மதுரை ராணி மங்கம்மாள் அரண்மனைக்கு சேதம்,,

**டார்வின்** · **டார்வின்** Fri Aug 16, 2013 3:16 pm

மதுரையில் பொதுப்பணித் துறை அலுவலகம் ஒன்று இயங்கிவந்த ராணி மங்கம்மாள் அரண்மனையின் சில பகுதிகள் அண்மையில் இடிக்கப்பட்டுள்ளன.
இந்த அரண்மனையை ஒட்டிய இடத்தை வாங்கியதாகக் கூறும் ஒருவர், இந்த அரண்மனையின் பின் பக்கத்தில் சில பகுதிகளை இடித்திருப்பது வெளியில் தெரியவந்ததை அடுத்து, தமிழக பொலிசார் ஆறு பேர் மீது நடவடிக்கை எடுத்துள்ளனர்.

நடந்தது என்ன?
இடிக்கப்பட்ட இடங்களை மீண்டும் கட்டித்தருவதாக உத்திரவாதம் தந்து இடித்தவர் பிணையில் வெளியில் வந்துள்ளார்.
இந்நிலையில், இந்த அரண்மனை இந்தியத் தொல்லியல் துறையுடைய பராமரிப்பின் கீழ் கொண்டுவரப்பட வேண்டும் என போராடிவருவதாக மதுரை திருமலை நாயக்கர் சமூக நல சங்கத்தின் தலைவர் எல். ராதாகிருஷ்ணன் கூறுகிறார்.
மாவட்ட ஆட்சியாளரின் பரிந்துரைக்குப் பின்னர்தான் இந்தக் கட்டிடத்தை தொல்லியல்துறை பொறுப்பேற்க முடியும் என்றும் அதற்கான நடவடிக்கைகள் இன்னும் ஆரம்பிக்கப்படவில்லை என்றும் அவர் தமிழோசையிடம் தெரிவித்தார்

அவலத்தின் காரணங்கள்,,
இந்திய சமூகத்தில் பாரம்பரியச் சின்னங்கள் பற்றிய விழிப்புணர்வு இல்லாது இருப்பதும், அவற்றைப் பாதுகாக்க வேண்டும் என்ற உணர்வு இல்லாதிருப்பதும், இந்தியாவின் ஏராளமான பாரம்பரியச் சின்னங்களை பாதுகாப்பதற்குரிய நிதி வசதி இல்லாதிருப்பதுமே பாரம்பரியச் சின்னங்கள் பாதிக்கப்படுவதற்குரிய காரணங்கள் என இந்திய கலை மற்றும் பண்பாட்டு பாரம்பரியச் சின்னங்கள் அமைப்பான இண்டாக்கின் மதுரை மாவட்ட அமைப்பாளர் அரவிந்த் குமார் ஷங்கர் கூறினார்.
மாவட்டம் தோறும் குழுக்களை அமைத்து அங்குள்ள பாரம்பரியச் சின்னங்களை ஆவணப்படுத்தி அவற்றைப் பாதுகாப்பதற்குரிய ஒருங்கிணைந்த நடவடிக்கைகளை அரசாங்கமும் சிவில் சமூகமும் சேர்ந்து மேற்கொண்டால்தான் இந்நிலை மாறும் என அவர் தமிழோசையிடம் தெரிவித்தார்,

ராணி மங்கம்மாள் யார்?
தமிழகத்தின் சரித்திரத்தில் ஆட்சி செய்த பெண் அரசிகள் என்றால் மிகச் சிலரே, அந்த ஒரு சிலரில் அரசியல் சாதுரியத்துக்காகவும், ஆட்சித் திறனுக்காகவும், நிர்வாகத்துக்காகவும் பேர் வாங்கியவர் மதுரையை ஆண்ட நாயக்க மன்னர்கள் வழிவந்த ராணி மங்கம்மாள் ஆவார். முகலாயப் பேரரசின் அச்சுறுத்தல் இருந்த சமயத்தில், மதுரை நாயக்கர் சமஸ்தானத்தை திறம்பட ஆண்ட வீரமங்கை இவரென சரித்திரம் சொல்கிறது.
அந்தக் காலத்திலேயே மதுரையிலிருந்து அண்டை மாவட்டங்கள் பலவற்றுக்கு சாலைகளையும், வழிப்போக்கர்களுக்கான சத்திரங்களையும் அமைத்தவர் மங்கம்மாள்.
17ஆவது நூற்றாண்டின் பிற்பகுதியில் வாழ்ந்த மங்கம்மாள் காலத்துக் கட்டிடங்கள் மதுரையில் இன்றும் பல இடங்களில் நிற்கின்றன.

பி‌பி‌சி தமிழ் ,,,

மதுரை ராணி மங்கம்மாள் அரண்மனைக்கு சேதம்,,

மதுரை ராணி மங்கம்மாள் அரண்மனைக்கு சேதம்,,

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக