உலக மல்யுத்தம்: வெள்ளி வென்றார் அமித் குமார்

DERAR BABU · DERAR BABU Tue Sep 17, 2013 6:01 pm

புடாபெஸ்ட்: உலக மல்யுத்த சாம்பியன்ஷிப் தொடரில் இந்தியாவின் அமித் குமார், வெள்ளிப்பதக்கம் வென்றார்.
ஹங்கேரியின் புடாபெஸ்ட் நகரில் உலக மல்யத்த சாம்பியன்ஷிப் தொடர் நடக்கிறது. இதில், இந்தியா சார்பில் 22 பேர் பங்கேற்கின்றனர். "பிரீஸ்டைல்' 55 கி.கி., எடைப் பிரிவின் அரையிறுதியில் ரஷ்யாவின் அலெஸ்மோவை வீழ்த்திய ஆசிய சாம்பியன் அமித் குமார், பைனலுக்கு முன்னேறினார். பைனலில், முன்னாள் வெண்கல வீரரான ஈரானின் ஹசன் பார்மனை எதிர்கொண்டார்.
பரபரப்பாக நடந்த இந்த போட்டியில் முதல் பாதியில் துவக்கத்திலேயே அமித் குமார் 1 புள்ளி பெற்றார். பின் எழுச்சி பெற்ற ஹசன், அமித் குமாரின் வலது காலை பிடித்து எல்லை கோட்டுக்கு வெளியே தள்ள, போட்டி 1-1 என சமநிலையை எட்டியது.
இரண்டாவது பாதியில் ஹசன் ஒரு புள்ளி பெற்று முன்னிலை பெற, கடைசி வரை போராடிய அமித் குமாரால் புள்ளி எதுவும் பெற முடியவில்லை, இதையடுத்து அமித் குமார் 1-2 என்ற கணக்கில் தோல்வியடைந்து வெள்ளிப்பதக்கத்தை வென்றார்.
இதன் மூலம் ஈரானின் ஹசன் பார்மா தங்கப்பதக்கத்தை தட்டிச்சென்றார். தவிர, கடந்த 2012 ஒலிம்பிக்கில் அமித் குமாரிடம் அடைந்த தோல்விக்கு தற்போது பழிதீர்த்துக்கொண்டார். இப்பிரிவில் துருக்கியின் ஷீசர், ரஷ்யாவின் நாரிமன் ஆகயோர் வெண்கலப்பதக்கம் வென்றனர்.

தினமலர்