாகவே மேற்பரப்பு நீர் மற்றும் ஆழத்தில் உள்ள நீர் இரண்டிலும் வெப்பம் அதிகமாகவே இருந்துள்ளது. இதனால் கடலில் அதிகளவு வெப்ப‌ ஆற்றல் சேமிக்கப்பட்டது. அந்த சேமிப்பின் எல்லை கை மீறிய போது, காற்று அதை உள்வாங்கிக் கொண்டது. இதுவே ஹையான் புயல் உருவானதற்கும் தீவிரமடைந்ததற்கும் காரணம் என்கிறார்கள் புவியியலாளர்கள்.

சீனாவை தாக்கியது ஹையான் புயல். புயல் மழைக்கு இதுவரை 8 பேர் பலியாகியுள்ளனர்.

சீனாவிலும் ஹையான் புயல் தாக்குதல்: 8 பேர் பலி-பள்ளியில் வெள்ளம் புகுந்ததால் 1000 மாணவர்கள் தவிப்பு

பிலிப்பைன்ஸ் நாட்டில் 10 ஆயிரத்துக்கும் மேற்பட்ட மக்களை பலி வாங்கியதுடன், கடும் பொருட்சேதங்களை ஏற்படுத்திய ஹையான் புயல், சீனாவை நோக்கி நகர்ந்து பல்வேறு பகுதிகளைத் தாக்கியது. இதனால் அங்குள்ள மக்களின் இயல்பு வாழ்க்கை பாதிக்கப்பட்டுள்ளது. ஏராளமானோர் வீடுகளை இழந்து தவிக்கின்றனர்.

இன்று காலை மத்திய சீனாவின் ஹூனான் மாகாணத்தில் உள்ள சான்லிசி நீர்த்தேக்கத்தில் சென்ற படகு புயலில் சிக்கி கவிழ்ந்தது. அதில் பயணம் செய்த 10 பேரும் தண்ணீரில் மூழ்கி தத்தளித்தனர். அவர்களில் 2 பேர் இறந்தனர்.  அவர்களின் உடல்கள் மீட்கப்பட்டுள்ளன. 4 பேரை மீட்புக் குழுவினர் காப்பாற்றினர். மீதமுள்ள 4 பேரைக் காணவில்லை.

தெற்கு சீனாவில் உள்ள குவாங்சி சுவாங் தன்னாட்சி பிராந்தியத்தில் நேற்று மாலை கனமழை பெய்து கொண்டிருந்தபோது, சைக்கிள் ரிக்சா ஒன்று ஆற்றுக்குள் விழுந்தது. அதில் பயணம் செய்த 6 பேரில் 4 பேரைக் காணவில்லை. அவர்களைத் தேடும் பணி நடக்கிறது. 2 பேர் நீந்தி கரையேறினர்.

சான்லி டவுன்ஷிப்பில் உள்ள நடுநிலைப்பள்ளிக்குள் வெள்ளம் புகுந்தது. 1.5 மீட்டர் உயரத்திற்கு தண்ணீர் தேங்கியதால் அங்குள்ள 1000க்கும் மேற்பட்ட மாணவர்கள், அந்த கட்டிடத்தின் இரண்டாவது மாடிக்கு அனுப்பப்பட்டனர். அவர்களை மீட்கும் பணி நடைபெற்று வருகிறது. ஹையான் புயல் தாக்குதலுக்கு இதுவரை 8 பேர் பலியானதாக தகவல் வெளியாகி உள்ளது.