ரூ.50 கோடி மதிப்புள்ள மரகத லிங்கம் சென்னையில் பறிமுதல்

ரூ.50 கோடி மதிப்புள்ள மரகத லிங்கம் சென்னையில் பறிமுதல்

திருத்துறைப்பூண்டி திருக்கோயிலில் கொள்ளையடிக்கப்பட்ட சுமார் ரூ.50 கோடி மதிப்புள்ள பழைமையான மரகத லிங்கம் சென்னையில் பறிமுதல் செய்யப்பட்டது. அவற்றை கோயம்பேட்டில் விற்க முயன்ற இரண்டு வாலிபர்களையும் போலீசார் கைது செய்து விசாரணை நடத்தி வருகின்றனர்.



இது குறித்து சென்னையில் செய்தியாளர்களிடம் பேசிய சிலைகள் தடுப்பு பிரிவு கூடுதல் டிஜிபி திலகவதி,


பண்டைய சோழர்கள் காலத்தில் வேதாரண்யம், திருக்குவழை, திருக்கரவாசல், திருவாரூர், திருநள்ளாறு, நாகப்பட்டினம், திருவாயுமூர் ஆகிய 7 இடங்களில் உள்ள திருக்கோவில்களில் விலைமதிப்பில்லாத மரகத லிங்கங்கள் வழிப்பாட்டிற்காக அமைக்கப்பட்டன.


இவற்றில் நாகப்பட்டினத்தில் உள்ள நீலாயதாட்சி அம்மன் திருக்கோயிலின் கோமேதக லிங்கம் 1992 ஆம் ஆண்டு திருடு போனது. அதே ஆண்டில் திருவாரூர் தியாகராஜ சுவாமி திருக்கோயிலிலும் மரகத லிங்கம் களவாடப்பட்டது. திருடு போன இந்த 2 லிங்கங்களும் இதுவரை கண்டுபிடிக்கப்படாமல் உள்ளது.


இந்த நிலையில் திருத்துறைப் பூண்டி திருக்கோயிலில் இருந்த மரகதலிங்கம் இந்த ஆண்டு பிப்ரவரி மாதம் 19ந் தேதி கொள்ளை போனது. இது தொடர்பாக சிலைகள் தடுப்பு பிரிவு போலீசார் தீவிர விசாரணை நடத்தி வந்தனர். ஐஜி ராஜேந்திரன் மேற்பார்வையில் டிஎஸ்பி செல்வராஜ் தலைமையில் இன்ஸ்பெக்டர் காதர் பாட்சா உள்ளிட்டோரைக் கொண்ட போலீஸ் தனிப்படையினர் இது தொடர்பாக விசாரித்து வந்தனர். தமிழ்நாடு, கேரளா, ஆந்திரா, கர்நாடகா ஆகிய மாநிலங்களில் தேடுதல் வேட்டை நடத்தப்பட்டது.


இந்த நிலையில் பட்டுக் கோட்டையை சேர்ந்தவர்கள் சென்னை கோயம்பேட்டுக்கு மரகதலிங்கம் விற்பனை செய்ய வருவதாக தகவல் கிடைத்தது. அங்கு சந்தேகத்திற்கு இடமான வகையில் இருந்த 2 பேரை போலீசார் பிடித்து விசாரித்தனர். அவர்களிடம் மரகதலிங்கம் இருந்தது போலீசாரால் கண்டுபிடிக்கப்பட்டு அவர்கள் இருவரும் கைது செய்யப்பட்டனர்.


அந்த லிங்கம் இவ்வாண்டு பிப்ரவரி மாதம் திருத்துறைப்பூண்டி கோயிலில் கொள்ளை போன மரகதலிங்கம் தான் என்பதை அந்த கோயிலின் குருக்களும், நிர்வாகத்தினரும் வந்து பார்த்து உறுதி செய்தனர். இதன் மதிப்பு சுமார் ரூ.50 கோடியாகும்.


இச்சிலையை விற்க முயன்ற பட்டுக்கோட்டையை சேர்ந்த ரமேஷ் (வயது 30), வலங்கைமானை சேர்ந்த செந்தில் (வயது 29) என்ற அந்த இரு வாலிபர்களையும் போலீசார் கைது செய்து தீவிர விசாரணை நடத்தி வருகின்றனர். இவர்களில் ரமேஷ் போலீஸ் ஜீப்பை எரிக்க முயன்ற வழக்கில் திருச்சி மத்திய சிறையில் அடைக்கப்பட்டவன் என்பதும், செந்தில் ஒரு கொலை வழக்கில் அதே சிறையில் அடைக்கப்பட்டவன் என்பதும் போலீஸ் விசாரணையில் தெரியவந்தது.


சிறையிலிருந்து வெளியே வந்த பிறகு இவர்கள் இருவரும் திட்டமிட்டு இந்த சிலை திருட்டில் ஈடுப்பட்டுள்ளனர். சிலிண்டர் உருளையை வெட்டி அதில் இவர்கள் இந்த மரகதலிங்கத்தை மறைத்து வைத்திருந்துள்ளனர். போலியான விலாசங்களை கொடுத்து 13 சிம் கார்டுகள் இவர்கள் வைத்திருந்ததும் கண்டுபிடிக்கப்பட்டு பறிமுதல் செய்யப்பட்டன.


இந்த சிலை திருட்டில் இவர்களுக்கு மூன்று அல்லது நான்கு கூட்டாளிகள் உதவி இருக்கலாம் என்று சந்தேகிக்கிறோம். அவர்களையும் கைது செய்ய போலீசார் நடவடிக்கை எடுத்து வருகின்றனர் என்று கூடுதல் டிஜிபி திலகவதி கூறினார்.

“சக்திவாய்ந்த லிங்கம் !”