இந்திய அணி ஜெய்ப்பூரில் வெற்றி,,,,

ஜெய்ப்பூர்: ஜெய்ப்பூர் ஒருநாள் போட்டியில் எட்ட முடியாத இலக்கை எட்டிக் காட்டிய இளம் இந்திய அணி 9 விக்கெட் வித்தியாசத்தில் இமாலய வெற்றி பெற்றது. விராத் கோஹ்லி அதிகவேக சதம் அடித்து சாதித்தார். ரோகித் சர்மாவின் சதம், தவானின் அதிரடி துவக்கம் வெற்றிக்கு அடித்தளம் அமைத்தது.
இந்தியா வந்துள்ள ஆஸ்திரேலிய அணி, ஏழு போட்டிகள் கொண்ட ஒருநாள் தொடரில் பங்கேற்கிறது. புனேயில் நடந்த முதல் போட்டியில் வெற்றி பெற்ற ஆஸ்திரேலியா 1-0 என முன்னிலை வகித்தது. இரண்டாவது போட்டி ஜெய்ப்பூரில் உள்ள சவாய் மான்சிங் மைதானத்தில் நேற்று நடந்தது. "டாஸ்' வென்ற ஆஸ்திரேலிய கேப்டன் ஜார்ஜ் பெய்லி, "பேட்டிங்' தேர்வு செய்தார்.
பின்ச் அரைசதம்:
ஆஸ்திரேலிய அணிக்கு ஆரோன் பின்ச், பிலிப் ஹியுஸ் ஜோடி நல்ல துவக்கம் கொடுத்தது. முதல் விக்கெட்டுக்கு 74 ரன்கள் சேர்த்த போது, ரெய்னாவின் "த்ரோ'வில் பின்ச் (50) "ரன்-அவுட்' ஆனார். அடுத்து வந்த வாட்சன்(59), ஒருநாள் அரங்கில் தனது 30வது அரைசதத்தை பதிவு செய்தார். மற்றொரு துவக்க வீரர் ஹியுஸ், ஒருநாள் போட்டியில் தனது இரண்டாவது அரைசதம் அடித்தார். தொடர்ந்து அசத்திய இவர், வினய் குமார், யுவராஜ் சிங் ஆகியோரது பந்தில் அடுத்தடுத்து தலா இரண்டு பவுண்டரி விளாசினார். இவர், 83 ரன்கள் எடுத்த போது அஷ்வினிடம் சரணடைந்தார்.
பெய்லி அதிரடி:
பின் இணைந்த கேப்டன் ஜார்ஜ் பெய்லி, மேக்ஸ்வெல் ஜோடி அதிரடியாக ரன் சேர்த்தது. இஷாந்த் வீசிய 45வது ஓவரில் தொடர்ச்சியாக இரண்டு பவுண்டரி அடித்த பெய்லி, ஒருநாள் போட்டியில் தனது 10வது அரைசதத்தை பதிவு செய்தார். மறுமுனையில் சிக்சர் அடித்து ரன் கணக்கை துவக்கிய மேக்ஸ்வெல், வினய் குமார் பந்தை பவுண்டரிக்கு விரட்டினார். தொடர்ந்து அசத்திய இவர், 30 பந்தில் அரைசதம் எட்டினார். தேவையில்லாமல் இரண்டாவது ரன்னுக்கு ஆசைப்பட்ட மேக்ஸ்வெல் (53), "ரன்-அவுட்' ஆனார்.
அடுத்து வந்த ஆடம் வோஜஸ் (11) ஏமாற்றினார். தொடர்ந்து அபாரமாக ஆடிய பெய்லி, அஷ்வின் வீசிய 47வது ஓவரில் ஒரு சிக்சர், ஒரு பவுண்டரி அடித்தார். இஷாந்த் வீசிய கடைசி ஓவரில் இரண்டு பவுண்டரி அடித்த பெய்லி, அணியின் ஸ்கோரை வலுவாக்கினார்.
