30 வகை ஸ்வீட் - காரம்

**சிவா** · **சிவா** Fri 1 Nov 2013 - 1:38

First topic message reminder :

சாக்லேட் பாதுஷா

தேவையானவை: மைதா மாவு - 150 கிராம், சமையல் சோடா - ஒரு சிட்டிகை, உப்பு - அரை சிட்டிகை, சர்க்கரை - 250 கிராம், பால் - ஒரு டீஸ்பூன், சாக்லேட் துருவல் (கடைகளில் விற்கும் காபி சாக்லேட் போதுமானது) - 3 டீஸ்பூன், எண்ணெய் - கால் கிலோ, நெய் - 2 டீஸ்பூன், கலர் கொப்பரைத் துருவல் (டிபார்ட்மென்ட் ஸ்டோர்களில் கிடைக்கும்) - 2 டீஸ்பூன், தயிர் - ஒரு டீஸ்பூன்.

செய்முறை: சர்க்கரையில் ஒரு கரண்டி தண்ணீர் சேர்த்து, கொதிக்கவிட்டு ஒரு டீஸ்பூன் பால்விட்டு, மேலே படியும் அழுக்கை நீக்கவும். நன்கு கொதிக்கும்போது துருவிய சாக்லேட் சேர்த்து கரையவிட்டு இறக்கவும் (பிசுக்கு பதம் வரவேண்டும்). சமையல் சோடா, உப்பு, 2 டீஸ்பூன் நெய் சேர்த்து நன்கு நுரைக்க கையால் தேய்த்து... மைதா, தயிர், சிறிதளவு நீர் சேர்த்து பூரி மாவு போல் பிசையவும். மாவை பெரிய எலுமிச்சை சைஸ் உருண்டைகளாக உருட்டி தட்டி, எண்ணெயில் பொரிக்கவும். பொரித்தவற்றை சாக்லேட் - சர்க்கரைப் பாகில் போட்டு எடுத்து, தாம்பளத்தில் வைத்து, மேலே கலர் கொப்பரை துருவல் தூவி பரிமாறவும்.

குறிப்பு: பொரித்த பாதுஷாவை சூடான சர்க்கரைப் பாகில் போட்டால் விரைவில் கெட்டுவிடும். பாகு சற்றே ஆறியபின் பாதுஷாவை சர்க்கரைப் பாகில் போட்டு எடுக்கவும்.

**சிவா** · **சிவா** Fri 1 Nov 2013 - 1:49

தேங்காய் ஏலக்காய் முறுக்கு

தேவையானவை:

பச்சரிசி - 150 கிராம்,
பாசிப்பருப்பு - 35 கிராம்,
கடலைப்பருப்பு - 25 கிராம்,
தேங்காய்ப் பால் - அரை கப்,
ஏலக்காய்த்தூள், உப்பு - சிறிதளவு,
எண்ணெய் - பொரிக்க தேவையான அளவு.

செய்முறை:

பாசிப்பருப்பு, கடலைப்பருப்பை சிவக்க வறுத்து பச்சரிசியுடன் சேர்த்து மாவாக்கவும். இதனுடன் உப்பு, ஏலக்காய்த்தூள், தேங்காய்ப் பால் சேர்த்து (தேவையெனில் சிறிது நீரும் சேர்த்து) பிசையவும். மாவை சூடான எண்ணெயில் முள்ளு முறுக்காக பிழியவும்.

குறிப்பு:

தேங்காய்ப் பால் சேர்ப்பதால் முறுக்கு சிவப்பாக வரும். ஆனால், இதை ருசியில் மிஞ்ச முடியாது.

**சிவா** · **சிவா** Fri 1 Nov 2013 - 1:50

மசாலா ஓமப்பொடி

தேவையானவை:

கடலை மாவு - 200 கிராம்,
அரிசி மாவு - 2 டீஸ்பூன்,
பட்டை, லவங்கம், சோம்பு பொடி (சேர்த்து) - ஒரு டீஸ்பூன்,
எண்ணெய் - பொரிக்க தேவையான அளவு,
ஓம வாட்டர் - 2 டீஸ்பூன்,
நெய் - ஒரு டீஸ்பூன்,
மஞ்சள்தூள், உப்பு - சிறிதளவு.

