சினிமா செய்திகள் - தினத்தந்தி

‘‘ரசிகர்கள் கோபம்; எனக்கு சந்தோஷம்!’’
-


சமீபத்தில் திரைக்கு வந்த ‘தேவராட்டம்’ படத்தில்
குரூரமான வில்லனாக நடித்தவர், ரகு ஆதித்யா.

விஜய் சேதுபதியின் தம்பியாக, ‘தர்மதுரை’ படத்தில்
நடித்து இருந்தார். தொடர்ந்து ‘சீமராஜா’ படத்தில் நடித்தார்.
‘தேவராட்டம்’ படத்தின் மூலம் மீண்டும் கவனிக்க வைத்து
இருக்கிறார். இதுபற்றி அவர் கூறுகிறார்:-

‘தேவராட்டம்’ படத்தை தியேட்டரில் போய் பார்த்தேன்.
என் கதாபாத்திரம் ரசிகர்களுக்கு கோபத்தை ஏற்படுத்தியது.
நான் சந்தோஷமாக அவர்களின் கோபத்தை ரசித்தேன்.

அடுத்து விஜய் சேதுபதியை வைத்து எங்கள் சொந்த பட
நிறுவனம் தயாரிக்கும் படத்தில், ஒரு முக்கியமான
கதாபாத்திரத்தில் நடிக்க இருக்கிறேன்’’ என்றார்.
-
தினத்தந்தி

14-வது மாடியில் வீடு வாங்கிய நடிகை தமன்னா ; சதுர அடி ரூ.80,778
-

-
மும்பை,

மும்பையின் மேற்கு புறநகர் பகுதியில் நடிகை ஒருவர் அதிக விலை கொடுத்து பிளாட் ஒன்று வாங்கி உள்ளார். பாகுபலி புகழ் நடிகை தமன்னா பாட்டியா சமீபத்தில் வெர்சோவாவில் சதுர அடி ரூ .80,778 க்கு ஒரு பிளாட் வாங்கி உள்ளார். இது இப்பகுதியில் உள்ள விலை விகிதத்தை விட இரண்டு மடங்கு அதிகமாகும். அபார்ட்மெண்ட் குடியிருப்பை பில்டர் சமீர் போஜ்வானியிடமிருந்து தமன்னா வாங்கியுள்ளார். தரகர்களின் கூற்றுப்படி, இந்த கட்டிடத்திலிருந்து 500 மீட்டர் தொலைவில் வரவிருக்கும் கட்டிடத்திற்கு சதுர அடி ரூ .35,000-40,000 ஆகும்.

கடந்த மாதம் கையெழுத்திடப்பட்ட ஒப்பந்தம் மற்றும் செய்தித்தாள் தகவல்படி 2,055 சதுர அடி பிளாட்டிற்கு ரூ .16.60 கோடி தமன்னா செலுத்தியதாகக் காட்டுகிறது.

அபார்ட்மெண்டிற்கான ஆயத்த கணக்கீட்டு விகிதம் ரூ.4.56 கோடி. அவர் பிளாட் பதிவு செய்வதற்கு ரூ.99.60 லட்சம் ஸ்டாம்ப் டூட்டியாக செலுத்தி உள்ளார். அவர் வாங்கிய பிளாட் ஜூஹு-வெர்சோவா இணைப்பு சாலையில் அமைந்துள்ள பேவியூ என்ற கட்டிடத்தின் 14 வது மாடியில் அமைந்துள்ளது. இந்த கட்டிடம் 22 அடுக்குமாடிகளை கொண்டது.

அவர் வாங்கிய பிளாட்டுடன் இரண்டு கார் பார்க் பகுதிகளும் கிடைத்துள்ளன. ஆவணங்களில் சமீர் போஜ்வானி விற்பனையாளராகவும், வாங்குபவராக தமன்னா பாட்டியாவும், தமன்னாவுடன் அவரது தாயார் ரஜ்னி பாட்டியாவும் வாங்குபவராக காட்டப்பட்டுள்ளது.

ஆவணங்களின் படி தமன்னாவின் தற்போதைய முகவரியாக லோகண்ட்வாலா வளாகம் காட்டப்பட்டு உள்ளது.
-
தினத்தந்தி

இரட்டை வேடங்களில், தனுஷ்!
-

-
தனுஷ் கை நிறைய படங்களை வைத்து இருக்கிறார்.
இருப்பினும், சிறந்த கதையம்சம் கொண்ட பட வாய்ப்பு
வந்தால், அதை தவிர்ப்பதில்லை.

அந்த வகையில் அவர் இப்போது, துரை செந்தில்குமார்
டைரக்‌ஷனில் ஒரு புதிய படத்தில் நடிக்க சம்மதித்து
இருக்கிறார். இந்த படத்தை சத்யஜோதி பிலிம்ஸ்
தயாரிக்கிறது.

இந்த நிறுவனம் ஏற்கனவே தனுசை வைத்து, ‘தொடரி’
என்ற படத்தை தயாரித்தது.

