காதணி விழா

guruprasath.k · guruprasath.k Thu Oct 31, 2013 11:33 am

அன்பு மகள் என் மடியில்
அவள் அன்னையவள் என் அருகில்
எம் இருவர் எண்ணமெல்லாம்
எம் குழந்தை இன்னல் எண்ணி
ஆசாரி அருகில் வந்து
அன்பாய் அவள் காதை தீண்டி
செல்லாமாய் சிரிக்க வைக்க
சில சில செய்கைகள் செய்கின்றார்

என் மகளோ அவரை கண்டு
அடங்காத அச்சம் கொண்டு
அழுதிடத்தான் ஆரம்பித்தாள்
என்னுள் தனை நுழைத்து ஒளிந்து கொண்டாள்

கதறினாள் என் பெண்ணவள்
அருகே பதறினாள் என்னவள்
எனக்குள்ளும் உதறல்தான் இருப்பினும்
எண்ணம் சிதறாமல் நிறுத்தி நின்றேன்
முடிவிலே தோல்வியுற்றாள் என் பெண்
காதிலே அணியை சேர்த்தார் அவள் கண் முன்

அழுததில் அயர்ந்து போனாள்
கண்கள் அயர்ச்சியில் உறங்கிப் போனாள்
துவன்டதில் தூங்கும் என் மழலையை உற்றுப் பார்த்தேன்
ஆதவன் காதல் கொள்ளும்
வெண்மதி வெட்கம் கொள்ளும்
விண்மீன்கள் சூழ்ந்து கொள்ளும்
சிறு ஒளி சிதறலாய் அவள் முகம்
அவள் அழகிற்கு அணி சேர்ப்பது போல்
அழகாய் சிறியதாய் காதணிகள்