தமிழ்ப்பற்று மேடைப் பேச்சுக்கா?

தமிழ் இனத்தின் தனி அடையாளமே அதன் சீரிளமைத் திறம் வாய்ந்த தமிழ்மொழிதான். அதற்குச் செம்மொழி அந்தஸ்தும் வழங்கப்பட்டுவிட்டது. ஆனால் அந்தத் தமிழை மாநில அளவில் சிறப்பாக வைத்திருக்கிறோமா?

அரசு நிர்வாகத்தில் தமிழ்தான் கோலோச்சுகிறதா? அதிகாரிகள் குறைந்தபட்சம் தமிழிலாவது கோப்புகளில் கையெழுத்திடுகிறார்களா? நீதிமன்றத்தில் வழக்காடு மொழியாக தமிழ் இருக்கிறதா? தமிழ்நாட்டுப் பள்ளி, கல்லூரிகளில் பயிலும் எல்லோரும் தமிழ் படிக்கிறார்களா? தமிழ்நாட்டு ஆலயங்களில் தன்னைப்போல தமிழில் அர்ச்சனை செய்யப்படுகிறதா? செம்மொழி அந்தஸ்து வழங்கப்பட்ட மொழி ஏன் பல இடங்களில் இன்னமும் நுழையக்கூட முடியவில்லை?

இப்போது தமிழ்நாட்டில் தமிழே படிக்காமல் "முனைவர்' பட்டம்கூட வாங்கிவிடலாம்; ஆங்கிலம் படிக்காமல் ஒன்றாம் வகுப்புச் சான்றிதழ்கூட வாங்கமுடியாது!

அரசு ஊழியர்கள் "தமிழில் கையெழுத்துப்போடலாம்' என்ற ஆணையைத் தமிழக அரசு (ஆங்கிலத்தில்தான்) பிறப்பித்தது. தமிழக அரசின் பெரும்பான்மையான ஆணைகள் ஆங்கிலத்தில்தான் இருக்கின்றன. அரசு ஊழியர்களில் பெரும்பாலானவர்கள் இன்னமும் ஆங்கிலத்தில்தான் கையெழுத்திடுகின்றனர்!

நீதிமன்றங்களில் தமிழ் இன்னும் ஆட்சிமொழியாக அமலுக்கு வரவில்லை. அவ்வளவு ஏன், ஆளுநர் உரையைக்கூட ஆங்கிலத்தில் தயாரித்து அவர் படிக்கிறார், பிறகு பேரவைத் தலைவர் தமிழில் வாசிக்கிறார்.

நாடு சுதந்திரம் பெற்று 65 ஆண்டுகளுக்குப் பிறகும், மொழிவாரி மாநிலங்கள் அமைக்கப்பட்டு 56 ஆண்டுகள் கழிந்த பின்னும், தமிழ் என்கிற அடையாளத்தை முன்னிட்டு திராவிட இயக்கம் ஆட்சிக்கு வந்து 45 ஆண்டுகள் கழிந்த பிறகும் தமிழ் இன்னும் முற்றாக அரியணை ஏறவில்லையே என்கிற வேதனை வெளிப்பாடாகவே இந்த எண்ணங்கள் தோன்றுகின்றன.

பிறமொழிக் கலப்பில்லாத தூய தமிழைத் தமிழர்கள் பேசவும் படிக்கவும் எழுதவும் ஒரு மக்கள் இயக்கமே தேவைப்படுகிறது.

1953-இல் டால்மியாபுரத்துக்கு, கல்லக்குடி என்று பெயர் சூட்டக்கோரி மிகப்பெரிய போராட்டமே நடைபெற்றது. சட்டமன்றத்தில் தமிழ் இல்லை, மாநில நிர்வாகத்தில் தமிழ் இல்லை என்று அந்த இயக்கத்தார் ஆர்ப்பரித்தார்கள். 1967-இல் ஆட்சிக்கு வந்தது முதல் இன்றுவரை திராவிட இயக்கங்கள்தான் தமிழ்நாட்டை ஆண்டு வருகின்றன. தமிழ் முதன்மை பெற அவர்கள் ஆக்கப்பூர்வமாக செய்தது என்ன?

தபால் நிலையங்களிலும் ரயில் நிலையங்களிலும் ஹிந்தி எழுத்துகளைத் தார்கொண்டு அழித்துத் தங்களுடைய தமிழ்ப் பற்றைக் காட்டிக்கொண்டவர்கள் தமிழை ஆட்சி மொழியாக்கவும் பயிற்சி மொழியாக்கவும் அதே தீவிரத்தைப் பிறகு காட்டாதது ஏன்?

