"குடு குடு' மத்திய அமைச்சரவை

**சிவா** · **சிவா** Thu Jun 20, 2013 1:55 am

எல்லா கட்சிகளும், இளைஞர் அணி, இளைஞர் பாசறை, புதிய உறுப்பினர் சேர்க்கை என "இள ரத்தத்தை' பாய்ச்சிக்கொண்டு இருக்கும் போது, மத்தியில் ஆளும் காங்கிரஸ் தலைமையிலான அரசில், வயதானவர்கள் நிறைய இடம் பெற்று, "தள்ளாடி'க்கொண்டு இருக்கிறது.

கேபினட் அமைச்சர்களில் பிரதமர் மன்மோகன் சிங் உள்பட வயதானவர்களே அதிகம். இணை அமைச்சர்கள் மற்றும் தனிப்பொறுப்பு இணை அமைச்சர்கள் பட்டியலில் மட்டுமே, சற்று வயது குறைவானவர்கள் தென்படுகின்றனர்.கேபினட்டில் அதிக வயதானவராக தொழிலாளர் மற்றும் வேலை வாய்ப்புத்துறை அமைச்சர் சிஷ்ராம் ஓலா இருக்கிறார். இவரது வயது 86. அதிலும் இவர் தான், "லேட்டஸ்ட்' ஆக கேபினட் அமைச்சர் ஆனவர். இவரைத் தேடிப்பிடித்து அழைத்து வந்த, மன்மோகன் சிங்கை அவசியம் பாராட்ட வேண்டும். நல்ல வேளையாக இவரை, இளைஞர் நலத்துறை அமைச்சராக்காமல் விட்டார்கள்.

சராசரி வயது எவ்வளவு: குறைந்த வயதுடைய கேபினட் அமைச்சர் என்ற பெருமையை, கப்பல் போக்குவரத்துதுறை அமைச்சர் ஜி.கே.வாசன் பெறுகிறார். இவரது வயது 49. மொத்தம் உள்ள 32 கேபினட் அமைச்சர்களின் சராசரி வயது 68.56.தனிப்பொறுப்புடன் கூடிய இணை அமைச்சர்கள் பட்டியலில் அதிக வயதுடையவராக, நுகர்வோர் நலன் மற்றும் உணவு பதப்படுத்துதல் அமைச்சர் கே.வி.தாமஸ் இருக்கிறார். இவருக்கு வயது 68. குறைந்த வயதுடையவர், கார்ப்பரேட் நிறுவனங்கள் விவகாரத்துறை அமைச்சர் சச்சின் பைலட். இவரது வயது 36. மொத்தம் உள்ள 12 தனிப்பொறுப்புடன் கூடிய இணை அமைச்சர்களின் வயது சராசரி 55.58.

இணை அமைச்சர்களில் அதிக வயதுடையவராக, சமூக நலத்துறை அமைச்சர் மாணிக்ராவ் கவித் இருக்கிறார். இவருக்கு வயது 79. குறைந்த வயதுடையவராக தொலை தொடர்பு மற்றும் தகவல் தொழில்நுட்பத்துறை அமைச்சர் மிலிந் தியோரா இருக்கிறார். இவருக்கு வயது 37. மொத்தம் உள்ள 35 இணை அமைச்சர்களின் சராசரி வயது 56.28.அனைத்து அமைச்சர்களின் சராசரி வயது 61.15.

தினமலர்