சுற்றுலாப் பயணிகளின் மகிழ்ச்சித் தீவு

**Powenraj** · **Powenraj** Sat Jul 13, 2013 10:46 pm

இந்தோனேஷியா செல்லவேண்டும் என்கிற ஆவலில் சிங்கப்பூரிலிருந்து அதன் அருகில் உள்ள இந்தோனேஷியா தீவுகளில் ஒன்றான பாதம் தீவிற்கு சென்றேன். சிங்கப்பூரிலிருந்து பெர்ரி எனப்படும் படகு மூலமாக 15 நிமிடத்தில் பாதம் தீவினை அடைந்துவிடலாம். வழியில் பல தீவுகள். குறுக்கும் நெடுக்குமாகச் செல்லும் பல சரக்குக் கப்பல்களையும் பார்க்க பரவசமாக இருக்கும்.
தீவினுள் சென்று நகரைப் பார்த்தால் நமது ஊரில் உள்ள உணர்வே ஏற்படுகிறது. சாலைகளில் இரு சக்கர வாகனங்கள் அதிகம் காணப்படுகின்றன. பல ஆண்டுகளுக்குமுன் நமது ஊர்களில் ஒரு கழியின் இரு முனைகளிலும் உரிகளைப் போல் அமைத்து, அதில் தின்பண்டங்களை வைத்துக்கொண்டு தோளில் சுமந்தபடி கூவிக்கூவி விற்பார்களே! அதேபோன்ற காட்சியை அந்தத் தீவில் காணமுடிந்தது. விதவிதமான சுவையான சாக்லேட்டுகள் அதிகம் தயாரிக்கப்படுகின்றன.
மலாய் வம்சாவழியினர் அங்கு அதிகம் உள்ளனர். பகாசா இந்தோனேஷியா என்னும் மொழியினை பேசுகின்றனர். ஆங்கிலம் ஒருசிலருக்கு மட்டுமே ஓரளவு தெரிகிறது. "ஐலண்டு' என்பதை "இஸ்லாண்டு' என்றே உச்சரிக்கின்றனர். மீனவர்கள் அதிகம் வாழ்கிறார்கள். வீடுகளில் சிறுகடைகளை அமைத்துக் கொண்டு அதில் காய்கறிகள் மளிகைப் பொருட்கள், தின்பண்டங்களை விற்பனை செய்கிறார்கள். மண்சாலைகள் நிறைய காணப்படுகின்றன. சேறும் சகதியும் நிறைந்த பள்ளமான பகுதிகளில் பெரிய கட்டைகளை நட்டு அதன்மீது தகரம் வேய்ந்த சிறிய வீடுகளைக் கட்டி பலர் வாழ்கிறார்கள். மசாஜ் தொழில் கொடிகட்டிப் பறக்கிறது. விடுமுறை நாட்களில் பக்கத்து நாடுகளிலிருந்து பலர் அங்கு வந்து குவிந்து விடு
கின்றனர்.
நாட்டுப்புற நடன நிகழ்ச்சி ஒரு விடுதியின் அருகில் நடைபெற்றது. இருவர் கழைக்கூத்தாடிகள் போல் உடையணிந்து மேளத்திற்கு ஏற்றவாறு நடனமாடினர். எரியும் சூடத்தை வாயில் போட்டு அணைப்பது, தேங்காயைப் பல்லால் கடித்து உரிப்பது, கண்ணாடித் துண்டுகளை கடித்து தின்பது போன்ற செயல்களையும் செய்துகாட்டினர். வெளிநாட்டினர் பலர் அதை வியப்புடன் பார்த்து ரசித்தனர். நிகழ்ச்சி முடிவில் அவர்கள் இருவரும் கிண்ணம் ஏந்தி காசுகள் கேட்டனர்.
காலையில் எழுந்து நடந்து செல்லும்போதே கடைவீதியில் சிறுசிறு உணவகங்கள், கடைகள், மருந்தகங்கள், மோட்டார் வண்டிகள் பழுது பார்த்தல் ஆகியன சுறுசுறுப்பாக இயங்குவதைக் காண முடிகிறது.
நட்சத்திர உணவு விடுதிகள் நேர்த்தியாக உள்ளன. வரவேற்பறையில் பெரும்பாலும் பெண்களே பணியாற்றுகின்றனர். விடுதியின் அறையில் காணப்பட்ட அறிவிப்பு வியப்பாக இருந்தது. அறையைக் காலிசெய்யும் போது அறையில் உள்ள சிறு பொருட்களை யாரும் எடுத்துச் சென்றுவிடக்கூடாது என்பதை நாசுக்காக உணர்த்த அங்குள்ள அனைத்துப் பொருட்களின் பெயருடன் அதன் விலையையும் குறித்து வைத்துள்ளனர். தேவைப்படுவோர் பணம் செலுத்திப் பெற்றுக் கொள்ளலாம் என்ற குறிப்பு தனியே வழங்கப்படுகிறது. விடுதியின் உணவருந்தும் கூடங்களிலும் பெண்களே பணியாற்றுகின்றனர். பெண்கள் காட்டிய பரிவு மறக்கமுடியாதது.

தினமணி