வெற்றியை நெருங்கும் நேரத்தில் பா.ம.க., கனிமொழியை ஆதரிக்க முடியாது என கைவிரிப்பு

**சிவா** · **சிவா** Sat Jun 22, 2013 9:06 am

ராஜ்யசபா தேர்தலில், தி.மு.க.,வை மனிதநேய மக்கள் கட்சி, புதிய தமிழகம் ஆகிய இரு கட்சிகளும் அடுத்தடுத்து ஆதரவு தெரிவித்து, வேட்பாளர் கனிமொழி, வெற்றியை நெருங்கும் நேரத்தில், "அவரை ஆதரிக்க முடியாது' என, பா.ம.க., கைவிரித்து விட்டதால், தி.மு.க., அதிர்ச்சி அடைந்துள்ளது.

தமிழகத்திலிருந்து தேர்வு செய்யப்படும், ராஜ்யசபாவின், ஆறு எம்.பி.,க்களுக்கு, ஏழு பேர் போட்டியிடுகின்றனர். இவர்களில், அ.தி.மு.க.,வின், நான்கு வேட்பாளரும், இந்திய கம்யூனிஸ்ட் கட்சியின் ஒரு வேட்பாளரும் வெற்றி பெறுவது உறுதியாகியுள்ளது. இவர்களுக்கு தேவைப்படும், 170 ஓட்டுக்கு, அ.தி.மு.க.,விடம், 151 எம்.எல்.ஏ.,க்களும், இரு கம்யூனிஸ்ட் கட்சிகளிடம் இருக்கும், 18 எம்.எல்.ஏ.,க்கள் மற்றும் பார்வர்ட் பிளாக்கின் ஒரு எம்.எல்.ஏ., என, 170 பேர் கச்சிதமாக இருக்கின்றனர். இவர்கள் தவிர, தே.மு.தி.க., வின் அதிருப்தி எம்.எல்.ஏ.,க்கள், ஏழு பேரின் ஓட்டுக்களை அ.தி.மு.க., கூடுதலாக வைத்துள்ளது. தி.மு.க.,வுக்கு, 23 எம்.எல்.ஏ.,க்கள் உள்ளனர். மனிதநேய மக்கள் கட்சியின், இரு எம்.எல்.ஏ.,க்களும், புதிய தமிழகம் கட்சியின், இரு எம்.எல்.ஏ.,க்களும் தி.மு.க., வுக்கு ஆதரவு அளித்ததால், அக்கட்சிக்கு, 27 எம்.எல்.ஏ.,க்கள் ஆதரவு கிடைத்துள்ளது. தி.மு.க., வெற்றி பெற இன்னும், ஏழு எம்.எல்.ஏ.,க்களின் ஆதரவு தேவைப்படுகிறது.

பா.ம.க., அதிரடி அறிவிப்பு: தே.மு.தி.க.,வுக்கு, 22 எம்.எல்.ஏ.,க்கள் உள்ளனர். காங்கிரசுக்கு, ஐந்து எம்.எல். ஏ.,க்களும், பா.ம.க., விடம், மூன்று எம்.எல். ஏ.,க்களும் உள்ளனர். காங்கிரஸ் - பா.ம.க., ஆதரவு, தி.மு.க., மற்றும் தே.மு.தி.க.,வில் யாருக்குக் கிடைக்கிறதோ, அவர்கள் வெற்றிபெறும் நிலை இருந்தது. ஆனால், ராஜ்யசபா தேர்தலை புறக்கணிப்பதாக பா.ம.க., நேற்று அதிரடியாக அறிவித்துள்ளது. சென்னை, தி.நகரில் பா.ம.க., செயற்குழுக்கூட்டம் நேற்று நடந்தது. கூட்டத்திற்கு மாநில தலைவர் கோ.க.மணி தலைமை வகித்தார். முன்னாள் மத்திய அமைச்சர் அன்புமணி உட்பட செயற்குழு உறுப்பினர்கள் கலந்து கொண்டனர். கூட்டத்தில், "லோக்சபாதேர்தலை தனித்து சந்திக்கலாம்; ராஜ்யசபா தேர்தலில், எந்த கட்சிக்கும் ஆதரவு தெரிவிக்க வேண்டாம்' என, கட்சியினர் கருத்து தெரிவித்தனர். அதன் அடிப்படையில், "யாருக்கும் ஆதரவு இல்லை' என, பா.ம.க., செயற்குழுக் கூட்டத்தில் தீர்மானம் நிறைவேற்றப்பட்டுள்ளது.

மதில் மேல் பூனை: காங்கிரஸ் ஆதரவை தி.மு.க.,வும், தே.மு. தி.க.,வும் கேட்டுள்ளன. இந்த இரு கட்சிகளில், காங்கிரஸ் எந்த கட்சியை ஆதரிக்கும் என்பது மதில் மேல் பூனையாக உள்ளது. தி.மு.க., வுக்கு ஆதரவாக, காங்கிரஸ் ஓட்டு அளிக்க வேண்டுமானால், காங்., மேலிடம் விதிக்கும் சில நிபந்தனைகளை, தி.மு.க., ஏற்றுக்கொள்ள வேண்டும் என்ற பேச்சு வார்த்தை நடத்தப்பட்டுள்ளது. குறிப்பாக, லோக்சபா தேர்தலில், தி.மு.க., கூட்டணியில், காங்கிரசுக்கு, எத்தனை, "சீட்'கள் தரப்படும் என்பதும் காங்கிரஸ் விதிக்கும் நிபந்தனைகளில் ஒன்றாக கருதப்படுகிறது. அடுத்த ஆண்டு ஏப்ரல் மாதம், காங்கிரஸ் சார்பில், மத்திய அமைச்சர்கள் வாசன்,ஜெயந்தி நடராஜன் ஆகியோரின் பதவி காலியாகவுள்ளது. அப்போதைய ராஜ்யசபா தேர்தலில், காங்கிரஸ் கட்சியை ஆதரிக்க தி.மு.க., தயாரா என்ற பேச்சுவார்த்தையும் நடத்தப்பட்டுள்ளது.

மறு தேர்தல் நடக்குமா? இந்நிலையில்காங்கிரசின், ஐந்து எம்.எல்.ஏ.,க்களின் ஆதரவு, தி.மு.க.,வுக்கு கிடைத்தால், கனிமொழி வெற்றி பெறுவார். மாறாக, தே.மு.தி.க.,வுக்கு காங்கிரஸ் ஆதரவு கிடைத்தால், கனிமொழியும், தே.மு.தி.க., வேட்பாளர் இளங்கோவனும் சரி சமமாக, 27 ஓட்டுகளை பெறுவர். பா.ம.க., தேர்தலை புறக்கணித்துள்ள நிலையில், காங்கிரஸ் ஆதரவு தே.மு.தி.க.,விற்கு கிடைத்தாலும், அக்கட்சியின் வெற்றி வாய்ப்பை நிர்ணயிப்பது, ஏழு அதிருப்தி எம்.எல். ஏ.,க்களிடம் உள்ளது. இந்த, ஏழு பேரும், யாருக்கு ஓட்டு போடப் போகின்றனர் என்பது அ.தி. மு.க.,வுக்கு மட்டுமே தெரிந்த ரகசியம். எனவே, காங்கிரஸ் ஆதரவு தே.மு.தி.க.,விற்கு கிடைத்தாலும், ஆறாவது எம்.பி.,யை நிர்ணயம் செய்யும் துருப்பு சீட்டு அ.தி.மு.க.,விடம் உள்ளது என, கட்சி வட்டாரங்கள் தெரிவிக்கின்றன.
தினமலர்