ஆஸ்திரேலிய அணி 50 ஓவரில் 5 விக்கெட்டுக்கு 359 ரன்கள் குவித்தது. பெய்லி (92 ரன், 50 பந்து, 5 சிக்சர், 8 பவுண்டரி), ஹாடின் (1) அவுட்டாகாமல் இருந்தனர். இந்தியா சார்பில் வினய் குமார் 2, அஷ்வின் ஒரு விக்கெட் வீழ்த்தினர்.
சபாஷ் தவான்:
சவாலான இலக்கை விரட்டிய இந்திய அணிக்கு ஷிகர் தவான், ரோகித் சர்மா ஜோடி நல்ல துவக்கம் கொடுத்தது. வாட்சன் வீசிய 9வது ஓவரில் "ஹாட்ரிக்' பவுண்டரி அடித்த தவான், தோகர்டி பந்தில் தொடர்ச்சியாக இரண்டு பவுண்டரி விளாசி, அரைசதத்தை பூர்த்தி செய்தார். தொடர்ந்து அசத்திய தவான், பால்க்னர், வாட்சன் பந்தில் அடுத்தடுத்து தலா இரண்டு பவுண்டரி அடித்தார். முதல் விக்கெட்டுக்கு 176 ரன்கள் சேர்த்த போது, பால்க்னர் "வேகத்தில்', தவான் (95) சதமடிக்கும் வாய்ப்பை இழந்தார்.
ரோகித் சதம்:
மறுமுனையில் பொறுப்பாக ஆடிய ரோகித், மெக்கே பந்தில் இரண்டு பவுண்டரி விளாசினார். மேக்ஸ்வெல் பந்தை சிக்சருக்கு அனுப்பிய ரோகித், ஜான்சன் பந்தில் பவுண்டரி அடித்து, ஒருநாள் போட்டியில் தனது 3வது சதத்தை பதிவு செய்தார். அசத்தலாக ஆடிய இவர், ஜான்சன் வீசிய 40வது ஓவரில் மூன்று பவுண்டரி அடித்தார்.
விராத் விளாசல்:
அடுத்து வந்த விராத் கோஹ்லி, அதிரடியாக ரன் சேர்த்தார். பால்க்னர் வீசிய 29வது ஓவரில் ஒரு சிக்சர், ஒரு பவுண்டரி அடித்த கோஹ்லி, தோகர்டி, மெக்கே, வாட்சன் பந்தில் தலா ஒரு சிக்சர் விளாசினார். மேக்ஸ்வெல் வீசிய 42வது ஓவரில் ஒரு சிக்சர், ஒரு பவுண்டரி அடித்த கோஹ்லி, தோகர்டி "சுழலில்' சிக்சர் அடித்தார். இவர், 52வது பந்தில் அதிவேகசதம் அடித்து அசத்தினார்.
மேக்ஸ்வெல் வீசிய 44வது ஓவரில் இரண்டு பவுண்டரி, ஒரு சிக்சர் அடித்த ரோகித், அணியை வெற்றிக்கு அழைத்துச் சென்றார். இந்திய அணி 43.3 ஓவரில் ஒரு விக்கெட்டுக்கு 362 ரன்கள் எடுத்து, 9 விக்கெட் வித்தியாசத்தில் வெற்றி பெற்றது. ரோகித் (141), கோஹ்லி (100) அவுட்டாகாமல் இருந்தனர். ஆட்டநாயகன் விருது இந்தியாவின் ரோகித் சர்மாவுக்கு வழங்கப்பட்டது. இந்த வெற்றியின் மூலம், ஏழு போட்டிகள் கொண்ட ஒருநாள் தொடர் 1-1 என சமநிலை வகிக்கிறது. மூன்றாவது ஒருநாள் போட்டி மொகாலியில், வரும் அக்., 19ம் தேதி நடக்கிறது.
சிறந்த துவக்க ஜோடி
நேற்று ஜெய்ப்பூரில், 176 ரன்கள் சேர்த்த ஷிகர் தவான், ரோகித் சர்மா ஜோடி, ஆஸ்திரேலிய அணிக்கு எதிரான ஒருநாள் போட்டி வரலாற்றில், முதல் விக்கெட்டுக்கு அதிக ரன்கள் சேர்த்த இந்திய ஜோடி என்ற பெருமை பெற்றது. இதற்கு முன், 1998ல் கங்குலி-சச்சின் இணைந்து கான்பூரில் 175 ரன்கள் சேர்த்திருந்தனர்.