ஆந்திரம், கர்நாடகம் ஆகிய மாநிலங்களில் தெலுங்கையும் கன்னடத்தையும் படிக்காமல் முதல்வகுப்புச் சான்றிதழைக்கூட வாங்க முடியாது. கேரளத்தில் மலையாள வழியில் படிப்பவர்களுக்கு வேலைவாய்ப்புத் தேர்வில் தனி மதிப்பெண்கள் கொடுக்கப்படுகிறது.

தமிழக அரசின் தேர்வாணையத்தின் விதிப்படி தமிழே தெரியாமல் ஆங்கிலம் மட்டுமே தெரிந்த ஒருவர் தேர்வு எழுதி தேர்ச்சிபெற்று தமிழக அரசுப் பணியில் சேர்ந்துகொள்ளலாம். ஆனால் ஆங்கிலம் தெரியாமல் தமிழ் மட்டுமே தெரிந்த ஒருவர் தேர்ச்சி பெறவும்முடியாது, பணியில் சேரவும் முடியாது!

மருத்துவம், பொறியியல் போன்ற உயர் கல்வி படிக்க தமிழ்வழியில் பாடபுத்தகங்களை இயற்றாமல் ஆரம்பக் கல்வியில் மட்டும் தமிழைப் படிக்க வற்புறுத்துவதால் பயன் இல்லை. "கல்வியில் சிறந்த தமிழ்நாடு' என்ற பெயர் நிலைக்கவும் தமிழ் சிறக்கவும் ஆட்சியாளர்களும் அதிகாரிகளும் அமர்ந்து நல்லதொரு வழிகண்டாக வேண்டும்.

நன்றி-தினமணி-க.கார்த்திக்

சாமி wrote:மருத்துவம், பொறியியல் போன்ற உயர் கல்வி படிக்க தமிழ்வழியில் பாடபுத்தகங்களை இயற்றாமல் ஆரம்பக் கல்வியில் மட்டும் தமிழைப் படிக்க வற்புறுத்துவதால் பயன் இல்லை. "கல்வியில் சிறந்த தமிழ்நாடு' என்ற பெயர் நிலைக்கவும் தமிழ் சிறக்கவும் ஆட்சியாளர்களும் அதிகாரிகளும் அமர்ந்து நல்லதொரு வழிகண்டாக வேண்டும்.

கட்டுரையாளரின் ஆதங்கம் புரிகிறது , ஆனால் இவர் சொல்லுகிற ஆட்சியாளர்களும் அதிகாரிகளும் தமிழரே கிடையாதே பிறகெப்படி இவர்கள் அமர்ந்து வழிகாட்டுவார்கள்

ராஜா wrote:

சாமி wrote:மருத்துவம், பொறியியல் போன்ற உயர் கல்வி படிக்க தமிழ்வழியில் பாடபுத்தகங்களை இயற்றாமல் ஆரம்பக் கல்வியில் மட்டும் தமிழைப் படிக்க வற்புறுத்துவதால் பயன் இல்லை. "கல்வியில் சிறந்த தமிழ்நாடு' என்ற பெயர் நிலைக்கவும் தமிழ் சிறக்கவும் ஆட்சியாளர்களும் அதிகாரிகளும் அமர்ந்து நல்லதொரு வழிகண்டாக வேண்டும்.

கட்டுரையாளரின் ஆதங்கம் புரிகிறது , ஆனால்  இவர் சொல்லுகிற ஆட்சியாளர்களும் அதிகாரிகளும் தமிழரே கிடையாதே பிறகெப்படி இவர்கள் அமர்ந்து வழிகாட்டுவார்கள்

சரி தான் பாஸ். இது என்ன அவர்களுக்கு தெரியாதா? . உண்மையில் தமிழின் முன்னேற்றத்தில் அக்கறை உள்ள அரசுகளாக இருந்தால் இது என்றோ நடந்திருக்கும்.

சாமி wrote:
மருத்துவம், பொறியியல் போன்ற உயர் கல்வி படிக்க தமிழ்வழியில் பாடபுத்தகங்களை இயற்றாமல் ஆரம்பக் கல்வியில் மட்டும் தமிழைப் படிக்க வற்புறுத்துவதால் பயன் இல்லை.

நூற்றுக்கு நூறு உண்மை!

சாமி  அவர்களின் செய்தி கவனிக்கத் தக்கது ! மெடைப் பேச்சுதான் தமிழ் என்றே பலரும் நினைத்துக் கொண்டிருக்கிறார்கள் ! தமிழ்ப் பேராசிரியர்களைப் பார்த்து , “ஏன் தம்பி , உனக்கு ஒரு உத்தியோகம் கிடைக்கவில்லையா ?” என்று உறவினர் கேட்கும் நிலைதான் இன்றும் உள்ளது ! மேல் மட்டத்தில் உள்ளவர்கள்தான் இதில் அவசரமாகச் செயற்பட வேண்டும் !