வேலூர்: வேலூர் அருகே போலீஸ் போல் நடித்து கள்ள நோட்டு மாற்ற முயன்ற கும்பல்

வேலூர்: வேலூர் அருகே போலீஸ் போல் நடித்து கள்ள நோட்டு மாற்ற முயன்ற கும்பபை சேர்ந்த மூன்று பேரை போலீஸார் கைது செய்தனர். வேலூர் மாவட்டம் சோளிங்கர் பஸ் ஸ்டாண்ட் அருகே நேற்று (ஜன.,5) காலை 10 மணிக்கு பூங்காவனம் (65) என்ற பெண் நின்று கொண்டிருந்தார். அப்போது அவர் அருகே ஒரு "இனோவா' கார் வந்து நின்றது. காரில் இருந்து இறங்கிய இரண்டு பேர் வலுக்கட்டாயமாக பூங்காவனத்தை காரில் ஏற்றினர். இதை பார்த்த பொது மக்கள் பூங்காவனத்தை கடத்துவதாக நினைத்து காரை மடக்க முயன்றனர். ஆனால், கார் திருத்தணி செல்லும் ரோட்டில் வேகமாக சென்றது. பொது மக்கள் பைக்கில் காரை விரட்டி சென்று மடக்கினர் பிடித்தனர். அப்போது, காரில் இருந்து இரண்டு பேர் தப்பியோடினர். காரில் இருந்த பூங்காவனத்தை மீட்டனர். அப்போது, காரில் இருந்து மேலும் 3 பேர் தப்பி ஓட முயன்ற போது, அவர்களை பிடித்து அங்குள்ள மரத்தில் கட்டி வைத்து தர்ம அடி கொடுத்தனர். நாங்கள் போலீஸ், எங்களை அடிக்காதீர்கள் என மூன்று பேரும் கத்திய பின்பே அடிப்பதை நிறுத்தினர். தகவல் அறிந்த சோளிங்கர் போலீஸார் வந்து பார்த்த போது போலீஸ் சீருடை அணிந்த மூன்று பேரும் போலி போலீஸ் என தெரிந்தது. விசாரணையில், குடியாத்தத்தை சேர்ந்த முகமது அலி (33), அஷ்கர் அலி (24), கரிகிரியை சேர்ந்த டிரைவர் முருகன் (23) என தெரிந்தது. சிவகாசியை சேர்ந்த வடிவேலு என்பவர் கள்ள நோட்டுக்களை மாற்றுவாராம். அவரது கூட்டளிகளான இவர்கள் கள்ள நோட்டுக்களை எடுத்து கொண்டு காரில் சென்று, அவர்களது ஏஜன்ட்டுக்களிடம் கொடுத்து விட்டு நல்ல நோட்டுக்களை வாங்கி வருவார்களாம். இதற்காக முருகன் பல இடங்களில் கார்களை திருடி வந்துள்ளார். சோளிங்கர் பஜாரில் காரை திருடும் போது பூங்காவனம் பார்த்து விட்டார். இதனால், அவரை பிடித்த போது மூவரும் பிடிபட்டனர். பொதுமக்கள் சந்தேகம் அடையாமல் இருக்க போலீஸ் சீருடை அணிந்து கொண்டு இவர்கள் மூவரும் திருடிய காரில் சென்று கள்ள நோட்டுக்களை மாற்றுவார்களாம். வேலூர், திருவண்ணாமலை, திருவள்ளூர், காஞ்சிபுரம் ஆகிய மாவட்டங்களில் 5 ஆண்டுகளாக கள்ள நோட்டுக்களை இவர்கள் மாற்றி வருவதும், இவர்களுக்கு 40 ஏஜன்ட்டுக்கள் இருப்பதும் தெரிந்தது. மூன்று பேரையும் போலீஸார் கைது செய்து அவர்கள் வைத்திருந்த போலீஸ் சீருடை, பெல்ட், ஷூ, விசில் மற்றும் காரை பறிமுதல் செய்தனர்.