பெண்களுக்கு பாதுகாப்பான நகரம்: சென்னையை முந்தியது பெங்களூரு

பெண்களுக்கு பாதுகாப்பான நகரம்: சென்னையை முந்தியது பெங்களூரு
நாட்டில், பெண்கள் பாதுகாப்பாக வாழக் கூடிய நகரங்கள் பட்டியலில் சென்னை மூன்றாமிடம் பிடித்துள்ளது. முதலிடத்தை பெங்களூரும், இரண்டாமிடத்தை மும்பையும் பெற்றுள்ளன. ஆனால் தலைநகரான டில்லி, பெண்களின் பாதுகாப்பு மிகவும் குறைந்த நகராகக் குறிப்பிடப்பட்டுள்ளது. பெண்களுக்கு டில்லியில் பாதுகாப்பு இல்லை என்று 85 சதவீத பெண்கள் கருத்து தெரிவித்துள்ளனர்.

ஒரு பெண் இரவிலும் சாலையில் பாதுகாப்பாக எப்போது செல்ல முடியுமோ அதுதான் நாடு சுதந்திரம் பெற்றதற்கான அடையாளம் என்றார் மகாத்மா காந்தி. ஆனால், சுதந்திரம் அடைந்து 63 ஆண்டுகள் ஆன போதிலும் பெண்கள் பகலில் கூட தனியே செல்ல பயப்படக்கூடிய நிலை தான் உள்ளது.இதை நிரூபிக்கும் வகையில் பாலியல் தொல்லைகள் இருப்பதாக டில்லி அரசு, ஐக்கிய நாடுகள் சபை மற்றும் ஜகோரி தொண்டு நிறுவனம் ஆகியவை இணைந்து சமீபத்தில் நடத்திய ஆய்வில் தெரிய வந்துள்ளது.இந்த ஆய்வில், டில்லி, மும்பை, கோல்கட்டா, சென்னை, பெங்களூரு, ஐதராபாத், திருவனந்தபுரம், ஜெய்பூர், பாட்னா, புனே, சண்டிகார், கவுகாத்தி, புவனேஸ்வர் போன்ற நகரங்களில் பெண்களின் பாதுகாப்பு குறித்து ஒரு தனியார் இணைய தளம் ஓட்டெடுப்பு நடத்தியது.

இதில், நாட்டிலேயே பெங்களூரில் தான் பெண்களுக்கு அதிகபட்சமாக 25 சதவீதம் பாதுகாப்பு இருப்பதாக ஓட்டளித்துள்ளனர்.மும்பை இரண்டாவது இடமாக 24 சதவீதமும், சென்னை மூன்றாவதாக 16 சதவீதமும், ஐதராபாத் நான்காவதாக 15 சதவீதமும் பெண்கள் அதிக பாதுகாப்புடன் இருப்பதாக ஓட்டெடுப்பின் மூலம் தெரிய வந்துள்ளது. ஆனால், நாட்டின் தலைநகரான டில்லி பெண்களுக்கு பாதுகாப்பற்ற ஒரு நகரம் என்று கூறப்பட்டுள்ளது.நகரில் உள்ள பெண்களின் பாதுகாப்பு குறித்து டில்லியில் 5 ஆயிரத்திற்கும் மேற்பட்ட பெண்களிடம் ஆய்வு செய்யப்பட்டுள்ளது. இதில், தினசரி பாலியல் துன்புறுத்தல்களுக்கு உள்ளாவதாக ஐந்து பெண்களில் மூவர் கூறுகின்றனர். பஸ், ரயில் போன்ற போக்குவரத்து வாகனங்களில் செல்லும் போது பாலியல் துன்புறுத்தலுக்கு ஆளாவதாக 50 சதவீத பெண்கள் கூறியுள்ளனர். டில்லியில் வாழும் 85 சதவீத பெண்கள் இதே போன்ற மனநிலையில் தான் உள்ளனர்.

டில்லியை சேர்ந்த பிரகதி கூறுகையில்,"பெண்களுக்கு பாலியல் துன்புறுத்தல் பெரும்பாலும் பஸ்களில் தான் நடக்கிறது' என்றார்.

ஸ்வேதா கூறுகையில்,"சாலையில் நடந்து செல்லும் போது, மக்கள் நெருக்கம் அதிகமான மார்க்கெட் பகுதியில் பாலியல் துன்புறுத்தல்கள் நடக்கின்றன.இதன் மூலம் டில்லியில் வசிக்கும் பெரும்பாலான பெண்கள் சாலை, பஸ் ஸ்டாப்களிலும், பஸ்களில் செல்லும்போதும் பாதுகாப்பில்லாத நிலையில் இருப்பதாக உணர்கின்றனர் என்று தெரிய வருகிறது.டில்லி அரசின் பெண்கள் மற்றும் சிறுவர்கள் மேம்பாடு அமைச்சர் கிரண் வாலியா கூறுகையில்,"பெண்களுக்கெதிராக பாலியல் துன்புறுத்தல்களை தடுக்க பஸ்களில் "குளோஸ்டு சர்க்கியூட் டிவி' பொருத்துவதற்கு சிபாரிசு செய்யப்பட்டுள்ளது. மேலும், பாலியல் துன்புறுத்தல்கள் செய்பவர்கள் மீது ஜாமீனில் வெளிவர முடியாத அளவில் கடுமையான சட்டத்தை பார்லிமென்ட்டில் கொண்டு வர வேண்டும்' என்றார்......