இசைப்பிரியாவை இலங்கை ராணுவம் கொடூரமாக கொன்ற பதைபதைப்பு காட்சிகள் ‘சேனல்–4’ நிறுவனம் வெளியிட்டது

விடுதலைப்புலிகளின் ஊடகப்பிரிவில் பணிபுரிந்த இசைப்பிரியாவை, இலங்கை ராணுவம் கொடூரமாக கொலை செய்த பதை பதைப்பு காட்சிகளை, இங்கிலாந்தின் ‘சேனல்–4’ நிறுவனம் வெளியிட்டு உள்ளது.

சேனல்–4 நிறுவன காட்சிகள்

இங்கிலாந்தின் சேனல்–4 என்ற டெலிவிஷன் நிறுவனம், இலங்கை ராணுவத்தின் போர்க்குற்ற நடவடிக்கைகள் குறித்து, அவ்வப்போது பரபரப்பான வீடியோ காட்சிகளை வெளியிட்டு வருகிறது. அந்த நிறுவனம் கடைசியாக வெளியிட்ட வீடியோ தொகுப்பில், விடுதலைப்புலிகள் இயக்கத்தின் தலைவர் பிரபாகரனின் பச்சிளம் பாலகன் பாலச்சந்திரன் படுகொலை தொடர்பான காட்சிகள் இடம் பெற்று இருந்தன.

பாலச்சந்திரன் படுகொலை செய்யப்படுவதற்கு முன்பு, இலங்கை ராணுவம் அவனை பிடித்து வைத்து இருந்த காட்சிகளும், பின்னர் அதே ஆடைகளுடன் துப்பாக்கிக் குண்டுகளை மார்பில் தாங்கி அவன் பிணமாக சாய்ந்த கிடந்த காட்சிகளும் உலகம் முழுவதும் பெரிய அளவில் தாக்கத்தை ஏற்படுத்தி இருந்தன.

இசைப்பிரியாவின் கொடூர கொலை

விடுதலைப்புலிகள் இயக்கத்தின் வானொலி மற்றும் ஊடகப்பிரிவில் பணி புரிந்தவர், ஷோபா என்ற இசைப்பிரியா (வயது 27). சிறந்த பாடகியான அவர் பிரபாகரனின் அன்புக்கு பாத்திரமானவர். இறுதி கட்ட போரில் பிணமாக கிடந்த இசைப்பிரியா, போரின்போது கொல்லப்பட்டதாக ராஜபக்சே அரசு இதுவரை கூறி வந்தது.

ஆனால், அந்த தகவலை பொய்யாக்கும் விதத்தில், இலங்கை ராணுவம் இசைப்பிரியாவை பிடித்து வைத்து கொடூரமான முறையில் கொலை செய்வது தொடர்பான வீடியோ காட்சிகளை சேனல்–4 நிறுவனம் வெளியிட்டு இருக்கிறது.

பதைபதைப்பு காட்சிகள்

வயல் வெளி போன்ற பரந்த நிலப்பரப்பு வழியாக தப்பிச்செல்ல முயன்ற இசைப்பிரியாவை இலங்கை ராணுவ வீரர்கள் பிடித்து சித்ரவதை செய்து உள்ளனர். மேலாடை இல்லாத நிலையில், ராணுவ வீரர்கள் ஒரு வெள்ளைத்துணியை எடுத்து இசைப்பிரியாவின் உடலில் போர்த்தி அழைத்து வருவது போன்ற நெஞ்சை பதற வைக்கும் காட்சி அதில் இடம் பெற்று உள்ளது.

‘இவர்தான் பிரபாகரன் மகள்’

அப்போது ஒரு வீரர், ‘‘இவர்தான் பிரபாகரனின் மகள்’’ என்று கூறுவதும், இசைப்பிரியா அதை மறுக்கும் குரலும், அந்த காட்சியில் பதிவாகி இருக்கிறது. ராணுவ வீரர் ஒருவரே இந்த காட்சியை படம் பிடித்து இருக்கிறார்.

பல தமிழ்ப்பெண்கள் பாலியல் பலாத்காரம் செய்து ராணுவத்தினரால் கொலை செய்யப்பட்ட காட்சிகளை ஏற்கனவே வெளியிட்டுள்ள சேனல்–4 நிறுவனம், தற்போது வெளியிட்டுள்ள இசைப்பிரியா தொடர்பான காட்சிகளுடன், மேலும் சில விடுதலைப்புலிகள், கை–கால்கள் கட்டப்பட்ட நிலையில் சுட்டுக்கொல்லப்படும் காட்சிகளையும் வெளியிட்டு உள்ளது.

பேனா–கேமராவுடன்

எப்போதும் பேனா, கேமராவுடன் சுறுசுறுப்பாக வலம் வந்த இசைப்பிரியா, தற்காப்புக்காக துப்பாக்கி கூட வைத்துக்கொள்வது இல்லை என்று, அவருடைய நெருங்கிய தோழி ஒருவர் கூறி இருக்கிறார்.

இலங்கையில் சில நாட்களில் காமன்வெல்த் நாடுகள் மாநாடு தொடங்க இருக்கும் நிலையில், இந்தியா சார்பில் அந்த மாநாட்டில் யாரும் பங்கேற்கக்கூடாது என்ற கோரிக்கை வலுவடைந்து வருகிறது. இந்த நிலையில், இசைப்பிரியாவின் படுகொலை தொடர்பான வீடியோ காட்சிகள் பரபரப்பை ஏற்படுத்தி உள்ளது.