சங்கடம் தீர்க்கும் சகுனங்கள்

வீட்டில் ஒட்டடை தொங்க கூடாது. அது நலல சகுனம் இல்லை. கிருஷ்ண பரமாத்மாவின் வீட்டில் ஏதோ காரணத்தால் கிருஷ்ணரின் அறையை சரியாகப் பராமரிக்காமல் இருந்தார்கள் பணியாளர்கள். சமையலறையும் அலங்கோலமாக இருந்தது. சாதத்தில் புழு பூச்சிகள் ஊர்ந்து கொண்டு இருந்தது. அதை அறிந்த கிருஷ்ண பரமாத்மா, ஏதோ விபரீதம் நடக்கப் போகிறது என்று தெரிந்து கொண்டார். எந்த அளவுக்கு நாம் குடி இருக்கும் வீடு சுத்தமாக இருக்கிறதோ, அந்த அளவுக்கு லக்ஷ்மி கடாட்சம் ஏற்படும். அந்த இல்லத்தில் வசிப்பவர்களுக்கு நல்லவை தடையில்லாமல் நடக்கும்.

வீட்டின் உள்ளே ஆங்காங்கே துணிகளை இறைத்துப் போடக் கூடாது. ஒரே இடத்தில் நன்றாக அடுக்கி வைக்க வேண்டும்.

கோயிலில் சாம்பிராணி போடும் நேரத்தில் சென்றால், நமக்கு இருக்கும் தொல்லை நீங்கும். நம் வீட்டில் சாம்பிராணி புகை போட்டால், எவ்வாறு பூவின் வாசத்தை அறிந்து தேனீக்கள் வருகின்றதோ அது போல நமக்கு லாபகரமான விஷயங்கள் தேடிவரும்.

வீட்டிற்கு யாராவது வந்து சென்ற உடனேயே கழுவித் தள்ளக் கூடாது. சுப தினங்களில் வீட்டைக் கழுவவும் கூடாது. முன் தினமே சுத்தப்படுத்திவிட வேண்டும்.

காக்கையின் இறகோ, அல்லது அதன் எச்சமோ நம்மேல் விழுந்தால், ஏதோ குறை வரப் போகிறது என்று அர்த்தம். பரிகாரமாக, சனீஸ்வர பகவானின் ஆலயத்தில் நல்லெண்ணெயால் தீபம் ஏற்றினால், பாதகனத்தைத் தடுக்கலாம்.

பசுவின் பாதம் ஓர் இல்லத்தில் பட்டால் அந்த இல்லத்தில் நல்ல நிகழ்ச்சிகள் நடக்கும். ஒரு வீட்டைத் தேடி பசுமாடு தானாக வந்தால், அந்த இல்லத்தில் நீண்ட நாளாக இருந்த பிரச்னை விலகும். தடைப்பட்ட சுபகாரியங்கள் தடையில்லாமல் நடக்கும். பசு நடந்த பாதையில் நாம் நடந்தால் புண்ணியங்கள் ஏற்படும். ஏதே போல பசுமாடு நடக்கும் போது அதன் கால்பட்டுப் பறக்கும் மண் நம்மேல் பட்டால், நமது சரீரத்தைப் பிடித்திருந்த தோஷங்கள் எல்லாம் விலகிவிடும். அதனை 'கோதூளி' என்கிறது சாஸ்திரம். கோ என்றால் பசு. தூளி என்றால் தூசி. பசு மாட்டின் கால்பட்ட தூசிக்கு சக்தி அதிகம். ஆலயத்திற்கும் அங்கு இருக்கும் இறைவனுக்கும் சக்தி இருந்தாலும் அந்த ஆலயத்திற்குப் பல பேர் வந்து செல்வதால், அந்த ஆலயத்திற்கும் தோஷங்கள் ஏற்பட வாய்ப்பிருக்கிறது. அதனால் பன்னிரண்டு வருடங்கள் ஆன பிறகு கும்பாபிஷேகம் செய்வார்கள். அதுபோல தினமும் பசு மாட்டை ஆலயத்தைச் சுற்றி வரவும் செய்தார்கள் நம் முன்னோர்கள். அதனால்தான் இன்றும் சில ஆலயங்களில் பசு மாட்டை வளர்க்கிறார்கள். அது சிறிது நேரமாவது அந்த ஆலயத்திற்குள் வாக்கிங் போகும் இல்லையா!

குமுதம் பக்தி