"ஊசி போடுவது எங்கள் வேலையல்ல' பயிற்சி டாக்டர்கள் போராட்டம்

First topic message reminder :



சென்னை:"ஊசி போடுவது எங்கள் வேலையல்ல; அரசு உத்தரவுப்படி, அதற்கு ஒப்பந்த ஆட்களை நியமிக்க வேண்டும்' என கோரி, சென்னை, கீழ்ப்பாக்கம் அரசு மருத்துவமனையில், பயிற்சி டாக்டர்கள், பணிகளை புறக்கணித்து போராட்டம் நடத்தினர்.

"ஊசி போடுதல், ரத்தம் எடுத்தல் போன்ற பணிகள், எங்கள் வேலையல்ல; 36 மணி நேர வேலையை, "ஷிப்டு' முறைக்கு மாற்ற வேண்டும்' என கோரி, மாநிலம் முழுவதும், பயிற்சி டாக்டர்கள் போராட்டம் நடத்தினர். இதையடுத்து, சுகாதார துறை செயலர் உத்தரவுப்படி, ஊசி போடுதல் போன்ற பணிகளிலிருந்து, அவர்கள் விடுவிக்கப்பட்டனர்.

சென்னை அரசு பொது மருத்துவமனையில், ஊசி போட ஒப்பந்த நர்சுகள் நியமிக்கப்பட்டனர். கீழ்ப்பாக்கம் அரசு மருத்துவமனையிலும் இந்த நடைமுறையை பின்பற்ற கோரி, பயிற்சி டாக்டர்கள் நேற்று காலை, "டீன்' அலுவலகத்தை முற்றுகையிட்டனர். பின், பணிகளை புறக்கணித்து, மருத்துவமனை வாயிலில், தர்ணா நடத்தினர்.

"டீன்' ராமகிருஷ்ணன் மற்றும் பேராசிரியர்கள், மாணவர்களுடன் பேச்சு நடத்தியும், உடன்பாடு ஏற்படாததால், பயிற்சி டாக்டர்கள் தொடர்ந்து போராட்டத்தில் ஈடுபட்டுள்ளனர்.

பயிற்சி டாக்டர்கள் கூறுகையில், "ஒன்றரை மாதமாகியும், அரசு உத்தரவை அமல்படுத்த நிர்வாகம் மறுத்து வருகிறது. ஊசி போட, ஒப்பந்த நர்சுகளை நியமிக்க மறுக்கின்றனர். எழுத்து பூர்வமாக எந்த உத்தரவாதமும் தரப்படவில்லை. மூன்று மாதங்களாக, எங்களுக்கான ஊக்க தொகையும் தரப்படவில்லை' என்றனர்.

"டீன்' ராமகிருஷ்ணன் கூறியதாவது:

"விருப்பம் இல்லாவிடில் ஊசி போட வேண்டாம்' என, பயிற்சி டாக்டர்களுக்கு கூறியுள்ளோம். யாராவது நிர்பந்தம் செய்தால் எங்களிடம் தெரிவிக்கலாம். துறை தலைவர்கள், ஒப்பந்த நர்சுகள் தேவையென பரிந்துரைத்தால், நடவடிக்கை எடுக்க தயாராக உள்ளோம். அப்படி ஒரு பரிந்துரையும் வரவில்லை.

பயிற்சி டாக்டர்கள், துறை தலைவரிடமிருந்து வருகை சான்று பெற்று தந்தால், ஊக்க தொகை தந்து விடுவோம். அதில் எந்த பிரச்னையும் இல்லை. அவர்கள் தேவையின்றி போராட்டம் நடத்துகின்றனர். நோயாளிகளுக்கு எந்த வகையிலும் பாதிப்பு இல்லை.

இவ்வாறு, அவர் தெரிவித்தார்.

என்ன தான் நடக்குது இந்த நாட்டில்? எங்கு பார்த்தாலும் பிரச்சனை அட்டூழியம்..........