காவல் நிலையங்களில் சாவுகள் என்பது மனித உரிமை மீறலுக்கான சான்றுகளாகும்: கலைஞர்

தி.மு.க. தலைவர் கலைஞர் வெளியிட்டுள்ள கேள்வி-பதில் அறிக்கையில் கூறியிருப்பதாவது:-

கேள்வி :- காவல் நிலையங்களில் சாவு என்பது அ.தி.மு.க. ஆட்சியில் அதிகமாகவும், சட்டம் ஒழுங்கு சீர்குலைந்துள்ளதாகவும் சொல்லப்படுகிறதே?

பதில் :- காவல் நிலைய இறப்புகள், கொலை, நகை பறிப்பு தொடர்பாக பத்திரிகைகளில் செய்திகள் வெளியாகி உள்ளன. கொலை, கொள்ளை, செயின் பறிப்பு நிகழ்வுகளால் பொதுமக்களிடையே அச்ச உணர்வு பெருமளவுக்கு ஆக்கிரமித்திருக்கிறது. காவல் நிலையங்களில் சாவுகள் என்பது மனித உரிமை மீறலுக்கான சான்றுகளாகும்.

கேள்வி :- இந்த ஆட்சியில் சேலம் மாவட்ட ஆட்சித் தலைவரைத் தவிர மற்ற மாவட்ட ஆட்சித் தலைவர்கள் எல்லாம் மாற்றப்பட்டுவிட்டதாகவும், அடிக்கடி மாவட்ட ஆட்சித் தலைவர்கள் மாற்றப்படுவதாகவும் சொல்லப்படுகிறதே?

பதில் :- சேலம் மாவட்ட வருவாய்த் துறை நிர்வாகம் எந்த அளவுக்குத் தரம் தாழ்ந்து வருகிறது என்பதை இதன் மூலம் தெரிந்து கொள்ளலாம்.

கேள்வி :- தமிழக அரசின் உத்தரவு ஒன்றால் மண்பாண்டத் தொழிலாளர்களும் வாழ்வாதாரத்தை இழக்கக்கூடிய நிலைமை வந்திருப்பதாகக் கூறுகிறார்களே?

பதில் :- ஏரிகள், குளங்கள் ஆகியவற்றிலிருந்து மண்பாண்டத் தொழிலாளர்கள் தங்களுக்குத் தேவையான மண்ணை எடுத்து, வீடுகளில் வைத்து மண்பாண்டப் பொருள்களை தயாரித்து வருகிறார்கள். இதற்கு இடைஞ்சலாக இந்த ஆட்சியினர் ஏரிகளில் யாரும் மண் எடுக்கக்கூடாது என்று ஓர் உத்தரவைப் பிறப்பித்திருக்கிறார்களாம். இதன் காரணமாக மண்பாண்டத் தொழிலாளர்கள் சிரமத்திற்கு ஆட்பட்டிருக்கிறார்கள். அரசு இந்தப் பிரச்சினையில் தலையிட்டு, ஏழ்மை நிலையிலே உள்ள மண்பாண்டத் தொழிலாளர்களைக் காப்பாற்றிட முன்வர வேண்டும்.

கேள்வி :- தமிழகத்திலே பள்ளிக் கல்வியை வணிகமயமாக்கும் மத்திய அரசின் ராஷ்டீரிய ஆதர்ஷ் வித்தியாலயா திட்டத்தின்படி, மத்திய அரசும் தனியாரும் கூட்டு சேர்ந்து மாதிரிப் பள்ளிகளை தொடங்கிட முயற்சிப்பதாக செய்தி வந்திருக்கிறதே?

பதில் :- மாநில அரசின் அதிகாரத்தில் மத்திய அரசு தலையிடுகின்ற இப்படிப்பட்ட போக்கினை மாநில அரசு அனுமதிக்கவே கூடாது. இதற்கு தமிழக அரசு உடனடியாக தன்னுடைய எதிர்ப்பைத் தெரிவிக்க வேண்டும்.

கேள்வி :- பிற்படுத்தப்பட்ட மாணவர்களுக்கான விடுதி கட்டுவதாக அ.தி.மு.க. அரசு அறிவித்ததற்கிணங்க, அவற்றைக் கட்டுவதற்கான அரசாணை இதுவரை பிறப்பிக்கப்படவில்லை என்று சொல்லப்படுகிறதே?

பதில் :- 9-5-2013 அன்று முதலமைச்சர் ஜெயலலிதா பேரவையில் படித்த 110வது விதியின் கீழான அறிக்கையில், “226 விடுதிகளுக்கு சொந்தக் கட்டடம் கட்டுவதற்கு ஏற்கெனவே நடவடிக்கைகள் எடுக்கப்பட்டு கட்டுமானப் பணிகள் பல்வேறு நிலைகளில் உள்ளன. எஞ்சியுள்ள 68 விடுதிகளுக்கு நடப்பாண்டில் 86 கோடியே 97 இலட்சம் ரூபாய் செலவில் நவீன வசதிகளுடன் சொந்தக் கட்டடங்கள் கட்டப்படும் என்பதை மகிழ்ச்சியுடன் தெரிவித்துக் கொள்கிறேன்” என்று தெரிவித்தார்.

இந்த அறிவிப்புக்கான அரசாணைதான் தமிழக அரசின் சார்பில் இதுவரை பிறப்பிக்கப்படவில்லை என்று சொல்லப்படுகிறது. இதைப்போலத்தான் காவல் துறையினருக்கும், தீயணைப்புத் துறையினருக்கும், வனத்துறையைச் சேர்ந்தவர்களுக்கும் அறிவிக்கப்பட்ட உணவுப் படிகள் போன்றவற்றை வழங்க அரசு ஆணை பிறப்பிக்கப்படவில்லை என்று நான் எழுதிய பிறகு, அரசு அதற்கான ஆணைகளைப் பிறப்பித்தது. பிற்படுத்தப்பட்ட மாணவர்களுக்கான விடுதிகளுக்கான அரசாணையும் என்னுடைய இந்தக் கருத்துக்கு பிறகு அரசின் சார்பில் பிறப்பிக்கப்பட்டு விடுமென்று நம்புகிறேன்.

இவ்வாறு கலைஞர் கூறியுள்ளார்.