5 ஏக்கர் மூலிகை பூங்கா போச்சு : ஒரு கோடி ரூபாய் வீண் !

**krishnaamma** · **krishnaamma** Tue Nov 05, 2013 10:41 am

ஓட்டேரி : ஒரு கோடி ரூபாய் செலவில் சீரமைக்கப்பட்ட மாநகராட்சி மூலிகை பூங்கா, சீரழிந்து, விபசார மையமாக மாறி வருகிறது.திரு.வி.க.,நகர் மண்டலத்திற்கு உட்பட்ட, 74வது வார்டில், ஐந்து ஏக்கர் பரப்பளவில், 2001ல் பூங்கா அமைக்கப்பட்டது. இது, கடந்த 2011ல், ஒரு கோடி ரூபாய் செலவில், மூலிகை பூங்காவாக மாற்றப்பட்டு, முன்னாள் முதல்வர் கருணாநிதியால் திறந்துவைக்கப்பட்டது.பின், அ.தி.மு.க., ஆட்சியில், ஏறத்தாழ ஐந்து லட்சம் ரூபாய் செலவில், இங்கு கழிப்பறைகளும் கட்டப்பட்டன.6 மாதங்களாக...இந்த பூங்காவின் பராமரிப்பு மற்றும் பாதுகாப்பு, டெண்டர் மூலம் தேர்ந்தெடுக்கப்பட்ட தனியார் நிறுவனத்தால் மேற்கொள்ளப்பட்டது.தற்போது, இதற்கான ஒப்பந்த காலம் முடிந்து ஆறு மாதங்கள் ஆகிறது. இருப்பினும், ஒப்பந்த நீட்டிப்பு அல்லது மறு டெண்டர் குறித்து மாநகராட்சி எந்த நடவடிக்கையும் எடுக்கவில்லை.

இதனால், கடந்த ஆறு மாதங்களாக பாதுகாவலர் மற்றும் பராமரிப்பாளர் இல்லாமல், பூங்கா சீரழிந்து வருகிறது. செடிகள் கண்டபடி வளர்ந்து, நாற்காலிகளை விழுங்கிவிட்டன. நடைபாதைகள் இருக்கும் இடம் தெரியாமல், இலைகளால் மூடப்பட்டு உள்ளன. ஆடுகளும் அவ்வப்போது மேய்கின்றன.விபசார மையம் இது தவிர; பூங்கா எந்த நேரமும் திறந்து இருப்பதால், 24 மணி நேர குடிமையமாக மாறியுள்ளது. மின்விளக்குகள் எரியாததால், மாலை 6:00 மணிக்கு மேல், விபசார தொழில் களைகட்டுகிறது
ரவுடிகள் சிலர், பூங்கா வளாகத்தை தங்கள் 'கோட்டை'யாக பயன்படுத்தி வருகின்றனர்

சமூக விரோத செயல்கள் மற்றும் துஷ்பிரயோகத்தால், தாவரங்கள் குறித்த தகவல் பலகைகள் பொலிவிழந்து போயுள்ளன
போலீசாரும் இந்த இடத்தை கண்டுகொள்ளாததால், பகலில் கூட, பெண்கள், பூங்காவிற்குள் நுழைய முடியாத நிலை உள்ளது.
இந்த நிலையில், 'இரவு நேரத்தில், நடக்கக் கூடாதது எல்லாம் நடக்கிறது. மாநகராட்சி சம்மதித்தால், நாங்களே கூட, காவலாளியை நியமித்து பராமரிக்க காத்திருக்கிறோம்' என்று பகுதிவாசிகள் தெரிவிக்கின்றனர்.
வெறும் போட்டி?

இது குறித்து, பகுதி கவுன்சிலர் மற்றும் மாநகராட்சி அதிகாரிகள் கூறுகையில், 'இன்னும் ஒரு மாத காலத்தில், பூங்கா சீரமைப்பு பணி துவங்கிவிடும். அதன்பின், பூங்கா தற்போது இருப்பதை விட, கூடுதல் பொலிவு பெறும்' என்றனர்.
மேலும், 'தலைமை செயலக குடியிருப்பு வழியாக பூங்காவிற்கு ஒரு பாதையுடன், நடைபாதை பூங்காவும் அமைக்கப்பட
உள்ளது. சீரமைப்பு பணிகளுக்கான ஒப்பந்தம் விரைவில் கோரப்படும்' என்றனர்.
அதாவது, பூங்காவில் உள்ள பிரச்னைகள் மாநகராட்சிக்கு தெரியாமல் இல்லை. ஆனால், அரசியல் போட்டியால், பூங்காவை மீண்டும் சீரமைத்து, பூங்கா கல்வெட்டில் தங்கள் பெயரை பொறித்துக் கொள்ள வேண்டும் என்பதற்காக, பூங்கா சீரழிக்கப்பட்டதா என்ற சந்தேகம் உருவாகி உள்ளது.இதனால், கடந்த ஆறு மாத காலமாக ஓட்டேரி மக்கள் அவதிப்பட்டு வருவது தான் மிச்சம்.

நன்றி : தினமலர்