கனடாவிற்குள் கப்பலில் நுழைந்தவர்களை கை, கால்கள் சங்கிலியால் பிணைக்கப்பட்ட நிலையில் விசாரணை

http://www.meenagam.org/?p=14523
கனடாவிற்குள் கப்பலில் நுழைந்தவர்களை கை, கால்கள் சங்கிலியால் பிணைக்கப்பட்ட நிலையில் விசாரணை



எழுதியவர்ஏதிலி on October 28, 2009
பிரிவு: செய்திகள்



கனடாவிற்குள்
கப்பல் மூலம் சென்றவேளை கைது செய்யப்பட்ட இலங்கையர்களில் ஒரு தொகுதியினரை
கை மற்றும் கால்கள் சங்கிலியால் பிணைக்கப்பட்ட நிலையில் நேற்று முன்தினம்
திங்கட்கிழமை குடிவரவுத்துறை அதிகாரிகள் முன்னிலையில் நிறுத்தப்பட்டனர்
என “வான்கூவர் சன்” பத்திரிகை தெரிவித்துள்ளது.

மேலும் ஒரு மாதத்துக்கு இலங்கையர்களைத்
தடுத்துவைப்பதற்கு அதிகாரிகள் உத்தரவிட்டுள்ளனர் எனவும்
தெரிவிக்கப்பட்டுள்ளது. தஞ்சம் கோரியவர்களிடம், தம்மை
உறுதிப்படுத்துவதற்கான ஆவணங்கள் எதுவுமில்லை எனக் குறிப்பிட்டுள்ள அந்தப்
பத்திரிகை, மேலும் தெரிவித்துள்ளவை வருமாறு:

கனடாவின் வான்கூவரில் இலங்கையைச் சேர்ந்த
அடைக்கலம் கோருபவர்கள் கைகளும், கால்களும் கட்டப்பட்ட நிலையில்
குடிவரவுத்துறை அதிகாரிகள் முன் நிறுத்தப்பட்டனர். எனினும், இவர்களில்
அநேகமானவர்களுக்குத் தமது அடையாளத்தை நிரூபிப்பது கடினமாகவுள்ளது.

இவர்களில் பலர் தாங்கள் யார் என்பதை
நிரூபிப்பதற்கான வலுவான ஆவணங்கள் இன்றிக் கனடா வந்துள்ளனர்.
இலங்கையர்களில் ஒருவர் தனது கடவுச்சீட்டு, அடையாள அட்டை போன்றவற்றை தனது
கனடா பயணத்திற்கான முகவரிடம் கையளித்துவிட்டார் எனவும் அதற்குப் பதில்
தனக்கு இந்தியக் கடவுச் சீட்டு வழங்கப்பட்டது எனவும் கனடாவின் எல்லைப்
பாதுகாப்பு அதிகாரிகளுக்குத் தெரிவித்தார்.

கனடாவின் பிரிட்டிஷ் கொலம்பியாவிற்கு
இந்தக் கப்பல் ஒக்ரோபர் 17 ஆம் திகதிவந்த தருணத்திலிருந்து கனடா
அதிகாரிகள் இவர்களை விசாரணை செய்து வருகின்றனர். இவர்களில் எவருக்காவது
குற்றச் செயல்களுடன் தொடர்பு இருப்பது தெரிய வந்தால் அவர்களை தனியாகப்
பிரிக்கப் போவதாகக் கனடாவின் உள்துறை அமைச்சு தெரிவிக்கின்றது.

குறிப்பாக அதிகாரிகள் கப்பலில்
வந்தவர்களுக்கும் விடுதலைப்புலிகளுக்கும் தொடர்பிருக்கலாம் என்பது
குறித்து அதிகாரிகள் கவனம் செலுத்துகின்றனர். இவர்களில் ஒருவர் விடுதலைப்
புலிகளுடன் உள்ள தொடர்பிற்காக சர்வதேச பொலிஸாரின் கவனிப்பில் உள்ளார்.
எனினும், ஏனைய அநேகமானவர்கள் மீது இவ்வாறான குற்றச்சாட்டு எதுவுமில்லை என
அவர்களுடைய கனடா ஆதரவாளர்கள் தெரிவிக்கின்றனர்.

அநேகமானவர்கள் சிறீலங்கா அரசின் நன்கு
அறியப்பட்ட வன்முறை, ஒடுக்கு முறையிலிருந்து தப்பியோடிய தமிழர்கள் எனத்
தெரிவிக்கப்படுகின்றது. “எனது பார்வையில் அவர்கள் அனைவரும் அமைதியாக,
ஒழுங்காக வளர்க்கப்பட்ட இளைஞர்கள் போன்று தென்படுகின்றனர்” என அவர்களில்
பலரை விசாரித்துள்ள சட்டத்தரணி லீ ரன் கின் தெரிவித்தார். இவர்களில் 15
பேர் குடிவரவு மற்றும் அகதிகள் சபைக்கு முன்பாகத் திங்கட்கிழமை
ஆஜராக்கப்பட்டனர். இவர்களை மேலும் 30 நாள்கள் தடுத்து வைப்பதற்கு
அதிகாரிகள் உத்தரவிட்டனர் எனத் தெரிவிக்கப்பட்டுள்ளது.
(Visited 21 times, 21 visits today)