மும்பையில் பாலம், தண்ணீர் குழாய் விழுந்து ரயில் விபத்து: இரண்டு பேர் பலி

இளவரசன் · இளவரசன் Sat Oct 24, 2009 3:07 pm

தானே : மகாராஷ்டிராவில் சென்று கொண்டிருந்த ரயில் மீது, கட்டுமானப் பணிகள் நடந்து கொண்டிருந்த பாலம் மற்றும் பெரிய தண்ணீர் குழாய் ஆகியவை விழுந்த விபத்தில், இரண்டு பேர் உயிரிழந்தனர்; 11 பேர் காயமடைந்தாக அதிகாரிகள் தெரிவித்தனர். இதுகுறித்து அதிகாரிகள் கூறியதாவது: மகாராஷ்டிரா மாநிலம் மும்பையில் இருந்து 30 கி.மீ., தொலைவில், காலை 10.30 மணியளவில் இந்த விபத்து நிகழ்ந்தது. தானேயை கிழக்கில் இருந்து மேற்கு பகுதியை இணைக்கும் சாலை மேம்பாலத்திற்கு அருகில், கட்டப்பட்டு வந்த புதிய பாலம் இடிந்து ரயில் மீது விழுந்தது. பாலம் இடிந்து விழுந்ததும், அதற்கு இணையாக அருகில் இருந்த தண்ணீர் குழாயை தாங்கி பிடித்திருந்த ஆதாரம் தகர்ந்து, குழாயும் ரயில் மீது விழுந்தது.

பாலம் மற்றும் தண்ணீர் குழாயின் இடிபாடுகள், ரயிலின் முன்பகுதியில் இருந்த பெட்டிகள் மீது விழுந்தது. இதில், இரண்டு பேர் உயிரிழந்தனர். இதில் ஒருவர் மோட்டார்மேன் ராமசந்திரா என்றும், மற்றொருவர் அந்த ரயில் பயணித்தவரான சுபாஷ் நிகாம் என அடையாளம் காணப்பட்டுள்ளது. 11 பேர் காயமடைந்துள்ளனர். இச்சம்பவத்தால், குர்லா மற்றும் தானே இடையிலான ரயில் போக்குவரத்து பாதிக்கப்பட்டது. இவ்வாறு அதிகாரிகள் தெரிவித்தனர்.

இதுகுறித்து, மத்திய ரயில்வேயின் தலைமை மக்கள் தொடர்பு அதிகாரி எஸ்.முட்கெரிகர் கூறுகையில், "உயிரிழந்தவர்கள் குடும்பத்திற்கு ஐந்து லட்சம் ரூபாயும், படுகாயமடைந்தவர்களுக்கு ஒரு லட்சம் ரூபாயும், சிறியளவில் காயமடைந்தவர்களுக்கு 10 ஆயிரம் ரூபாயும் தருவதாக ரயில்வே அறிவித்துள்ளது. காயமடைந்தவர்களில் இரண்டு பேர் அபாய நிலையில் உள்ளனர். சம்பவ பகுதியில் மீட்பு நவடிக்கைகள் நடைபெற்று வருகின்றன' என்றார்