செய்முறை:

கடலை மாவு, அரிசி மாவு, உப்பு, மஞ்சள்தூள், பட்டை - லவங்கம் - சோம்பு பொடி, நெய்... இவற்றோடு ஓம வாட்டர் சேர்த்து, மேலும் சிறிதளவு நீர் சேர்த்துப் பிசையவும். மாவை முறுக்குக் குழாயில் ஓமப் பொடி அச்சில் போட்டு சூடான எண்ணெயில் பிழிந்து எடுக்கவும்.

**சிவா** · **சிவா** Fri 1 Nov 2013 - 1:50

ஆலு அல்வா

தேவையானவை:

வேக வைத்து மசித்த உருளைக்கிழங்கு - 200 கிராம்,
மில்க்மெய்ட் - 2 டீஸ்பூன்,
பால்கோவா - 50 கிராம்,
சர்க்கரை - 100 கிராம்,
வறுத்த முந்திரி, உலர் திராட்சை - சிறிதளவு,
நெய் - 100 கிராம்,
பச்சைக் கற்பூரம் (பொடித்தது) - துளி அளவு.

செய்முறை:

சர்க்கரையில் சிறிது நீர்விட்டு காய்ச்சி... இளகி முத்து கொதி வருகையில் (பாகு கொதிக்கும்போது முத்து முத்தாக நுரைத்து வரும்), மசித்த உருளைக்கிழங்கு, பால் கோவா உதிர்த்து சேர்த்துக் கிளறவும். அவ்வப்போது நெய் சேர்த்துக்கொண்டே கிளறவும். அல்வா பதம் வரும்போது மில்க்மெய்ட் சேர்த்து நன்கு கிளறி இறக்கி, மீண்டும் கிளறி... வறுத்த முந்திரி, உலர் திராட்சை, பச்சைக் கற்பூரம் சேர்த்தால்... சப்புக் கொட்ட வைக்கும் சுவையில் ஆலு அல்வா தயார்.

**சிவா** · **சிவா** Fri 1 Nov 2013 - 1:51

கார்ன்ஃப்ளார் அல்வா

தேவையானவை:

கார்ன்ஃப்ளார் (சோள மாவு) - 100 கிராம்,
சர்க்கரை - 150 கிராம்,
நெய் - 100 கிராம்,
கேசரி பவுடர் - சிறிதளவு,
வறுத்த முந்திரி, உலர் திராட்சை, வெள்ளரி விதை - சிறிதளவு,
ஏலக்காய்த்தூள் - ஒரு சிட்டிகை.

செய்முறை:

சோள மாவில் கேசரி பவுடர் கலந்து, சிறிதளவு நீர் விட்டு தோசை மாவு பதத்தில் கரைத்துக்கொள்ளவும். சர்க்கரையில் ஒரு கரண்டி நீர் விட்டு முத்து பாகு வருகையில் (பாகு கொதிக்கும்போது முத்து முத்தாக நுரைத்து வரும்) கரைத்த சோள மாவு, நெய் சேர்த்து கைவிடாமல் கிளறவும். கலவை வெந்து 'பள பள’வென கிளாஸ் போல் வரும்போது ஏலக்காய்த்தூள், வறுத்த முந்திரி, உலர் திராட்சை, வெள்ளரி விதை சேர்த்து, நெய் தடவிய தட்டில் கொட்டி, ஆறிய பின் வில்லைகள் போடவும்.

**சிவா** · **சிவா** Fri 1 Nov 2013 - 1:52

மைதா வெனிலா கேக்

தேவையானவை:

மைதா - 150 கிராம்,
சர்க்கரை - 200 கிராம்,
நெய் - 100 கிராம்,
வெனிலா எசன்ஸ் - 2 சொட்டு (அதிகம் விட்டால் கசப்பாகிவிடும்).