துரை செந்தில்குமார் டைரக்டு செய்யும் புதிய படத்தில்,
தனுஷ் இரட்டை வேடங்களில் நடிக்கிறார். அவருக்கு
ஜோடியாக மெஹ்ரீன் பிர்சடா நடிக்கிறார். இவர் இப்போது,
தெலுங்கு பட உலகில் பிரபல கதாநாயகியாக இருந்து
வருகிறார்!
-
-------------------------
தினத்தந்தி

விபத்தில் கால் முறிந்ததா?- நடிகை அனுஷ்கா விளக்கம்
-

-
தமிழ், தெலுங்கு பட உலகில் முன்னணி கதாநாயகியான அனுஷ்கா நடிப்பில் பாகுமதி படம் கடந்த வருடம் ஜனவரியில் திரைக்கு வந்தது. அதன்பிறகு அவருக்கு படங்கள் இல்லை. ‘இஞ்சி இடுப்பழகி’ படத்தில் உடல் எடையை கூட்டி நடித்து விட்டு பின்னர் அதை குறைக்க முடியாமல் கஷ்டப்பட்டார். கடும் உடற்பயிற்சிகள், உணவு கட்டுபாடு என்று எடை குறைப்பு முயற்சியில் ஈடுபட்டும் பலன் இல்லை.

இதனாலேயே அவருக்கு பட வாய்ப்புகள் குறைந்தன. அதன்பிறகு வெளிநாடு சென்று ஒரு மாதம் சிகிச்சை எடுத்து பழைய தோற்றத்துக்கு திரும்பினார். தற்போது மாதவன் ஜோடியாக ‘சைலன்ட்’ படத்தில் நடித்து வருகிறார். தமிழ், தெலுங்கு மொழிகளில் இது தயாராகிறது. அமிதாப்பச்சன், சிரஞ்சீவியுடன் ‘சைரா நரசிம்ம ரெட்டி’ படத்திலும் நடிக்கிறார்.

இதன் படப்பிடிப்பு ஆந்திராவில் நடந்தபோது அனுஷ்கா உயரத்தில் இருந்து கீழே தவறி விழுந்து கால் எலும்பு முறிந்ததாகவும் ஆஸ்பத்திரியில் அவருக்கு சிகிச்சை அளிக்கப்பட்டு சில நாட்கள் ஓய்வில் இருந்தார் என்றும் தகவல் வெளியானது. இதனால் நடிகர்-நடிகைகள் பலர் அனுஷ்காவை தொடர்புகொண்டு உடல் நலம் குறித்து விசாரிக்க ஆரம்பித்தனர்.

ரசிகர்களும் வலைத்தளத்தில் அனுஷ்காவின் நலம் விசாரித்தார்கள். இதைத்தொடர்ந்து அனுஷ்கா தனது டுவிட்டர் பக்கத்தில், “நான் உடல் நலத்தோடு ஆரோக்கியமாக இருக்கிறேன்” என்று கூறியிருக்கிறார்.
-
தினத்தந்தி

“அதிகம் பீர் குடித்ததால் படத்தில் இருந்து நீக்கினர்”-ராதிகா ஆப்தே வருத்தம்
-
தமிழில் தோனி, ஆல் இன் ஆல் அழகுராஜா, வெற்றி செல்வன்
ஆகிய படங்களில் நடித்தவர் ராதிகா ஆப்தே, கபாலி படத்தில்
ரஜினிகாந்துடன் ஜோடி சேர்ந்து மேலும் பிரபலமானார்.

தெலுங்கு, இந்தி படங்களில் நடித்து இருக்கிறார். தற்போது
2 ஹாலிவுட் படங்களில் நடித்து வருகிறார். அரைகுறை
உடையிலும் துணிச்சலாக நடிக்கிறார்.

இங்கிலாந்தை சேர்ந்த இசைக்கலைஞர் பெனட்டிக் டெய்லரை
காதலித்து திருமணம் செய்துகொண்டார். இந்த நிலையில்
தனது சினிமா அனுபவங்களை ராதிகா ஆப்தே பகிர்ந்தபோது,
அதிக பீர் குடித்ததற்காக ஒரு படத்தில் இருந்து நீக்கிவிட்டதாக
தெரிவித்தார்.

இதுகுறித்து அவர் கூறியதாவது:-

“ஆயுஷ்மன் இயக்கத்தில் இந்தியில் வெளியான
‘விக்கி டோனர்’ படத்துக்கு முதலில் என்னைத்தான்
கதாநாயகியாக ஒப்பந்தம் செய்து இருந்தனர். இந்த படத்தின்
படப்பிடிப்பை தொடங்குவதற்கு முன்னால் ஒரு மாத
விடுமுறையில் நான் வெளிநாடு சென்று இருந்தேன்.

அப்போது அதிகமாக பீர் குடித்தேன். நிறைய உணவுகளையும்
சாப்பிட்டேன்.

இதனால் எனது உடல் எடை கணிசமாக கூடியது. என் தோற்றத்தை
பார்த்ததும் இயக்குனர் அதிர்ச்சியானார். படத்தில் இருந்தும்
நீக்கிவிட்டார். நான் சில நாட்களில் எடையை குறைத்து விடுகிறேன்
என்று சொல்லியும் அவர் கேட்கவில்லை.

அதன்பிறகு உணவு விஷயத்தில் கவனமாக இருக்கிறேன்.”
-
இவ்வாறு ராதிகா ஆப்தே கூறினார்.
------------------------------
தினத்தந்தி