அதிவேக சதம் அடித்த இந்தியர்
ஆஸ்திரேலியாவுக்கு எதிராக 52 பந்துகளில் 100 ரன்கள் எடுத்த விராத் கோஹ்லி, அதிவேக சதம் அடித்த இந்திய வீரர் என்ற சாதனை படைத்தார். இவர், சேவக் சாதனையை தகர்த்தார்.
அதிவேக சதம் அடித்த "டாப்-11' வீரர்கள் விவரம்:
வீரர் எதிரணி/ஆண்டு மொத்த ரன் பந்து*
அப்ரிதி(பாக்.,) இலங்கை/1996 102 37
பவுச்சர்(தெ.ஆப்.,) ஜிம்பாப்வே/2006 147 44
லாரா (வெ.இண்டீஸ்) வங்கதேசம்/1999 117 45
அப்ரிதி (பாக்.,) இந்தியா/2005 102 45
ஜெயசூர்யா (இலங்கை) பாக்.,/1996 134 48
கெவின் ஓ பிரையன் (அயர்லாந்து) இங்கிலாந்து/2011 113 50
கோஹ்லி (இந்தியா) ஆஸி.,/2013 100 52
அப்ரிதி (பாக்.,) வங்கதேசம்/2010 124 53
ஜெயசூர்யா (இலங்கை) வங்கதேசம்/2008 130 55
டிவிலியர்ஸ் (தெ.ஆப்.,) இந்தியா/2010 102 58
சேவக் (இந்தியா) நியூசி.,/2009 125 60
* வீரர்கள் சதம் அடிக்க எடுத்துக்கொண்ட பந்துகளின் எண்ணிக்கை
சிறந்த "சேஸ்'
ஜெய்ப்பூர் போட்டியில் நேற்று 362 ரன்கள் எடுத்து வெற்றி பெற்ற இந்திய அணி, ஒருநாள் கிரிக்கெட் வரலாற்றில், தனது சிறந்த "சேசிங்கை' பதிவு செய்தது. இதற்கு முன் பாகிஸ்தானுக்கு எதிரான மிர்புர் (2012) போட்டியில், 330 ரன்களை "சேஸ்' செய்து வெற்றி பெற்றது.
சிறந்த "சேஸ்' வரிசையில் "டாப்-3' விவரம்:
அணி எதிரணி/இலக்கு எடுத்த ரன்கள் இடம்/ஆண்டு
தென் ஆப்ரிக்கா ஆஸி.,/434 438/9 ஜோகனஸ்பர்க்/2006
இந்தியா ஆஸி.,/359 362/1 ஜெய்ப்பூர்/2013
நியூசிலாந்து ஆஸி.,/346 350/9 ஹாமில்டன்/2007
சிறந்த "சேஸ்'
நேற்று ஆஸ்திரேலிய அணி நிர்ணயித்த 360 ரன்களை "சேஸ்' செய்த இந்தியா (362 ரன்), ஒருநாள் போட்டி வரலாற்றில் தனது சிறந்த "சேஸிங்கை' பதிவு செய்தது. முன்னதாக 2012ல் மிர்பூரில் நடந்த போட்டியில், பாகிஸ்தான் நிர்ணயித்த 330 ரன்களை "சேஸ்' செய்து வெற்றி பெற்றது. தவிர இது, சர்வதேச அளவில் இரண்டாவது சிறந்த வெற்றி. முதலிடத்தில் தென் ஆப்ரிக்கா (438 ரன்கள், எதிர்-ஆஸ்திரேலியா, 2006, ஜோகனஸ்பர்க்) உள்ளது.
