முருகன் ஆனந்தக் களிப்பு

**சாமி** · **சாமி** Sun Sep 22, 2013 8:50 am

கி.பி.1885-இல் மதுரை மாவட்டம் திருமங்கலம் வட்டம் கெஞ்சம்பட்டி கிராமம் உள்கடை நல்லையத்தேவன்பட்டி (மாஜி) நாட்டாண்மை வையாபுரித் தேவர் குமாரர் பழனியாண்டித் தேவர் திருப்பரங்குன்றம் சிவசுப்பிரமணியர் மீது, "ஸ்ரீமுருகன் ஆனந்தக் களிப்பு' என்னும் பெயரில் பல பாடல்களை ஏட்டில் எழுதி வைத்திருந்தார்.

அவருடைய குமாரர்களாகிய நா.மு. கந்தசாமித் தேவர், மு.க.சுப்பையாத் தேவர் ஆகியோர் 1949-இல் மதுரை ஸ்ரீமுருக விலாஸ் அச்சகத்தில் அப்பாடல்களை அச்சிட்டு நூல் வடிவில் கொண்டு வந்தனர். 24 பக்கமுள்ள அச்சிறு நூலுக்குக் காரைக்கேணி ஜோதிடர் கோ.கோபால் தேவர் முன்னுரையும், கண்டியதேவன்பட்டி நா.முத்துக் கருப்பத் தேவர் மகன் சுப்பையாத் தேவர் எண்சீர் கழிநெடிலடி ஆசிரிய விருத்தம் ஒன்றும், காரைக்கேணியைச் சேர்ந்த கோ.பாகுடியாத் தேவரின் சாற்றுக்கவி ஒன்றும் இடம்பெற்றுள்ளன.

எல்லாக் காலத்திலும் சமகாலம் மோசம் என்று எண்ணும் போக்கு இருப்பதற்குச் சான்றாக ஏறத்தாழ 120 ஆண்டுகளுக்கு முன் பழனியாண்டித் தேவர் எழுதியுள்ள பின்வரும் அடிகளைக் காணலாம்.
""தருமநெறி யறியாத காலம் - பெற்ற
தாய்தந்தை குருமொழியைத் தவறுமிது காலம்
பெரியோரை மதியாத காலம் - கொண்ட
பெண்டாட்டி சொல்கேட்டு பிழைக்குமிது காலம்
அரிசிவனை நினையாத காலம் - வீணே
அகம்பேசிக் கொண்டுவரும் அனியாயக் காலம்''

தொடர்ந்து மேலும் 17 அடிகளில் தாம் வாழுங் காலத்தைப் பழித்துரைத்தாலும்,
"வேதாந்த மூர்த்தியே கேளும் - செல்வம்
விளங்குமென் னகந்தனிலே விளையா டென்னாளும்
மாதாந்தக் கார்த்திகைக்கு யாரும் - உந்தன்
மலைதேடி வருபவருக்கு வறுமைபிணி தீரும்
வேலாயு தன்கிருபை யாலே - பூமி
விளைவாகி வளருமெனக் கழகாய்மென் மேலே''
என நம்பிக்கையுடன் பாடுகிறார்.

மூல நூலின் ஏட்டுப் பிரதி தெளிவின்றி இருந்தாலும் அச்சிலேற்றும்போது கூடுதல் கவனம் செலுத்தியிருக்கலாம். பாடலின் நயம் கருதிப் பொருள் மாறுபாடு கொண்டவர்களும் பாடலைச் சுவைப்பதுண்டு. அவ்வகையில், "ஸ்ரீமுருகன் ஆனந்தக் களிப்பு' என்ற இச்சிறு நூலும் படிப்போர்க்கு இன்பம் நல்கி, ஆனந்தம் தரத்தக்கதாய் அமைந்துள்ளது.

நன்றி - தினமணி - தெ. சுந்தரமகாலிங்கம்

முருகன் ஆனந்தக் களிப்பு

முருகன் ஆனந்தக் களிப்பு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக