கணவருக்கு கோவில் கட்டி கும்பிடும் பெண்

ராஜு சரவணன் · ராஜு சரவணன் Tue Jun 25, 2013 9:49 pm

ஒருவனுக்கு ஒருத்தி என்பது தமிழர்களின் பண்பாடு. கணவனே கண் கண்ட தெய்வம், கல்லானாலும் கணவன், புல்லானாலும் புருஷன் என பண்டைய தமிழக பெண்கள் வாழ்ந்து வந்தனர்.

ஆனால் இன்றோ சமூகத்தில் நிலைமை மாறி விட்டது. குடும்ப உறவுகளின் ஆழமான பாசம் குறைந்து விட்டது. மனம் விட்டு பேசிக் கொள்வதற்கு கூட நேரமின்றி ஆண்களும், பெண்களும் உழைக்க தொடங்கி விட்டனர். பரஸ்பரம் பாசம், அன்பு செலுத்த முடியாத அளவில், அதற்கான நேரம் கூட இல்லாமல் உள்ளனர்.

ஆனால் இந்த அவசர காலத்திலும் கடலூர் மாவட்டம் பண்ருட்டி அருகே பணப்பாக்கம் என்ற கிராமத்தில் வசித்து வரும் லலிதா என்ற பெண் தனது கணவருக்காக கோயில் கட்டி கும்பிட்டு வருகிறார்.

அவர் கூறுகையில், எனது கணவர் பரமசிவம், 2000ம் ஆண்டில் காலமாகிவிட்டார். எங்கள் மீது அவர் மிகுந்த பாசம் வைத்திருந்தார். அவரது மறைவால் குடும்பமே சோகத்தில் ஆழ்ந்தது.

நான் மட்டும் எனது கணவர் என்னுடன் தான் இருக்கிறார் என்ற எண்ணத்தோடு வாழத் தொடங்கினேன். அவரது ஆசியோடு எனது பிள்ளைகளை படிக்க வைத்து திருமணம் செய்து வைத்தேன்.

எனது கணவரின் நினைவாக வீட்டிலேயே அவரது சிலையை உருவாக்கி கோயில் கட்டினேன். தினந்தோறும் அவருக்கு பூஜை செய்து வருகிறேன். எந்த நிகழ்வானாலும் அதை செய்வதற்கு முன்பு எனது கணவரின் கோயிலில் பூஜித்து விட்டுதான் செய்வேன் என்றார்.

நன்றி மனிதன்.காம்