செய்முறை:

வாணலியில் நெய்யை சூடாக்கி, மைதா சேர்த்து பச்சை வாசனை போக வறுத்து இறக்கவும். சர்க்கரையில் சிறிதளவு நீர் சேர்த்து முத்து கொதி வரவிடவும் (பாகு கொதிக்கும்போது முத்து முத்தாக நுரைத்து வரும்). பின்னர் அடுப்பை அணைத்து, மைதா மாவு கலவையை சர்க்கரைப் பாகில் சேர்த்து நன்கு வேகமாக கிளறவும். இறுகும் சமயம் வெனிலா எசன்ஸ் சேர்த்து, நெய் தடவிய தட்டுக்கு மாற்றி, வில்லைகள் போடவும்.

**சிவா** · **சிவா** Fri 1 Nov 2013 - 1:53

ரோஸ் ஜிலேபி

தேவையானவை:

மைதா மாவு - 100 கிராம்,
சோள மாவு - 25 கிராம்,
கடலை மாவு - ஒரு டீஸ்பூன்,
கடைந்த தயிர் - 50 கிராம்,
சர்க்கரை - ஒரு கப்,
ரோஸ் எசன்ஸ் - சில துளிகள்,
ஆரஞ்சு அல்லது மஞ்சள் ஃபுட் கலர் - தேவையான அளவு,
சோடா உப்பு - ஒரு சிட்டிகை,
எண்ணெய் - 250 கிராம்.

செய்முறை:

சர்க்கரையில் அரை கப் நீர் சேர்த்து, சிறிதளவு ஃபுட் கலர் சேர்த்து நன்கு கொதிக்கவிட்டு, கம்பிப் பதம் வந்தபின் இறக்கி, ரோஸ் எசன்ஸ் சேர்க்கவும். மைதா மாவு, சோள மாவு, கடலை மாவு தயிர், சோடா உப்பு, சிறிதளவு ஃபுட் கலர் ஆகியவற்றை சிறிதளவு நீர் சேர்த்து இட்லி மாவு போல் கரைக்கவும். பால் கவரில் மாவை நிரப்பி, ஒரு மூலையில் சிறிய துளையிட்டு, சூடான எண்ணெயில் சிறிய வட்டமாக 3 அல்லது 4 முறை சுற்றி பிழிந்துவிட்டு பொரித்தெடுக்கவும். இதை சர்க்கரை பாகில் முக்கி எடுத்து, ஒன்றின் மீது ஒன்று படாதவாறு தட்டில் வைக்கவும்.

**சிவா** · **சிவா** Fri 1 Nov 2013 - 1:54

ஓமவல்லி துளசி லேகியம்

தேவையானவை:

ஓமவல்லி இலை - 10,
துளசி இலைகள், - 10,
இஞ்சி - ஓர் அங்குல நீள துண்டு (சுத்தம் செய்து, தோல் நீக்கவும்),
லவங்கம் - 3,
நெய் - 2 டீஸ்பூன்,
மிளகு - 10,
தேன் - 4 டீஸ்பூன்.

செய்முறை:

மிளகு, லவங்கத்தை வறுத்துப் பொடிக்கவும். ஓமவல்லி, துளசி, இஞ்சியை விழுதாக்கவும். அடுப்பில் கடாயை வைத்து, நெய்யை விட்டு சூடாக்கி... அரைத்த விழுது, பொடித்த பொடி சேர்த்து நன்கு வதக்கவும். லேகியம் போல் ஆனதும் இறக்கி ஆற வைத்து, தேன் சேர்க்கவும். இந்த லேகியம் ஜீரணத்துக்கு உதவும்.

**சிவா** · **சிவா** Fri 1 Nov 2013 - 1:55

சுருள் போளி

தேவையானவை:

மைதா - ஒரு கப்,
கடலை மாவு - ஒரு கப்,
சர்க்கரை (பொடித்தது) - முக்கால் கப்,
ஏலக்காய்த்தூள் - சிறிதளவு,
பொடியாக நறுக்கிய டிரைஃப்ரூட்ஸ் - கால் கப்,
துருவிய கலர் கொப்பரை - 2 டீஸ்பூன்,
நெய் - 3 டீஸ்பூன்,
எண்ணெய் - கால் கிலோ,
உப்பு - ஒரு சிட்டிகை.

