மலேசியாவில் "இருட்டறை கொடுமை': தப்பி வந்த தமிழர்கள் கண்ணீர்

மதுரை: மலேசியாவிற்கு அழைத்து சென்று வேலை வாங்கித் தருவதாக, தனியார் ஏஜன்ட்கள் ஏமாற்றியதால், கொத்தடிமைகளாக தவித்த 16 தமிழர்கள், அங்கிருந்து தப்பி, நேற்று மதுரை வந்தனர். "மலேசியாவில் இருட்டறையில் அடைத்து வைத்து பல்வேறு கொடுமைகளுக்கு ஆளானோம்' என,கலெக்டர் சுப்பிரமணியனிடம் கண்ணீர் மல்க கதறினர்.

மதுரை மாவட்டம் மேலூர், வெள்ளளூர், கோட்டநத்தம்பட்டி, கண்மாய்பட்டியை சேர்ந்த செல்வராஜ் உட்பட 16 பேரிடம், மலேசியாவில் வேலை வாங்கித் தருவதாக, சிவகங்கையை சேர்ந்த நான்கு ஏஜன்ட்கள், தலா ரூ.70 ஆயிரம் வசூல் செய்தனர். ஜூலை 5 ல், அவர்களை மலேசியாவிற்கு அனுப்பினர். அங்குள்ள தனியார் நிறுவனம் ஒன்றில் விலைக்கு விற்றது, அங்கு சென்ற பின் தெரிந்தது. இதனால், 16 பேரையும் கொத்தடிமைகளாக, அந்நிறுவனம் நடத்தியது.

அங்கிருந்து மதுரைக்கு தப்பி வந்தது குறித்து, பாதிக்கப்பட்டவர்கள் சார்பில் முருகன், சுரேஷ் கூறியதாவது:அம்பலக்காரன்பட்டி கம்பக்குடி, வல்லவன் காலனி செல்வம், பழைய ஒக்கம்பட்டி சேது, சிவகங்கை புதுப்பட்டி லட்சுமணன் ஆகிய ஏஜன்ட்கள், எங்களிடம் பணம் பெற்றுக்கொண்டு, மலேசியாவில் தனியார் கம்பெனி ஒன்றிற்கு வேலைக்கு அனுப்பினர். எங்களிடம் "சூப்பர் மார்க்கெட்டில் வேலை,' என்று தான் பணம் வாங்கினர். அங்கு போன பின் தான், 3,000 வெள்ளிக்கு எங்களை விற்ற தகவல் தெரிந்தது.அந்நிறுவனம், எங்களை கொத்தடிமைகளாக நடத்தியது. சிறு அறையில், 20 பேரை அடைத்து வைத்தனர். கழிப்பறை அருகே தான், பல இரவுகளை கழித்தோம்.

சொல்லும் வேலையை செய்யாவிட்டால், இருட்டறையில் அடைத்து, அடியாட்கள் மூலம் அடித்தனர். எங்களை அடைத்து வைத்த இரும்புக் கதவை "ஆக்சா பிளேடால்' அறுத்து, அங்கிருந்து தப்பித்தோம். பின், இந்திய தூதரகம் மற்றும் "மதுரை மீட்பு அறக்கட்டளை' போன் எண்ணில் தொடர்புகொண்டு, அவர்கள் உதவியால், மதுரை திரும்பினோம்.

வீட்டிற்கு செல்வதற்கு முன், கலெக்டரை சந்தித்து மனு அளித்தோம், என்றனர்."மதுரை மீட்பு அறக்கட்டளை' செயலாளர் சிவசோமசுந்தரம் கூறுகையில், ""மோசடியில் ஈடுபட்ட ஏஜன்ட்கள் மீது நடவடிக்கை எடுக்க வேண்டும். தப்பி வந்த 16 பேருக்கும் பாதுகாப்பு அளிக்க வேண்டும். மலேசிய நிறுவனம் மீதும் நடவடிக்கை எடுக்க, இந்திய தூதரகம் வலியுறுத்த வேண்டும்,'' என்றார்.

தினமலர்

தனியார் ஏஜன்ட்களை கடுமையான சட்டங்கள் மூலம் கட்டுபடுத்தவேண்டும் .

மக்களுக்கும் விழிப்புணர்வு வேண்டும் .....

தக்க சமயத்தில் உதவிய
இந்திய தூதரகம் மற்றும் "மதுரை மீட்பு அறக்கட்டளை'' - க்கு
பாராட்டுகள்...