லாலு பிரசாத் யாதவ் குற்றவாளி சிபிஐ நீதிமன்றம் தீர்ப்பு

1990–களில் பீகாரில் ராஷ்ட்ரிய ஜனதாதள தலைவர் லாலு பிரசாத் முதல்–மந்திரி பதவி வகித்தபோது அவர் மீது மாட்டுத்தீவன ஊழல் குற்றச்சாட்டுக்கள் எழுந்தன.அப்போது பீகாரின் ஒரு பகுதியாக இருந்து, தற்போது ஜார்கண்ட் மாநிலத்தில் உள்ள சாய்பாசா மாவட்ட கருவூலத்தில் மாட்டுத்தீவனம் தொடர்பான போலி பில்களை அளித்து ரூ.37.7 கோடி ஊழலில் ஈடுபட்டதாக லாலு பிரசாத் உள்ளிட்டவர்கள் மீது ஒரு வழக்கு பதிவானது.இந்த வழக்கில் லாலு பிரசாத்துடன், பீகார் முன்னாள் முதல்–மந்திரி ஜெகன்நாத் மிஸ்ரா, ஐக்கிய ஜனதாதள எம்.பி. ஜெகதீஷ் சர்மா உள்ளிட்ட மேலும் 44 பேர் சேர்க்கப்பட்டுள்ளனர்.இந்த வழக்கை ராஞ்சியில் உள்ள சி.பி.ஐ. தனிக்கோர்ட்டு நீதிபதி பிரவாஸ் குமார் விசாரித்து வந்தார். விசாரணை முடிந்து இன்று நீதிபதி தனது தீர்ப்பை வழங்குவதாக அறிவித்து இருந்தார்.

இந்த நிலையில், மாட்டுத்தீவன ஊழல் வழக்கில் லாலுபிரசாத் யாதவ் குற்றவாளி என ராஞ்சி சிபிஐ சிறப்பு நீதிமன்றம் இன்று உத்தரவிட்டுள்ளது. மேலும், இந்த வழக்கில் குற்றம் சாட்டப்பட்ட 45 பேரும் குற்றவாளியே என்று நீதிமன்றம் தீர்பளித்துள்ளது. எம்.பி., எம்.எல்.ஏ., எம்.எல்.சி.க்கள் குற்ற வழக்கில் 2 ஆண்டுகளோ, அதற்கு மேலோ தண்டனை பெற்றால், தீர்ப்பு வழங்கப்பட்ட நாளிலேயே அவர்கள் தாமாகவே பதவி இழந்து விடுவார்கள் என சுப்ரீம் கோர்ட்டு கடந்த ஜூலை மாதம் 10–ந் தேதி அதிரடி தீர்ப்பு அளித்தது. தற்போது லாலு பிரசாத் யாதவ் குற்றவாளி என்று அறிவிக்கப்பட்டுள்ளதால் அவரது மக்களவை உறுப்பினர் பதவி பறிக்கப்பட வாய்ப்புள்ளது.முன்னதாக இந்த வழக்கில் இன்று தீர்ப்பு வழங்கப்பட இருந்ததால் சிபிஐ சிறப்பு நீதிமன்ற வளாகத்தில் பலத்த பாதுகாப்பு போடப்பட்டிருந்தது.

-- தினத்தந்தி