பறக்க பிறந்த குழந்தை

மீனு · மீனு Sat Oct 24, 2009 8:52 pm

கோலாலம்பூர், அக். 24: நடுவானில் விமானத்தில் பிறந்த குழந்தைக்கு வாழ்நாள் முழுதும் இலவச விமான பயணச் சலுகையை ஏர் ஏசியா விமான நிறுவனம் அறிவித்துள்ளது. மகனின் பிறப்பால் தாய்க்கும் அந்த யோகம் கிடைத்துள்ளது.

மலேசியாவைச் சேர்ந்தவர் லியூ சியா யா. நிறைமாத கர்ப்பிணியாக இருந்த அவர், வடக்குப் பகுதி தீவான பினாங்கில் இருந்து போர்னியா நகருக்கு கடந்த புதன்கிழமை ஏர் ஏசியா விமானத்தில் பறந்தார். நடுவானில் லியூவுக்கு பிரசவ வலி வந்தது. விமானத்தை பாதி வழியில் கோலாலம்பூருக்கு திருப்பினார் பைலட்.

விமான நிலையத்தில் தரையிறங்கத் தயாரான நிலையில் 2,000 மீட்டர் உயரத்தில் விமானம் பறந்தபோது, லியூவுக்கு ஆண் குழந்தை பிறந்தது. விமானத்தில் இருந்த டாக்டர் பிரசவம் பார்க்க, பணிப்பெண்கள் உதவி செய்தனர். விமானம் தரையிறங்கியதும் தாயும், சேயும் மருத்துவமனையில் சேர்க்கப்பட்டனர்.

நடுவானில் பிறந்த குழந்தைக்கு பரிசளிக்க விரும்பிய ஏர் ஏசியா நிறுவனம், வாழ்நாள் முழுவதும் குழந்தையும், தாயும் தங்கள் நிறுவன விமானங்களில் இலவச பயணம் செய்ய அனுமதி அளித்தது.

இதுகுறித்து ஏர் ஏசியா நிறுவன செயல் இயக்குனர் மோசஸ் தேவநாயகம் கூறுகையில், ÔÔநடுவானில் குழந்தை பிறந்தை கொண்டாட விரும்பினோம். தாய்க்கும் சேய்க்கும் வாழ்நாள் முழுதும் இலவச விமான பாஸ் அளித்துள்ளோம் என்றார்.