செய்முறை:

கடலை மாவை நெய்யில் சிவக்க வறுத்து... பொடித்த சர்க்கரை, ஏலக்காய்த்தூள், பொடியாக நறுக்கிய டிரைஃப்ரூட்ஸ் சேர்த்து பூரணம் தயாரிக்கவும். மைதாவை உப்பு, தேவையான நீர் சேர்த்து, கெட்டியாகப் பிசைந்து மெல்லிய, சற்றே பெரிய பூரி போல் இடவும். கடாயில் எண்ணெயை சூடாக்கி, அடுப்பை சிறுதீயில் வைத்து, பூரிபோல் இட்டு வைத்ததை போட்டு பாதி வேகவிட்டு (மொறுமொறு என்று ஆகிவிடாமல்) எடுத்து, சூட்டோடு இருக்கும்போதே அதில் பூரணம் தூவி, உடனே பாய் போல் சுருட்டி, மேலே கலர் கொப்பரை தூவவும்.

**சிவா** · **சிவா** Fri 1 Nov 2013 - 1:55

பனீர் ஜாங்கிரி

தேவையானவை:

முழு உளுத்தம்பருப்பு - 200 கிராம்,
சர்க்கரை - 200 கிராம்,
துருவிய பனீர் - 100 கிராம்,
பச்சரிசி - ஒரு டீஸ்பூன்,
ஏலக்காய் எசன்ஸ் - 2 சொட்டு,
ஃபுட் கலர் (கேசரி (அ) மஞ்சள்) - தேவையான அளவு,
நெய் - 100 கிராம்,
எண்ணெய் - 200 கிராம்.

செய்முறை:

சர்க்கரையுடன் ஃபுட் கலர், சிறிதளவு நீர் சேர்த்து, ஒற்றை கம்பி பதத்தில் பாகு காய்ச்சி, ஏலக்காய் எசன்ஸ் சேர்த்து வைக்கவும். உளுத்தம்பருப்பு, அரிசியை சேர்த்து, அரை மணி நேரம் ஊற வைத்து... நன்கு கெட்டியாக, மையாக அரைத்து சிறிதளவு கலர் சேர்க்கவும். நெய் - எண்ணெயை கடாயில் சேர்த்து சூடாக்கவும். பால் கவரில் மாவை நிரப்பி, ஒரு மூலையில் சிறிய ஓட்டை போட்டு, கொதிக்கும் நெய் - எண்ணெயில் ஜாங்கிரிகளாக பிழிந்து, பொரித்தெடுக்கவும். அதை சர்க்கரை பாகில் போட்டு எடுத்து, பாகு உலரும் முன் துருவிய பனீர் சேர்க்கவும்.

**சிவா** · **சிவா** Fri 1 Nov 2013 - 1:56

கிரவுண்ட்நட் கிரிஸ்பீஸ்

தேவையானவை:

முழு வேர்க்கடலை (வறுத்தது) - 200 கிராம்,
கடலை மாவு - 50 கிராம்,
சோள மாவு - 2 டீஸ்பூன்,
சிவப்பு மிளகாய் விழுது - ஒரு டீஸ்பூன்,
உப்பு, பெருங்காயத்தூள் - சிறிதளவு,
எண்ணெய் - பொரிக்க தேவையான அளவு.

செய்முறை:

அனைத்து பொருட்களையும் சிறிதளவு நீர் விட்டு பிசிறி, சூடான எண்ணெயில் உதிர்த்தாற்போல் போட்டு எடுக்கவும்.

குறிப்பு:

கடலை மாவுக்குப் பதிலாக பொட்டுக்கடலை மாவும் சேர்க்கலாம்.

Sponsored content · Sponsored content

30 வகை ஸ்வீட் - காரம்

30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

Re: 30 வகை ஸ்வீட் - காரம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக