உங்கள் குழந்தைக்கு தடுப்பூசி போட வேண்டுமா??

**மதுமிதா** · **மதுமிதா** Mon Aug 19, 2013 8:56 pm

தட்டம்மை, இளம்பிள்ளை வாதம் (போலியோ), காசநோய், தொண்டை அடைப்பான், கக்குவான் இருமல், வில்வாத ஜன்னி ஆகியவை, ஐந்து வயதுக்கு உள்பட்ட குழந்தைகளைத் தாக்கி பெரும் பாதிப்பை ஏற்படுத்தக்கூடிய நோய்களாகும்.

* சரியான நேரத்தில், சரியான அளவில், சரியான தடுப்பூசிகளைக் குழந்தைகளுக்குப் போடுவதன் மூலம் அவர்களைப் பல பெரிய உயிர்க்கொல்லி நோய்களில் இருந்து காப்பாற்ற முடியும்.

* சரியான நேரத்தில், தகுதியான மருத்துவரிடம், நல்ல குளிர் நிலையில் வைக்கப்பட்ட தடுப்பூசியைப் பயன்படுத்த வேண்டும். குறை மாதத்தில் பிறந்த குழந்தைக்கும் அட்டவணைப்படி தடுப்பூசி போடலாம்.

* பிறந்த தேதியில் இருந்து நாள்களைக் கணக்கிட்டு, எவ்வளவு எடை இருந்தாலும் நன்றாக இருக்கும் குழந்தைக்குக் கொடுக்கலாம்.

* எய்ட்ஸ் பாதித்த குழந்தைகளுக்கு உயிர்க்கொல்லி நோய்களின் பாதிப்பு அதிகமாகவும், அடிக்கடி வருவதால், அவர்களுக்குத் தடுப்பூசி போடுவது நல்லது.

* ஆனால், அவற்றின் எதிர்ப்பு சக்தி எப்படி உள்ளது என்பதைத் தெரிந்து கொடுக்க வேண்டும். அதனால், எய்ட்ஸ் வைரஸுக்கு சிகிச்சை அளித்த பிறகு மீண்டும் ஒருமுறை தடுப்பூசி போடுவது நல்லது.

* ஒரு ஊசியின் முதல் மற்றும் இரண்டாவது தவணைக்கு இடையேயான இடைவெளி அதிகமாகவிட்டால், மீண்டும் முதலில் இருந்து ஆரம்பிக்க வேண்டிய அவசியம் இல்லை.

* ஆனால், சில சமயங்களில் உறுதியாகவோ அல்லது என்ன ஊசி போட்டோம் என்றோ தெரியாதபட்சத்தில் முதலில் இருந்து ஊசியைப் போட வேண்டும்.

* காய்ச்சல், பேதி, சாதாரண சளி, சத்துகுறைவு போன்றவை இருந்தாலும் தடுப்பூசி போடலாம்.வெளிநாடு செல்ல நேர்ந்தால், எந்த நாடு என்பதைப் பொறுத்து தடுப்பூசி போட வேண்டும்.

* தென் அமெரிக்கா மற்றும் சில ஆப்பிரிக்க நாடுகளுக்குச் செல்வதாக இருந்தால் மஞ்சள் காய்ச்சலுக்கான தடுப்பூசி போட வேண்டும். ஹஜ் யாத்திரை செல்பவர்கள், மெனிங்கோ காக்கல் தடுப்பூசி போட்டுக்கொள்ள வேண்டும்.

* தடுப்பூசி போடப்பட்ட குழந்தைக்கு உடனேயே தாய்ப்பால் கொடுக்கலாம். சில நேரங்களில், சில விரும்பத்தக்காத பின்விளைவுகள் சில குழந்தைகளுக்கு மட்டுமே ஏற்படும்.

* தடுப்பூசிகைளை குளிர்சாதனப் பெட்டியில் வைத்து ஒவ்வொருவருக்கும் தனித்தனி சிரிஞ்சை பயன்படுத்தி மருத்துவரின் மேற்பார்வையில் தடுப்பூசி போட்டால் எந்தப் பாதிப்பும் வராது.

* அப்படியே வந்தாலும் மருத்துவர்கள் தங்களிடம் உள்ள மாற்று மருந்துகளைக் கொடுத்து குழந்தையைக் காப்பாற்றிவிடுவார்கள்.

தடுப்பூசியின் அவசியத்தை உணர்ந்து உங்கள் குழந்தைகளின் நலம் பேணுங்கள்.

நன்றி முகநூல்