இந்திய அணிக்கு ராஜ்புட் எச்சரிக்கை

""கடந்த ஆண்டு முத்தரப்பு ஒருநாள் கிரிக்கெட் தொடரில் அடைந்த தோல்விக்கு பழிதீர்க்க, ஆஸ்திரேலிய அணியினர் காத்திருக்கின்றனர். இதனால் இந்திய வீரர்கள் எச்சரிக்கையுடன் செயல்பட வேண்டும்,'' என இந்திய அணியின் முன்னாள் பயிற்சியாளர் லால்சந்த் ராஜ்புட் தெரிவித்து உள்ளார்.

இந்தியா, ஆஸ்திரேலியா அணிகள் மோதும் ஒரு நாள் தொடர் நாளை ஆரம்பமாகிறது. இத்தொடர் குறித்து இந்திய அணியின் முன்னாள் பயிற்சியாளர் லால்சந்த் ராஜ்புட் கூறியது: பொதுவாக ஆஸ்திரேலிய அணியினர் கண்காட்சி போட்டியில் தோல்வியடைவதைக் கூட விரும்ப மாட்டார்கள். கடந்த ஆண்டு ஆஸ்திரேலியாவில் நடந்த முத்தரப்பு ஒருநாள் தொடரில் அடைந்த தோல்வியை இப்போதும் மறந்திருக்க மாட்டார்கள் என்றே நினைக்கிறேன். ஆகையால் இதற்கு பழிதீர்க்க பாண்டிங் அணியினர் காத்துக் கொண்டிருப்பார்கள். இந்திய அணியினர் அவர்களை வீழ்த்துவது என்பது சிரமம் தான்.
துருப்புச் சீட்டு: ஆஸ்திரேலிய அணியின் கேப்டன் பாண்டிங், பிரட் லீ இருவரும், இந்த தொடரில் துருப்புச் சீட்டாக இருப்பார்கள் என நினைக்கிறேன். மற்றவர்களையும் லேசாக எடை போட வேண்டாம். அணியின் இளம் வீரர்கள், சுழற்பந்து வீச்சாளர் ஹாரிட்ஸ் போன்றவர்கள் சாம்பியன்ஸ் லீக் தொடரில் பங்கேற்று போதிய அனுபவத்துடன் உள்ளனர். ஆனால் இந்திய வீரர்கள் போதிய பயிற்சி இல்லாமல் உள்ளது எனக்கு பயமாக உள்ளது. இதனால் இந்திய அணியினர் அவர்களை எதிர்கொள்வது மிகவும் கடினமானது.

சேவக் நம்பிக்கை: காயத்திற்கு பின் மீண்டுள்ள சேவக், நம்பிக்கை தருகிறார். ஆனால் காம்பிரின் "பார்ம்' மட்டும் சற்று கவலையளிக்கிறது. ஏனெனில் இவர்கள் இருவரும் சேர்ந்து தரும் சிறப்பான துவக்கம், அடுத்து வரும் சச்சின், தோனி, யுவராஜ் போன்றவர்களுக்கும் உதவும்.

வெற்றி வாய்ப்பு: இந்த தொடரில் எந்த அணி 2-0, அல்லது 3-0 என முன்னிலை பெறுகிறதோ, அந்த அணி தொடரை வெல்ல பிரகாசமான வாய்ப்பு இருக்கும். தற்போது பவுலிங், பீல்டிங் பயிற்சியாளர்களை இந்திய வீரர்கள் இழந்துள்ளனர். இவர்கள் இல்லாத நிலையில் பவுலர்கள் சரியான இடத்தில் பந்து வீச வேண்டும், பீல்டர்களும் சரியாக தங்கள் பணியை செய்யவேண்டும். அப்போது தான் தொடரை வெல்ல முடியும்.

பயமாக உள்ளது: கடந்த "டுவென்டி-20' <உலக கோப்பை மற்றும் வெஸ்ட் இண்டீஸ் தொடர்களில், இந்திய இளம் வீரர்கள் "ஷார்ட் பிட்ச்' பந்துகளை சந்திக்க திணறினர். தற்போதைய தொடரில் அவர்கள் என்ன செய்யப்போகிறார்கள் என்பது பயமாக உள்ளது.
இவ்வாறு ராஜ்புட் தெரிவித்தார்.

தோனி காயம்: வதோதராவில் நேற்று பேட்டிங் பயிற்சியில் ஈடுபட்ட இந்திய கிரிக்கெட் அணி கேப்டன் தோனிக்கு இடது முழங்காலில் காயம் ஏற்பட்டது. ஆனால் பெரிய அளவில் பாதிப்பில்லை என்றார் தோனி. இது குறித்து அவர் கூறுகையில்,"" பயிற்சியின் போது முனாப் படேல் வீசிய பந்து முழங்காலில் தாக்கி காயம் ஏற்பட்டுள்ளது. இன்று குணமாகி விடும் என எண்ணுகிறேன்,'' என்றார்.