தாலி சங்கிலியை பறித்த கொள்ளையனுடன் போராடிய ஆசிரியை பலி!

**மதுமிதா** · **மதுமிதா** Fri Jul 26, 2013 3:20 pm

மதுரையில் நேற்று ஆசிரியையின் கழுத்தில் கிடந்த தாலி சங்கிலியை ‘மர்ம’ நபர் பறிக்க முயன்றான். அப்போது சங்கிலி கழுத்தை இறுக்கியதால் ஆசிரியை பரிதாபமாக இறந்தார்.

மதுரை மேலபனங்காடி பகுதியை சேர்ந்தவர் ஜெயராணி (வயது 54). இவர் சிக்கந்தர் சாவடியில் உள்ள ஒரு தனியார் பள்ளியில் ஆசிரியையாக வேலை பார்த்தார். நேற்று காலை வழக்கம்போல் பள்ளிக்கு புறப்பட்டு அந்த வழியே மொபட்டில் ஆசிரியை ஜெயராணி சென்று கொண்டிருந்தார்.

அப்போது அங்கு வந்த ‘மர்ம’ நபர், மொபட்டை வழி மறித்துள்ளார். திடீரென அவன் ஆசிரியை மீது பாய்ந்து அவரது கழுத்தில் கிடந்த தாலி சங்கிலியை பறிக்க முயன்றுள்ளான். இதில் நிலை தடுமாறி கீழே விழுந்த ஆசிரியை ஜெய ராணி அவனிடம் இருந்து தாலியை காப்பாற்ற போராடினார். மேலும் உதவிக்கு பலரை அழைத்து கூக்குரலுமிட்டார்.

இதனால் ஆத்திரம் அடைந்த ‘மர்ம’ மனிதன் தனது பிடியை வேகமாக்கினான். அப்போது தாலி சங்கிலி ஆசிரியை ஜெயராணியின் கழுத்தை அறுத்தது. இதனால் அவரது கழுத்தில் இருந்து ரத்தம் கொட்டவே ‘மர்ம’ மனிதன் தப்பி ஓடிவிட்டான்.

உடனடியாக அக்கம் பக்கத்தில் உள்ளவர்கள் விரைந்து வந்து ரத்த வெள்ளத்தில் கிடந்த ஆசிரியை ஜெயராணியை மீட்டு, சிகிச்சைக்காக ஆஸ்பத்திரிக்கு அனுப்பி வைத்தனர். ஆனால் அங்கு தீவிர சிகிச்சை அளித்தும் பலனின்றி அவர் பரிதாபமாக இறந்தார்.

இதுகுறித்து கூடல்நகர் போலீசார் வழக்குப்பதிவு செய்து விசாரணை நடத்தி வருகின்றனர்.

newyarl