சரியான பதிலடி
கடந்த 2003 (ஜோகனஸ்பர்க்), 2004ல் (சிட்னி) நடந்த போட்டிகளில், முதலில் "பேட்' செய்த ஆஸ்திரேலிய அணி 359 ரன்கள் குவித்தது. இதனை "சேஸ்' செய்த இந்திய அணி, சொற்ப ரன்னில் (234, 151 ரன்கள்) சுருண்டு, தோல்வி அடைந்தது. நேற்று மீண்டும் ஆஸ்திரேலிய அணி 359 ரன்கள் எடுத்தது. இதனை மிகச் சுலபமாக "சேஸ்' செய்து, கடந்த இரண்டு முறை கண்ட தோல்விகளுக்கு சரியான பதிலடி கொடுத்தது.
362
நேற்று 362 ரன்கள் எடுத்து வெற்றி பெற்ற இந்திய அணி, ஒருநாள் போட்டியில் ஆஸ்திரேலியாவுக்கு எதிராக அதிகபட்ச ஸ்கோரை பெற்றது. முன்னதாக, 2009ல் நாக்பூரில் நடந்த போட்டியில் இந்திய அணி அதிகபட்சமாக 7 விக்கெட்டுக்கு 354 ரன்கள் எடுத்தது.
359
நேற்று அபாரமாக ஆடிய ஆஸ்திரேலிய அணி 50 ஓவரில் 5 விக்கெட்டுக்கு 359 ரன்கள் குவித்தது. இதன்மூலம் ஜெய்ப்பூரில் உள்ள சவாய் மான்சிங் மைதானத்தில், ஒரு இன்னிங்சில் அதிக ரன்கள் குவித்த அணிகள் வரிசையில் முதலிடம் பிடித்தது. முன்னதாக, 2007ல் இங்கு நடந்த போட்டியில், பாகிஸ்தான் அணி 50 ஓவரில் 6 விக்கெட்டுக்கு 306 ரன்கள் (எதிர்-இந்தியா) எடுத்தது.
* இது, இந்திய மண்ணில் ஆஸ்திரேலிய அணியின் அதிகபட்ச ஸ்கோர். முன்னதாக 2009ல் ஐதராபாத்தில் நடந்த இந்தியாவுக்கு எதிரான போட்டியில், ஆஸ்திரேலிய அணி 50 ஓவரில் 4 விக்கெட்டுக்கு 350 ரன்கள் எடுத்தது.
* தவிர இது, ஒருநாள் போட்டியில் இந்தியாவுக்கு எதிராக ஆஸ்திரேலிய அணியின் அதிகபட்ச ஸ்கோர். முன்னதாக ஜோகனஸ்பர்க் (359/2, 2003), சிட்னி (359/5, 2004) மைதானங்களில் நடந்த போட்டியில் தலா 359 ரன்கள் எடுத்தது.

"டாப்-5' அரைசதம்
ஆஸ்திரேலிய அணியின் "டாப்-5' பேட்ஸ்மேன்களான பின்ச் (50), ஹியுஸ் (83), வாட்சன் (59), மேக்ஸ்வெல் (53), பெய்லி (92*) ஆகியோர் அரைசதம் அடித்தனர். இதன்மூலம் ஒரு நாள் போட்டியில் முதன்முறையாக, ஒரு அணியின் "டாப்-5' பேட்ஸ்மேன்கள் அரைசதத்தை பதிவு செய்து, புதிய உலக சாதனை படைத்தனர். தவிர, ஒருநாள் போட்டியில் ஒரு அணியின் ஐந்து பேட்ஸ்மேன்கள் அரைசதம் அடித்தது இரண்டாவது முறையாக அரங்கேறியது. முன்னதாக 2008ல் கராச்சியில் நடந்த ஜிம்பாப்வே அணிக்கு எதிரான போட்டியில், துவக்க வீரர் சல்மான் பட் (4) மட்டும் சொற்ப ரன்னில் வெளியேறினார். அடுத்து வந்த ஜாம்ஷெத் (61), யூனிஸ் கான் (79), முகமது யூசுப் (72), சோயப் மாலிக் (63), மிஸ்பா (55*) ஆகியோர் அரைசதம் அடித்தனர்.
thinamalar

-
இந்திய அணிக்கு வாழ்த்துகள்

      வாழ்துக்கள் இந்தியா இந்த வெற்றி மறக்க முடியாத வெற்றி தான்