ஆப்ரிக்க யானைகளுக்கு பேராபத்து 15 ஆண்டுகளில் அழியும் அபாயம்?

R.SAKTHIVEL · R.SAKTHIVEL Sun Oct 25, 2009 7:15 am

லண்டன்:இன்னும் 15 ஆண்டுகளில் ஆப்ரிக்க யானை இனம், முழுமையாக அழிந்து விடும் அபாயம் ஏற்பட்டுள்ளதாக சர்வதேச விலங்குகள் நல அமைப்பு எச்சரித்துள்ளது.உலகம் முழுவதும் உள்ள வனப் பகுதிகளில் ஏராளமான அரிய வகை விலங்குகள் வசிக்கின்றன.

இவற்றில், ஆப்ரிக்க யானைகள் மிகவும் பலம் பொருந்தியவை. அகன்ற காதுகள், மிக நீளமான தும்பிக்கை என, அவற்றை காணும்போதே அடி மனதில் ஒரு கலக்கம் ஏற்படும். தற்போது அதன் தந்தங்களே அந்த யானை இனத்தின் அழிவுக்கு காரணமாக அமைந்து விட்டது.ஆப்ரிக்க யானைகளின் விலை மதிப்பற்ற தந்தங்களுக்காக, அவற்றை பல சட்ட விரோத கும்பல்கள் வேட்டையாடி வருகின்றன.

கிழக்கு ஆப்ரிக்காவில் உள்ள சட்ட விரோதமான சில பகுதிகளில் ஆப்ரிக்க யானை தந்தங்கள், கரன்சியாக பயன்படுத்தப்படுகின்றன. இதனால், அவற்றை வேட்டையாடும் போக்கு அதிகரித்து வருகிறது.இதுகுறித்து, சர்வதேச விலங்குகள் நல நிதியகம் தெரிவித்துள்ளதாவது:

சர்வதேச அளவில் போதை மருந்து, ஆயுத கடத்தல் ஆகிய சட்ட விரோத வியாபாரம் தான், மிக அதிக விலை மதிப்பிற்கு நடக்கிறது. இவற்றுக்கு அடுத்த இடத்தை பிடித்துள்ளது யானை தந்தம் வியாபாரம். ஒரு ஆண்டுக்கு 60 ஆயிரம் கோடி ரூபாய் அளவுக்கு இந்த வியாபாரம் சர்வதேச அளவில் கொடி கட்டி பறக்கிறது. தினமும் 104 ஆப்ரிக்க யானைகள், தந்தங்களுக்காக வேட்டையாடப்படுகின்றன.

இந்த போக்கு தொடர்ந்தால், இன்னும் 15 ஆண்டுகளில் ஆப்ரிக்க யானை இனமே முழுவதுமாக இல்லாமல் அழிந்து விடும். அடுத்த தலைமுறைக்கு அந்த யானை இனத்தை, புகைப்படங்களில் மட்டுமே காட்டும் நிலை ஏற்படும்.

இதை தடுக்க, சர்வதேச நாடுகள் ஒருங்கிணைந்து செயல்பட வேண்டும். யானை தந்தங்கள் வியாபாரம் 20 ஆண்டுகளுக்கு முன்பே தடை செய்யப்பட்டுள்ளது. இந்த சட்ட விதிகளை மேலும் கடுமையாக்க வேண்டும்.இவ்வாறு அந்த அமைப்பு தெரிவித்துள்ளது.

mdkhan · mdkhan Sun Oct 25, 2009 8:53 am

நல்ல தகவல். யானைகளில் மிகவும் அழகு மிக்கது ஆப்ரிக்க யானைகள். அதை அழிவில் இருந்து காப்பாற்றாமல் விட்டுவிட்டால் பிற்காலத்தில் குழந்தைகள் எல்லாம் அதனை புகைபடங்களின் மட்டுமே பார்த்துக்கொள்ள வேண்டிய சூழ்நிலை ஏற்பட்டுவிடும்.

நன்றி சக்திவேல்.

...